Yohana 17 - KITAWO MALEŊ Catholic

Yesu kwayo ri jofonjirok pere

¹ Munyo Yesu otieko waco gime, oŋiyo polo to waco ni, “Baba, hongo otundo. Miy Wodin dwoŋ, aka ŋey Wodin womiyin dwoŋ.

² Kole imiyo go meni kwoŋ ji je, ŋey go womiy joma imiyo go je kwo makirum.

³ Aka me a kwo makirum: Nike ji jowoŋeyin, Were acel mar'adieri, kendo jowoŋey Yesu Kristo m'ioro.

⁴ Atieko nyutho dwoŋ perin i piny; atieko timo tic m'imiyan timo.

⁵ Onyo pama, Baba, miyan dwoŋ ruwaŋin, dwoŋ m'oyido anitie gine kodin mafodi k'ocwey piny.”

⁶ “Atieko miyo nyingin ŋeyirok i waŋ ji m'imiyan wok i piny. Jo oyido jobedo ji perin, to imiyan jo aka jotieko mako wac perin.

⁷ Pama onyo joŋeyo ni gimoro je m'imiyan wok bongin,

⁸ rupiri amiyo jo mikwenda m'imiyan, aka jojolo; joŋeyo adieri ni awok bongin, aka joyeyo nike iŋat'ioran.”

⁹ “Akwayo rijo. Akikway ri piny, to ri ji m'imiyan, rupiri jobedo aperin.

¹⁰ Gimoro je m'anigine meno aperin, odoko gimoro je m'initie gine meno aparan, aka atieko limo dwoŋ kwoŋ jo.

¹¹ Akibino doŋ i piny ka, to jo fodi jonitie i piny ka, to an onyo abino bongin. Baba Maleŋ, kuri jo maber gi meni ma nyingin m'imiyan, ŋey nyaka jowobedi acel paka wan kodin wabedo acel.

¹² I hongo m'onwaŋo an gi jo, akuro jo maber gi meni ma nyingin m'imiyan. Agwoko jo, aka kwoŋ jo ongoye ŋat'orwenyo, kwanyo woko ŋati m'amien oyido ripo podho rigo ŋey gima ndiko waco wotimere.

¹³ Onyo pama abino bongin, aka awaco gigipiny me i piny, ŋey jowolimi kisangala paran to poŋ i cuny jo.

¹⁴ Amiyo jo mikwenda perin aka piny odak jo, rupiri jok'obedo ji pa piny paka an bende akibedo dhano pa piny.

¹⁵ Akikway ni ikwany jo woko i piny, to nike ikuri jo maber kwoŋ meni pa ŋatarac.

¹⁶ Paka akibedo dhano pa piny, jo bende jok'obedo ji pa piny.

¹⁷ Lony cuny jo iy'adieri, rupiri wac perin obedo adieri.

¹⁸ Onyo aoro jo i piny paka cango in bende ioran i piny.

¹⁹ Aka ri bero pajo onyo amiyere rin ŋey jo bende jowonyal miyirok iy'adieri.”

²⁰ “Akikway ri jome kende, to ri joma bende joyeyan ro mikwenda pa jome.

²¹ Akwayo nike joje jowonyal bedo acel, Baba, paka initie i an aka anitie i in. Jo bende jowobedi i wan, ŋey piny woyeyi nike Iŋat'ioran.

²² Amiyo jo dwoŋ m'imiyan, ŋey jowobedi acel paka wan kodin wabedo acel;

²³ abedi i jo aka ibedi i an, ŋey jowobedi acel kicutho, aka nyaka piny woŋey ni ioran aka ni imaro jo paka imaran.”

²⁴ “Baba, itieko miyan jo, aka ayenyo jowobedi kodan kam'an'iye, jowonyal neno dwoŋ paran m'imiyan; kole imaran kiri mafodi k'ocwey piny.

²⁵ Baba M'otire, piny kuya in, t'aŋeyin aka jome joŋeyo nike Iŋat'ioran.

²⁶ Atieko miyo jo ŋeyin aka abino medo timo ameno, ŋey mar perin m'initie gine ran wobedi i jo, aka awon bende abedi i jo.”