Yohana 13 - KITAWO MALEŊ Catholic

Yesu lwoko tiendi jofonjirok pere

¹ Mafodi ndelo ma kalima ma Kadho, k'otundo, Yesu oniaŋ nike hongo pere otundo ma eye i piny wokidhi bongi Bamere. Paka ndir je go oyido omaro jopere i piny ka, omaro jo kiri i gike.

² Yesu kodi jofonjirok pere oyido jonitie dhower othieno. Aka jwogi oyido otieko ketho paro ma camo ri Yesu sereko i cuny Yuda wod pa Simon Iskariot.

³ Yesu oŋeyo ni Bamere otieko ketho gimoro je i cinge; go oŋeyo nike owok bongi Were aka onyo go kidho gik bongi Were.

⁴ Riameno Yesu oay dhower, olunyo nanga pere ma woko, to tweyo taulo i piere.

⁵ Gikenyo okonjo pi moro i besen, to cako lwoko tiendi jofonjirok pere, to yweyo gi taulo ma piere.

⁶ Munyo otundo bongi Simon Petero, Simon openjo go ni, “Rwoth, onyo ikidho lwoko tiendan?”

⁷ To Yesu odwoko ni, “Pama fodi ikuya gim'atimo, to ibino ŋeyo rumacen.”

⁸ Ana Petero, “Ikibino lwoko tiendan kada mathin.” Yesu odwoko ni, “K'akilwoko tiendin meno kere ikinitie kanyacel kodan.”

⁹ Simon Petero odwoko ni, “Rwoth onyo ikir'ilwok nyaka tiendan kende, to lwoki ran kiri cingan gi wiyan bende!”

¹⁰ Yesu owaco ni, “Moro je m'otieko lwoki meno otieko lony kwoŋe gipi aka kiyeny lwoki kendo, mitere wolwoki tiende won kende. Wijoje wilony, kwanyo woko ŋat'acel.”

¹¹ (Yesu onwaŋo otieko ŋeyo ŋata kidho camo rigo sereko, am'omiyo owaco ni, “Wijoje wilony, kwanyo woko ŋat'acel.”)

¹² Munyo go otieko lwoko tiendi jo, oruko nanga pere ma woko to gik i kabedo pere dhower. Go openjo ni, “Wiŋeyo dwoŋ gim'awok timo riwin?

¹³ Wilwoŋan ni Jafonji kodi Rwoth, aka witire, kole abedo ameno.

¹⁴ Onyo paka an ma bedo Rwoth mewin odoko Jafonji mewin, awok lwoko tiendi win, wibende wiripo lwoko tiendi jowoti win.

¹⁵ Amiyo win ranen, ŋey wibende witim gim'awok timo riwin.

¹⁶ Adieri awaco riwin, ongoye ŋeca maloyo rwoth pere gi dwoŋ, kendo ongoye jamikwenda madwoŋ loyo ŋat'ooro go.

¹⁷ Paka pama onyo wiŋeyo gigipiny me, ka witimo ameno wibino limo silwany!”

¹⁸ “Akiluw kwoŋ wijoje; aŋeyo jom'ayero. To Ndiko Maleŋ ripo timere ma waco ni, ‘Ŋat'ocemo kodan owire ran marac.’

¹⁹ Awaco riwin gime pama mafodi k'otimere, aka k'otimere wibino yeyo ni, ‘An ago’.

²⁰ Adieri awaco riwin, moro je ma jolo nyatoro ma aoro, meno bende jolan aka ŋata jolan, meno bende jolo ŋat'ooran.”

Yesu luwo kwoŋ camo rigo sereko ma fodi k'otimere

²¹ Munyo Yesu otieko waco gime, ocako winjo rem i cunye to luwo kamaler ni, “Adieri awaco riwin, ŋat'acel kwoŋ win kidho camo ran sereko.”

²² Jofonjirok joŋiyere waŋ, munyo jodhier swa kwoŋ ŋata go oyido waco.

²³ Acel kwoŋ jofonjirok ma Yesu omaro, onwaŋo bende obedo kabuti Yesu.

²⁴ Simon Petero ogwelo ŋato aka owaco ni, “Penji go ŋata go luwo kwoŋe.”

²⁵ Gikenyo jafonjirok no ocore cegin to thenere kwoŋ Yesu to penjo ni, “Manago ŋa, Rwoth?”

²⁶ Yesu odwoko ni, “Ŋat'abino pilo mugat i acero t'amiyo go meno a ŋata go.” Gikenyo go okwanyo mugat, opilo, to miyo Yuda, wod pa Simon Iskariot.

²⁷ Tekin Yuda jolo mugat no, Sitan odonjo kwoŋe. Yesu owaco rigo ni, “Kwaki timo gim'iyiko timo!”

²⁸ Ongoye dhano kwoŋ jom'oyido jonitie dhower no m'oniaŋ gim'omiyo Yesu owaco rigo ameno.

²⁹ Paka Yuda am'oyido jamigowa, jofonjirok megi joparo ni Yesu owaco rigo ni wokidhi wonyewi gima jomito ma kalima, kosa ni womiy jocandi gimoro.

³⁰ Tekin Yuda jolo mugat no, owok woko mayot; aka piny oyido otieko yutho.

Or manyen

³¹ Munyo Yuda otieko kadho, Yesu owaco ni, “Pama Wod Dhano onyo otieko limo dwoŋ, aka Were bende onyo otieko limo dwoŋ i go.

³² K'inen Were onyo otieko limo dwoŋ i go, meno Were won gipi ama bino miyo Wode dwoŋ, aka bino timo ameno mayot.

³³ Nyithindho paran, fodi abino bedo ye gi win hongo macek. Wibino rangan, aka bende awaco riwin gim'atieko waco ri Joyuda ni, ‘Wikinyal tundo kama akidh'iye.’

³⁴ Amiyo win or manyen ni, mare win. Paka atieko maro win apaka bende wiripo mare.

³⁵ Ka kisi dhano omaro nyawote, meno aka ji je jobino ŋeyo nike wijofonjirok paran.”

Yesu luwo kicutho kwoŋ kwedirok pa Petero

³⁶ Simon Petero openjo ni, “Rwoth, ikidho kune?” Ana Yesu, “Wikinyal luwan kam'akidh'iye gi pama; to rumacen aka wibino luwan.”

³⁷ Petero openjo ni, “Rwoth, raŋo ma akinyali luwin pama? An ayikere kiri tho rin!”

³⁸ Yesu odwoko ni, “Iyikere adieri tho ran? Adieri awaco rin, kafodi wod gweno k'okoko, ibino kwedirok kwoŋan didek.”