Yohana 10 - KITAWO MALEŊ Catholic

Ageca kwoŋ jakwath rombo

¹ “Adieri awaco riwin, ŋata kidonji i dier sidwol rombo gi dhiot, to idho gi yuthenge man, meno go jakwo kendo jamahembi.

² Ŋata donjo gi dhiot meno a jakwath rombo.

³ Jakur dhiot yawo rigo, rombo jowinjo dwonde aka go lwoŋo rombo pere gi nyingi gin aka wodho jo woko.

⁴ K'otieko wodho jo woko, telo jo, to joluwo go, rupiri joŋeyo dwonde.

⁵ Jokibino luwo ŋatiman, jobino ŋwec jowoeye bongi ŋato ayino, rupiri jokuya dwonde.”

⁶ Yesu owaco rijo ageca me, to jok'oniaŋ gima go owaco no.

⁷ Yesu odoko owaco ni, “Adieri awaco riwin, Aŋat'abedo dhiot pa rombo.

⁸ Joman je ma jotelo yuwiyan jobedo jokwo kendo jomahembi; to rombo k'owinjo jo.

⁹ Aŋat'abedo dhiot. Moro je ma donjo gi bongan bino both; go bino donjo to wok, to nwaŋo lum m'oloth.

¹⁰ Jakwo bino nyaka kwalo, neko kodi nyeko woko. An abino nike jowolimi kwo, aka kwo ma gibe.”

¹¹ “Aŋat'abedo jakwath maber. Jakwath maber yeyo tho ri rombo pere.

¹² Jatic acula kibedi won rombo, ka oneno arara bino, weyo jo to ringo, to arara kwanyo rombo to kedho jo woko.

¹³ Go ringo rupiri go jatic acula, aka kidew kwoŋ rombo.

¹⁴ An a jakwath maber. Aŋeyo rombo paran,

¹⁵ aka bende joŋeyan paka Baba oŋeyan, aka abende aŋeyo go, aka ayeyo tho ri rombo.

¹⁶ An gi rombo man ma jongoye i sidwol me. Aripo kelo jo bende; jobino winjo dwondan, aka jobino lokere sidwol acel kodi jakwath acel.”

¹⁷ “Baba omaran rupiri ayeyo bolo woko kwo paran, rumacen to doko anwaŋo kendo.

¹⁸ Ongoye ŋata kwanyo kwoŋan kwo me. Awon arwenyo woko gi mito paran. Anitie gi meni ma rwenyo go woko, kendo anitie gi meni ma dwoko go. Me gima Baba ooran timo.”

¹⁹ Tiakirok odoko obedo i dier Joyuda ro wac me.

²⁰ Jomathoth kwoŋ jo jowaco ni, “Go nitie gi jwogi! Neko omako! Wiwinjo luwo pere raŋo?”

²¹ To joman jowaco ni, “Ŋata nigi jwogi kinyal luwo ama! Jwogi bende dinyal botho joma waŋ gin otho?”

Joyuda jokwero Yesu

²² I hongo no ndir otundo ma kalima ma lonyirok ruwaŋ Were, m'obedo i Ot pa Were i Yerusalem; i ndir no pe oyido oŋico piny.

²³ Yesu oyido wotho i kalikondi pa Solomon i Ot pa Were, to

²⁴ Joyuda jocokere jothoko go kenyo to jowaco rigo ni, “Ilaweyo wan i kiganagana kiri keraŋo? Waci riwan kamaler ka in a Kristo.”

²⁵ Yesu odwoko ni, “Atieko waco riwin, to wikimiti yeyo. Tic ma atimo i nyingi Baba ama luwo ran;

²⁶ to wikibino yeyo rupiri wingoye i rombo paran.

²⁷ Rombo paran winjo dwondan; aŋeyo jo, aka joluwan.

²⁸ Amiyo jo kwo makirum, aka jokibino tho; ongoye moro ma bino mayan jo.

²⁹ Baba m'omiyan jo dwoŋ loyo ji je, aka ongoye nyatoro manyalo kwanyo jo woko i cingi Baba.

³⁰ Aka wan kodi Baba wabedo acel.”

³¹ Gikenyo Joyuda odoko jokwanyo telin ma goyo gine go.

³² Yesu owaco rijo ni, “Atieko timo tic mabeyo madit m'owok bongi Baba; onyo mene kwoŋ jo ma wimito goyan'iye gi telin?”

³³ Joyuda jodwoko ni, “Wakimiti goyin ro tic mabeyo m'itimo, to ro luwo gima k'otire kwoŋ Were, rupiri in idhano aka ikethere lwoŋirok ni ibedo Were!”

³⁴ Yesu odwoko ni, “Kere k'ondiki i Cik mewin wegi nike Were owaco ni, ‘Wibedo werin?’

³⁵ Ka Were olwoŋo jom'okel rijo wac pere ni werin (aka gim'ondiki kiwire),

³⁶ onyo winowaci ri ŋata Were ooro i piny ni go luwo gima k'otire kwoŋ Were ni rupiri awaco ni abedo Wod Were?

³⁷ Ere onyo wikiri wiyey k'inen akitim tic pa Baba.

³⁸ To k'inen atimo gigipiny ago, kada nende wikiyeyan, yey win kada nyaka tic no aka winoŋey kicutho ni Baba nitie i an aka anitie i go.”

³⁹ Gikenyo odoko jotemo mako Yesu to budho jo.

⁴⁰ Yesu odoko ogik ocewere i Yordan to por loka yu kama yado Yohana batis'iye ji to bedo kenyo.

⁴¹ Ji madit jobino bonge aka jowaco ni, “Yohana k'otimo gir'aura moro, to gima go owaco kwoŋ jame je obedo adieri.”

⁴² Aka ji kweth joyeyo go kenyo.