Yohana 6 - KITAWO MALEŊ Catholic

Yesu pidho ji gana abic

¹ Rumacen, Yesu ogik to cewere i wakawaka ma Galili (kosa ma Tiberia).

² Lwak ji madwoŋ oluwo go, rupiri oyido joneno ranyuth m'otimo kwoŋ botho jotwo.

³ Yesu oidho tendere, to bedo piny gi jofonjirok pere.

⁴ Ndelo pa Joyuda madwoŋ ma kalima ma Kadho, onwaŋo orikere.

⁵ Munyo Yesu oŋiyo kor gi korin to neno ni lwak ji madwoŋ onwaŋo bino bonge, openjo Filipo ni, “Wanyalo nyewo kune cemo manyalo pidho ji me je?”

⁶ (Openjo ama nyaka ma temo Filipo, rupiri go won oyido otieko ŋeyo gima go kidho timo.)

⁷ Filipo odwoko ni, “Kada pesa ma romo misara ma dwe aucel je kinyal nyewo mugat ma romo dhano je bilo ye kad'abila won.”

⁸ Jafonjirok pere man, Andereya, omin Simon Petero owaco ni,

⁹ “Jayac moro ee ka man gi mugat abic ma bel kodi rec ario. To me bende dikony aŋo ri lwak ji me je?”

¹⁰ Yesu owaco rijo ni, “Waci ri ji jowobedi piny.” (Lum oyido omore kenyo.) Ameno ji je jobedo piny. Oyido cwo romo cegin gana abic.

¹¹ Gikenyo Yesu okwanyo mugat, oketho Were walwa, to poko ji m'onwaŋo jobedo piny. Apaka bende otimo gi rec, aka ji je jolimo paka joyenyo.

¹² Munyo ji je joyeŋ, go owaco ri jofonjirok pere ni, “Coki win ŋinjeŋinje m'odoŋ; wakiri wawey gimoro wonyekere kada mathin.”

¹³ Gikenyo jocoko gimoro je, to jopoŋo aditin apar g'ario ma mugat ma bel ma jom'ocemo joweyo.

¹⁴ Munyo ji joneno gir'aura ma Yesu otimo, jowaco ni, “Adieri me obedo jatuci wac Were m'oyido ripo bino i piny!”

¹⁵ Munyo Yesu oŋeyo nike oyido jomito bino loko go kere gi mbaka, go oeye kenyo to kidho pondo wi got kakende.

Yesu wotho wi pi

¹⁶ Munyo piny oyutho, jofonjirok pere joloro yu wakawaka to

¹⁷ jodonjo i ye, to jocewere jogik yu Kapernaum. Piny oyutho kiri mafodi Yesu k'odwoko bongi jo.

¹⁸ I hongo no asur madwoŋ oyido kudho aka miyo pi ule marac.

¹⁹ Jofonjirok oyido jotieko cewirok ma romo mayiro adek kosa aŋwen to joneno Yesu munyo wotho wi pi kareno bino cegin gi ye; to lworo mako jo.

²⁰ To Yesu waco rijo ni, “Wikiri wilwor, kole me an.”

²¹ Gikenyo to jorwako go i ye gi kisangala, to piyo piyo no jotundo kam'othwo kam'onwaŋo jokidh'iye.

Ji jorango Yesu

²² Yawere mere lwak ji m'onwaŋo odoŋ loka wakawaka ma koca joniaŋ nike ye acel kende am'onwaŋo odoŋ kenyo. Aka oyido bende joŋeyo nike Yesu k'odonjo i ye kodi jofonjirok pere, to jokadho kendi gin.

²³ Onyo ye moro m'owok Tiberia, jotundo thengi pi cegin kodi kama lwak ji ceŋino jocam'iye mugat, munyo Rwoth otieko miyo silwany.

²⁴ Munyo lwak ji no joneno ni Yesu ongoye kenyo kodi jofonjirok pere, jodonjo i ye no to jokidho yu Kapernaum rango go.

Yesu obedo mugat ma kelo kwo

²⁵ Munyo ji jonwaŋo Yesu yu loka, jowaco rigo ni, “Jafonji, ibino ka i hongo mene?”

²⁶ Yesu odwoko ni, “Adieri awaco riwin, wirangan rupiri ceŋino wicamo mugat wiyeŋ wijoje, to makiweno ni wineno ranyuth ma gir'aura.

²⁷ Wikiri witiy ri cemo ma nyekere piyo; to tiyi win ri cemo ma yindira to kelo kwo makirum. Me a cemo ma Wod Dhano bino miyo win, rupiri Were Baba won otieko ketho kwoŋ go ranyuth ma ridho wac no.”

²⁸ Gikenyo jopenjo go ni, “Watim aŋo ŋey watim tic pa Were?”

²⁹ Yesu odwoko ni, “Me a tic ma Were mito ni witim: Yey win ŋata go ooro.”

³⁰ Jodwoko ni, “Ranyuth aŋo ma gir'aura ma inotimi aka nyaka wanyal neno to wayeyin? Aŋo m'ilatimo ye won?

³¹ Kwarere mawan cango jocamo mana i thim paka ndiko waco ni, ‘Omiyo jo mugat ma wok i polo acama.’ ”

³² Yesu owaco rijo ni, “Adieri awaco riwin, Musa ama k'omiyo win mugat ma wok i polo. To Baba won ama miyo win mugat mar'adieri ma wok i polo.

³³ Rupiri mugat ma Were miyo obedo ŋata loro piny wok i polo aka miyo piny kwo.”

³⁴ Gikenyo jokwayo go ni, “Jadwoŋ, onyo miy wan mugat no wok konon.”

