Yobu 7 - KITAWO MALEŊ Catholic

¹ Ji jonitie gi tic matek i piny, aka kwo pajo cal kwo pa jatic ma goyo fut.

² Jocale ŋeca ma rango tipo ma ywomirok, gi jotic ma jorango cul pajo.

³ Ameno apaka otiek miyan dwe ma futirok, gi wor ma rem.

⁴ K'ariere piny nindo, apenjere ni, piny oyawere sawa adi? To wor bor, aka awire i kanindo tundo odikin.

⁵ Delkwoŋan opoŋ kudin gi cilo, pien kwoŋan thwo, aka pokere woko.

⁶ Ndelo paran kwakere paka piso pa jakwoco, aka jorumo m'ongoye geno.

⁷ Poyi, awi Were, ni kwo paran obedo nyaka luya, aka waŋan kilaneno bero kendo.

⁸ Ji m'oyido jonenan jokilanenan kendo, jono ma jorangan jok'onwaŋan.

⁹ Paka pondeponde rere woko, apaka ji ma kidho i piny pa jom'otho jokidwoki.

¹⁰ Jokidwoki i udi pajo, ji m'oyido joŋeyo jo jokipoy jo kendo.

¹¹ Riameno akilaliŋ, alaluwo i nge ma cunyan, aka alakigeŋisa i litho mar'adundo paran.

¹² Abedo nam kosa bulir ma nam, m'ilakuran?

¹³ Atemo waco ni, kanindo paran layomo cunyan, aka layomo litho paran.

¹⁴ To ibwokan gi lek, aka ibwokan gi menyirok.

¹⁵ To tundo kama ayero wodeyan, kosa atho i kabedo pa delkwoŋan lokirok cokin.

¹⁶ Abwonere, aka aol gi kwo, weyere kodan, kole kwo paran obedo luya.

¹⁷ Ji jobedo aŋo, m'idewo kwoŋ jo swa, aka iparo kwoŋ jo swa?

¹⁸ Ikaŋasa jo kisi odikin, aka itemo jo kisi sawa.

¹⁹ Aŋo m'ikila weyo ŋiyan, weyere kodan amwony ye law paran.

²⁰ K'atimo reco, aŋo m'atimo rin, in jakur pa ji? Raŋo icomere kodan? Raŋo atieko lokirok rin bieto?

²¹ Raŋo ikicwaki kibenga paran? Cwaki komo paran. Kole onyo alatho t'iyikan, ilarangan, to alarwenyo.