Yohana 14 - KITAWO MALEŊ Catholic

Yesu a royo ma kidho bongi Bamere

¹ Yesu owaco rijo ni, “Wikiri wirembi kosa wiguti. Yey win Were, aka yeyan win bende.

² Kisikin omore i ot pa Baba, aka akidho yiko riwin kabedo. D'akiwaco riwin ama bedi k'obedo adieri.

³ Aka k'atieko kidho yiko riwin kabedo, abino dwoko t'aomo win, ŋey wibedi kodan kam'anitie iye.

⁴ Wiŋeyo kam'akidh'iye kodi royo mere.”

⁵ Toma owaco rigo ni, “Rwoth, wakuya kam'ikidh'iye. Wanyalo ŋeyo nedi royo ma tundo korago?”

⁶ Yesu odwoko ni, “An aya royo, abedo adieri, kodi kwo; ongoye ŋata bino bongi Baba, ka k'oluwo bongan.”

⁷ Owaco rijo ni, “Ka wiŋeyan, meno bende wiŋeyo Baba; aka wok konon onyo wiŋeyo go, aka witieko neno go.”

⁸ Filipo owaco rigo ni, “Rwoth, nyuthi wan Were Bawan, meno won kende laromo wan.”

⁹ Yesu odwoko ni, “Atieko bedo gi win hongo malac ama je, to fodi ikuya an, Filipo? Moro je m'otieko nenan meno otieko neno Baba. To raŋo ma wiwaco ni, ‘Nyuthi wan Were Bawan?’

¹⁰ Wikiyey, ni anitie i Baba aka Baba ni i An? Wac m'atieko waco riwin, kiwoki bongan an won. Baba ma bedo i an, ama timo tic pere.

¹¹ Yey win nike anitie i Baba, aka Baba nitie i an. Kak'ameno yey win kada ro tic pere won.

¹² Adieri awaco riwin, moro je ma yeyan bino timo tic ma an atimo, ey, bino timo kiri maloyo me, rupiri akidho bongi Baba.

¹³ Aka abino timo gimoro je ma winokway i nyingan; ameno aka ŋey dwoŋ pa Baba wonyuthere i Wode.

¹⁴ Ka wikwayo gimoro je i nyingan abino timo.”

Yesu ciko dhiro Cuny Maleŋ

¹⁵ “Ka wimaran, wibino mako or paran.

¹⁶ Aka abino kwayo Baba to miyo win Jakony man ma wobedi gi win ndir je,

¹⁷ meno Cuny mar'adieri ma piny kinyal jolo, rupiri kinyal neno go kosa ŋeyo go. To wiŋeyo go, rupiri go nitie gi win aka bino bedo i win.”

¹⁸ “Akibino weyo win paka nyithindho kic; abino dwoko bongi win.

¹⁹ I hongo macek piny kilanenan kendo, to wibino nenan; aka paka akwo, wibende wibino kwo.

²⁰ Ka ndelo no otundo, wibino ŋeyo nike anitie i Baba, aka winitie i an, paka anitie i win.”

²¹ “Moro je ma jolo or paran aka mako, meno a ŋat'omaran. Baba bino maro ŋat'omaran; aka abende abino maro go to anyuthere rigo.”

²² Yuda (ki Yuda Iskariot) owaco ni, “Rwoth, onyali bedo nedi nike ibino nyuthere riwan to ki ri piny?”

²³ Yesu odwoko ni, “Nyatoro je m'omaran bino winjo mikwenda paran. Baba bino maro go aka wabino bino bonge to wabedo bonge.

²⁴ Nyatoro je ma k'omaran kiwinji wac paran. Aka mikwenda ma witieko winjo k'aparan, to wok bongi Baba m'ooran.”

²⁵ “Atieko waco riwin gime je ma fodi anitie gi win.

²⁶ To Jamiy rieko, Cuny Maleŋ ma Baba bino dhiro i nyingan, bino fonjo win gimoro je aka bino poyo win gimoro je m'atieko waco riwin.”

²⁷ “Siem am'onyo aweyo riwin; amiyo win siem paran; aka akimiy win paka piny miyo. Wikiri wirembi i cuny win; odoko wikiri wibedi gi lworo.

²⁸ Kole wiwinjo munyo awaco riwin ni, ‘Abino weyo win, t'abino dwoko bongi win.’ Bedi wimaran, di wisangala ni akidho bongi Baba, rupiri go loyan gi dwoŋ.

²⁹ Ato eno atieko waco riwin pama, mafodi k'otimere, aka k'otimere wibino yeyo.

³⁰ Onyo akibino medo luwo kodi win mathoth, rupiri jadhum ma piny me bino. Go ongoye gi meni kwoŋan,

³¹ to piny je ripo ŋeyo nike amaro Baba; am'omiyo atimo gimoro je ma go ooran. Ere ay win, waeye woko ka.”