Yohana 19 - KITAWO MALEŊ Catholic

¹ Gikenyo Pilato otero Yesu to oro jo cwado go.

² Jolweny jodolo thac kudho to joketho i wiye pa junga; joruko rigo kanzu ma rangi ariŋo.

³ Aka jobino bonge to jowaco ni, “Yindira Kere pa Joyuda!” To jogoyo lembe adhoŋ.

⁴ Pilato odoko ogik to waco ri lwak ji no ni, “Neni win ee awodho go bongi win, ma miyo win ŋeyo nike akinyalo nwaŋo gima miyan thumo rigo banja.”

⁵ Gikenyo owodho Yesu woko munyo oruko junga ma thac okudho kodi kanzu ma rangi ariŋo. Pilato owaco rijo ni, “Neni win! Me a jalago!”

⁶ Munyo jotel pa jocway ri Were i wi migam kodi ji pajo joneno go, jokoko ni, “Guri go kwoŋ musalaba! Guri go kwoŋ musalaba!” Pilato owaco rijo ni, “Ere kwany win go wiwegi wiguri go kwoŋ musalaba. Akinen gima d'imiyan athum rigo banja.”

⁷ Joyuda jodwoko ni, “Wanitie gi cik ma waco ni, go ripo tho, rupiri go owaco ni go Wod Were.”

⁸ Munyo Pilato owinjo ameno, lworo omedo mako go.

⁹ Go ogik i cel to waco ri Yesu ni, “Iwok kune?” To Yesu k'odwoko go.

¹⁰ Pilato owaco rigo ni, “Ik'oluwi kodan? Ikuya ni anitie gi meni ma gonyin, kosa ma gurin kwoŋ musalaba?”

¹¹ Yesu odwoko ni, “Initie gi meni kwoŋan nyaka rupiri Were am'omiyin. Am'omiyo ŋat'okelan i cingin ama nigi raco madwoŋ mere.”

¹² Munyo Pilato owinjo ameno omedo bedo g'awanya ma gonyo go. To Joyuda jokoko ni, “K'igonyo jal me meno ikimere kodi Kayisar! Nyatoro je ma waco nike go kere meno jakwor pa Kayisar!”

¹³ Munyo Pilato owinjo wac me, otero Yesu woko to bedo piny i kom ma thumo banja kam'ilwoŋo ni, “Kalikondi ma Tele.” (I dhohiburu bedo Gabatha).

¹⁴ Oyido cegin sawa aucel m'odieceŋ i ndelo ma yikirok ri kalima ma Kadho. Pilato owaco ri Joyuda ni, “Kere mewin ee!”

¹⁵ Jokoko ni, “Neki go! Guri go kwoŋ musalaba!” Pilato openjo jo ni, “Wimitan agur Kere mewin kwoŋ musalaba?” Jotel pa jocway ri Were i wi migam jodwoko ni, “Kere ma wanitie gine meno a Kayisar kende!”

¹⁶ Gikenyo Pilato oketho Yesu i cingi jo ni wogur kwoŋ musalaba. Gikenyo Yesu obedo i cingi jokur.

Iguro Yesu kwoŋ musalaba

¹⁷ Go owok woko munyo otiŋo musalaba pere, to tundo i kabedo m'ilwoŋo ni “Kahanga wic”. (I dhohiburu ilwoŋo ni “Golgotha.”)

¹⁸ Joguro go kenyo kwoŋ musalaba; joguro j'ario man bende kwoŋ musalaba, ŋat'acel yuracuc ŋatiman yuracam pere kareno Yesu obedo diere.

¹⁹ Pilato ondiko wac to oro joketho wi musalaba ni, “YESU JANAZARETH, KERE PA JOYUDA.”

²⁰ Joyuda mathoth josoma gino, rupiri kam'ogur'iye Yesu kwoŋ musalaba oyido cegin gi tindi. Wac no oyido ondiki i Dhohiburu, Dholatin, kodi Dhogrik.

²¹ Jotel pa jocway ri Were i wi migam pa Joyuda jodaŋin ri Pilato ni, “Ikir'indiki ni, ‘Kere pa Joyuda.’ To ndiki ni, ‘Jal me owaco nike, An a Kere pa Joyuda.’ ”

²² Pilato odwoko ni, “Gim'atieko ndiko meno atieko ndiko.”