³⁵ Yesu owaco rijo ni, “Abedo mugat ma kelo kwo. Ŋata bino bongan kilawinjo kec, aka ŋata yeyan kilawinjo riyo.”

³⁶ “Aka atieko kiri waco riwin ni witieko nenan, to je fodi wikiyeyan.

³⁷ Moro je ma Baba miyan bino bongan. Ak'oriem woko nyatoro je m'obin bongan.

³⁸ Kole abino i piny wok i polo timo gima ŋat'ooran yenyo, makiweno gim'awon ayenyo.

³⁹ Me a gima ŋat'ooran yenyo ni atim: Nike ji je ma go omiyan kiri joworweny kad'acel, to nike acerino jo i kwo i ndelo ma rumacen.

⁴⁰ Ato me obedo mito pa Baba, nike nyatoro je m'onen Wode to yeyo go wobedi gi kwo makirum; aka abino cerino go i ndelo ma rumacen.”

⁴¹ Joyuda jocako kiŋunyaŋunya kwoŋ go rupiri owaco ni, “Abedo mugat ma wok i polo.”

⁴² Gikenyo jowaco ni, “Me won ki Yesu wod pa Yozefu, aka waŋeyo kiri bamere gi min? To raŋo ma go pama kethere waco ni oloro piny wok i polo?”

⁴³ Yesu odwoko ni, “Weyi win kiŋunyaŋunya wiwegi kendi win.

⁴⁴ Ongoye ŋata nyalo bino bongan kwanyo woko ka Baba m'ooran oywayo go bongan; aka abino cerino go i ndelo ma rumacen.

⁴⁵ Kole ondiki i kitawo pa jotuci wac Were ni, ‘Were bino fonjo ji je.’ Moro je ma winjo Baba aka fonjere bonge bino bongan.

⁴⁶ Me kinyuthi ni nitie moro m'otieko neno Baba, kwanyo woko ŋat'owok bongi Were kende ama otieko neno go.”

⁴⁷ “Adieri awaco riwin, ŋata yeyo je nitie gi kwo makirum.

⁴⁸ Abedo mugat ma kelo kwo.

⁴⁹ Kole kwarere mewin jocamo mana i thim, to jotho.

⁵⁰ To ee mugat ma wok i polo ma ka nyatoro ocamo kilatho.

⁵¹ Abedo mugat ma kelo kwo m'obino i piny wok i polo. Ŋat'ocam mugat me bino kwo cil gi cil. Aka mugat m'abino miyo win meno a delkwoŋan, m'abino miyo aka nyaka piny wolimi kwo.”

⁵² Gime oero piem ri Joyuda wegi kendi gin. Jopenjo ni, “Ŋatin nyalo nedi miyo wan delkwoŋe ni wacam?”

⁵³ Yesu owaco rijo ni, “Adieri awaco riwin ni ka wikicamo delkwoŋ Wod Dhano to wimadho remo pere wik'obedi gi kwo i win.

⁵⁴ Ŋata camo delkwoŋan aka madho remo paran nitie gi kwo makirum, aka abino cerino go i ndelo ma rumacen.

⁵⁵ Kole delkwoŋan meno cemo adieri aka remo paran bende gir'amadha adieri.

⁵⁶ Ŋata camo delkwoŋan aka madho remo paran bedo i an aka abedo i go.

⁵⁷ Baba makwo ooran, aka akwo kwoŋbedo go. Meno bende apaka ŋata caman bino limo kwo wok kwoŋan.

⁵⁸ Am'omiyo me obedo mugat m'obino wok i polo; kicale kodi mugat ma kwarere win jocamo to jotho. Ŋata camo mugat me bino kwo cil gi cil.”

⁵⁹ Yesu owaco gime munyo fonjo i kitipa pa jom'oyeyo pa Joyuda ma Kapernaum.

Wac ma kwo makirum

⁶⁰ Jofonjirok pere mathoth jowinjo gime to jowaco ni, “Kole Fonji me tek swa. Onyo ŋata nyalo yeyo?”

⁶¹ Munyo, Yesu oŋeyo ni jofonjirok pere oyido joŋunyaŋunya kwoŋ gime, openjo jo ni, “Gime ŋedho cuny win?

⁶² To kosa bedi winen Wod Dhano munyo gik malo kama yado go oyido nitie iye con!

⁶³ Cuny pa Were ama miyo go kwo; delkwoŋe won bukony. Wac m'atieko waco obedo cuny kodi kwo.

⁶⁴ Ama je nyaka joman kwoŋ win jokiyey.” (Ato Yesu oyido oŋeyo wok i cakirok joma jok'oyeyo kwoŋ go kodi ŋata d'ocamo rigo sereko.)

⁶⁵ Aka omedo waco ni, “Me am'omiyo awaco riwin nike ongoye ŋata nyalo bino bongan kwanyo woko ka Baba am'omiyo go onyalo timo ameno.”

⁶⁶ Wok i hongo me, jomathoth m'oyido joluwo go jowire to joweyo ameno luwo go.

⁶⁷ Ameno Yesu openjo japar g'ario ni, “To win, wibende wimito weyan?”

⁶⁸ Simon Petero odwoko go ni, “Rwoth, onyo wanokidhi riwan bongi ŋa man? Kole iŋat'initie ye gi wac ma kwo makirum.

⁶⁹ Aka onyo wayeyo odoko waŋeyo nike in ibedo Maleŋ m'owok bongi Were.”

⁷⁰ Yesu odwoko ni, “Akiyero win apar g'ario? To ŋat'acel kwoŋ win obedo jwogi!”

⁷¹ Go oyido luwo kwoŋ Yuda, wod pa Simon Iskariot. Rupiri Yuda, kad'onwaŋo obedo acel kwoŋ japar g'ario, go am'oyido kidho camo ri Yesu sereko.