Yobu 42 - KITAWO MALEŊ Catholic

Yobu mwole

¹ Yobu odwoko Rwoth ama,

² Aŋeyo ni inyalo timo kisi gimoro je, aka ongoye atoŋa perin ma kinyalere.

³ Ipenjo nger m'anyalo penjo kwoŋ rieko perin, riameno atieko luwo gim'akiniaŋ. Gir'aura ran, ma an akuya.

⁴ Iwaco ran ni awinjin k'iluwo, ilapenjan, aka aripo dwokin.

⁵ Oyido atieko winjo kwoŋin gi ithan, to pama atieko nenin gi waŋan.

⁶ Riameno acayere, aka aŋuto reco paran i fukefuke kodi i buru.

Cowe ma kisi gimoro

⁷ Rumacen munyo Rwoth otieko luwo wac me ri Yobu, Rwoth owaco ri Elifaz ma wok i Teman ni, “Keme paran liel kwoŋin gi merin perin ario. Wikiluwo kwoŋan m'otire paka ŋeca paran Yobu.

⁸ Onyo riameno ter win thwondhe abirio gi wot rombo abirio, wikidhi bongi ŋeca paran Yobu, to wimiyo mic awaŋa. Ŋeca paran Yobu lakwayo riwin, kwoŋbedo alayeyo kwayo pere ŋey akir'atiy gi win cungo kwoŋ miŋo mewin. Wikiluwo kwoŋan m'otire paka ŋeca paran Yobu.”

⁹ Ameno Elifaz, Bilidad kodi Zofar jokadho to jotimo paka Rwoth owaco rijo, aka Rwoth odwoko kwayo pa Yobu rijo.

Idwoko ri Yobu lim pere mirundi ario

¹⁰ Rumacen Rwoth odwoko lim pa Yobu munyo go otieko kwayo ri merin pere. Rwoth omiyo go gigipiny mirundi ario loyo m'oyido go nitie gine con.

¹¹ Wutmin Yobu kodi nyimin go kodi jono je m'oyido joŋeyo go jobino, aka jocemo i ot pere. Jomako gi go wor, aka joyomo cuny go ri teko je ma Rwoth oyido okelo kwoŋ go. Kisi dhano omiyo go pesa gi peta ma zahabu.

¹² Rwoth omiyo kwo pa Yobu ma rumacen silwany, loyo i cakirok. Yobu obedo gi rombo 14,000 ŋamin 6,000 dhok 2,000 kodi punde 1,000.

¹³ Yobu bende oyido nitie gi nyithindho manyir adek kodi mayac abirio.

¹⁴ Nyako madwoŋ ocwoko nyinge ni Jemima, mar'ario ni Kezia aka mathin ni Keren Hapuk.

¹⁵ I piny gibe oyido ongoye nyir ma joŋon paka nyir pa Yobu. Bajo opoko jo lim kanyacel gi wutmin jo.

¹⁶ Rumacen Yobu okwo ma oro 140 aka onyalo neno nyikwaye kodi nyikway nyithindho pere.

¹⁷ Yobu otho kareno go oti swa i oro.