²³ Munyo jolweny jotieko guro Yesu kwoŋ musalaba, jokwanyo nangin pere, to jopoko adec aŋwen, kisi jalweny otero adec acel. Jokwanyo kanzu bende m'okwoy ma nanga acel, m'ongoye kam'oriw gine.

²⁴ To Jolweny jowaco ni, “Wakiri wayeci me; ere weyi wagoy kwir wanen ŋat'oteri.” Gime otimere ma miyo gim'ondiki wotundi i kare ni, “Wegi jopokere nangin paran Jogoyo kwir ri kanzu paran.” Aka jolweny jotimo ameno won.

²⁵ Joma oyido jocungo cegin gi musalaba pa Yesu obedo yokimere, nyamin yokimere, Maria cipa Kilopas, kodi Maria ma wok Magdala.

²⁶ Munyo Yesu oneno yokimere kodi jafonjirok ma go omaro jocungo kenyo, owaco ri yokimere ni, “Dhakodwoŋ, wodin eno.”

²⁷ To waco ri jafonjirok no ni, “Yokin eno.” Aka wok i hongo no jafonjirok no otero dheno peco pere.

Tho pa Yesu

²⁸ Yesu oŋeyo ni gimoro je orumo, to ma miyo gim'ondiki wotundi owaco ni, “Riyo nekan.”

²⁹ Agwata oyido nikenyo m'opoŋ vini mawac; jorwako cangwe i vini no, joketho i jangi yath, to jocwayo rigo i dhoke.

³⁰ Yesu obilo vini to waco ni “Orumo!” Gikenyo okulo wiye to weyo cunye cot.

Iroko ŋeti Yesu

³¹ Gikenyo Joyuda jokwayo Pilato nike wotur tiendi jom'onek t'ikwanyo jo kwoŋ musalaba, rupiri meno oyido ndelo ma yikirok ri Sabato, aka jok'omito ni delkwoŋ jono wobedi kwoŋ musalaba i ndelo ma Sabato, rupiri Sabato obedo ndelo madwoŋ.

³² Am'omiyo jolweny jokidho to joturo tiendi ŋati marapena kodi apa ŋatiman m'onwaŋo oneki jo kanyacel gi Yesu.

³³ To munyo jotundo bongi Yesu to joneno nike go otieko tho, jok'oturo tiende.

³⁴ Acel kwoŋ jolweny oroko ŋeti Yesu gi toŋ, to piyo piyo remo gi pi wok.

³⁵ Ŋat'oneno gime munyo timere oluwo kwoŋe. Wac pere otire, kendo go oŋeyo ni luwo gir'adieri aka ŋey wibende wiyey.

³⁶ Gime otim nike randik wotundi i kare ni, “Ongoye coko pere kad'acel ma bino tur.”

³⁷ Aka randik man waco ni, “Ji jobino ŋiyo ŋata jocwowo.”

Yiko Yesu

³⁸ Rumacen, Yozefu, ma Arimatheya, okwayo Pilato ni go wokwany delkwoŋ Yesu. (Yozefu oyido jafonjirok pa Yesu manyaliŋliŋ, rupiri go oyido lworo Joyuda.) Pilato owaco rigo ni go nyalo kwanyo delkwoŋ Yesu; gikenyo Yozefu okidho to kwanyo delkwoŋ Yesu.

³⁹ Nikodemo bende, ma ndir moro okidho neno Yesu wor, obino, kareno otiŋo gima ŋwe kur cegin kilo piero adek, m'oruw kodi pigi yen man.

⁴⁰ Jario me jokwanyo delkwoŋ Yesu to jotweyo i sukin matar gi mo maŋwe kur me i kite ma yikirok pa Joyuda.

⁴¹ Kam'ogur'iye Yesu kwoŋ musalaba oyido nitie ndelo ma di kaliel m'oyido fodi k'oyik'iye nyatoro.

⁴² Paka ndelo oyido obedo ma telo Sabato pa Joyuda, aka kaliel onwaŋo nicegin, joyiko Yesu kenyo.