Yobu 9 - KITAWO MALEŊ Catholic

Radwok pa Yobu: Japido ongoye

¹ Kenyo Yobu odwoko ama,

² Adieri aŋeyo ni obedo ameno, to dhano otire nedi ruwaŋ Were?

³ Ka dhano otemo piem gi go, go nyalo penjo penji ganin, m'ongoye ŋata nyalo dwoko.

⁴ Were riek i cunye, aka go tek i meni, ŋa m'otieko temo gwenyirok kwoŋ go to nyalo?

⁵ Go ama yengo gote to jooy piny ma k'oŋere, aka reyo woko jo i nge.

⁶ Go ama yengo piny wok i kabedo mere, aka sirin mere yengere.

⁷ Go ama wodho or ri waŋceŋ, aka kiwoki, aka mwono micalin.

⁸ Go am'oyaro polo won kende, aka onyono piny asur ma Nam.

⁹ Go am'ocweyo arara, Orion, Pileyades gi micalin ma yupiny.

¹⁰ Go ama timo gigipiny madongo ma kiniaŋere, gi gir'aura ma kikwanere.

¹¹ Neni, go luwo cegin kodan, to akinyali neno go, kosa niaŋ kwoŋ go.

¹² Ka go mayo woko, ŋa manyalo cero go? Ŋa ma lapenjo go ni, itimo aŋo?

¹³ Were kilawiro woko nge pere, go ŋinyo woko jokony pa Rahab, bulir ma Nam.

¹⁴ Onyo adieri, adwoki go nedi, anoyer gim'anowaci rigo?

¹⁵ Makada nende abedo ma bubanja, akinyali dwoko go, aripo nyaka kwayo Were jathum banja paran wor.

¹⁶ K'oyido alwoŋo go to go ye ran, akiyey ni go nyalo winjo dwondan.

¹⁷ Kole go miyan adhola g'asur, aka medo miyan litho makada nende angoye gi banja.

¹⁸ Go kilayeyan aywe, to poŋan gi keco.

¹⁹ K'oyido obedo piem i meni, go ama tek! K'oyido obedo wac ma tiro, ŋa manyalo kiosa go?

²⁰ Makada nende abedo ma bubanja, dhokan won ama lakisegeya an, makada nende angoye g'apuse, go oyido nyalo ridho ni akom.

²¹ Angoye g'apuse, to akuya gima mako kwoŋan, abwono kwo paran.

²² Riameno atieko waco ni, je obedo gimoro acel, Were reyo woko ji ma bubanja gi jokidakana kanyacel.

²³ Ka teko okelo tho abwap, go nyero candirok pa ji ma bubanja.

²⁴ Were otieko miyo piny i cingi jokidakana, go oumo waŋ jothum banja je, ka k'obedo go m'otimo gime, to ŋa man?

²⁵ Ndelo paran dwir loyo jaŋwec, jorumo m'ongoye maber.

²⁶ Joringo paka riato m'otimi gi midole, paka ango ma pie mako gimoro.

²⁷ K'anowaci ni, wiyan lawil gi kigeŋisa paran, alaweyo julo t'abwonjo,

²⁸ candirok paran je kelo ran lworo, kwoŋbedo aŋeyo ni ikilawaco ni abu banja.

²⁹ Ilathumo ran banja, t'onyo raŋo afutere nono.

³⁰ Makada nende anolwokere gi pi macil, t'alogo gi sabun,

³¹ kucel iladilan i bur, aka nangin paran lauman.

³² Kole Were k'obedo dhano, paka an, m'anyalo dwoko go, kosa osirok gi go.

³³ Ongoye ŋata nyalo kudho firimbi ma thek i dier wan, kosa manyalo thumo banja i dier wan.

³⁴ Kabedi go oyido kwany woko goco pere kwoŋan, to weyo bwokan.

³⁵ Kenyo alaluwo m'akilworo go, kwoŋbedo akibedo gim'iparo.