Yobu 34 - KITAWO MALEŊ Catholic

Elihu luwo kwoŋ tiro pa Were

¹ Kenyo Elihu omedo luwo ka waco ama,

² Winji win wac paran, win cwo mariek, aka ciki ithi win, win ma wiŋeyo mathoth.

³ Kole ithi jo temo wac, paka lew jo bilo cemo.

⁴ Weyi wayer gim'otire, aka weyi wayere i dier wan kwoŋ gimaber.

⁵ Yobu otieko waco ni go otire, aka Were othwono go tiro.

⁶ Anotwodi ni akom? Adhola paran kicangi, kucel angoye gi reco.

⁷ Nitie jacwo ma cal gi Yobu, ma ciro yet paŋini madho pi.

⁸ Go bedo kanyacel gi jomarac, aka wotho gi jokidakana.

⁹ Kole go otieko waco ni ongoye cwe, ri dhano kisangala Were.

¹⁰ Riameno winjan win, win ma winitie gi niaŋ, wobedi bor gi Were swa ni go timo kidakana, kosa ni Jameni Je timo kidakana.

¹¹ Kole go culo ji cungo kwoŋ tim pajo, kodi cungo kwoŋ yo pajo.

¹² Adieri Were kitim kidakana, aka Jameni Je kiwir tiro.

¹³ Nitie ŋat'omiyo meni kwoŋ piny, kosa nitie ŋat'omiyo go meni kwoŋ piny gibe?

¹⁴ Ka go okwanyo woko luya pere, kosa ka go omayo kwo,

¹⁵ dinyo kisi cwec makwo je otho kanyacel, aka dinyo dhano olokere fukefuke.

¹⁶ Ka winitie gi niaŋ, winji win gime, winji win gim'awaco.

¹⁷ Ŋat'odak tiro bende nyalo dhumo? Wilathumo banja ri ŋata jameni aka otire?

¹⁸ Ŋa ma waco ri kere ni bukony, kodi ri jodhum ni jokidakana?

¹⁹ Ŋa ma kinyuthi nyakucel ri jodhum, kosa kiyer jocandi ri joŋaŋo. Kole joje jobedo tic ma cingi go.

²⁰ Jokiru tho, iyuko jo i dier wor to jotho, aka tho pa jomeni kibedi gi cingi dhano.

²¹ Go ketho waŋe kwoŋ yo pa ji, aka neno woth pajo je.

²² Ongoye mudho m'oasere swa, ma jokidakana jonyalo pond'iye.

²³ Kole Were kikethi sawa riwan, ma kidho bongi go thumo riwan banja.

²⁴ Go turo jomeni ma k'odwaro tiendi jo, aka ketho joman i kabedo pajo.

²⁵ Riameno go oŋeyo tim pajo, aka mayo jo dhum gi wor to ŋinyo jo wor no won.

²⁶ Go miyo jo gir'acula ro kidakana pajo, kareno joman jonenanena.

²⁷ Kwoŋbedo joweyo luwo go, aka jokwero yo pere je.

²⁸ Jomiyo jocandi ywak ri Were, aka Were owinjo ywak pa joma nitie i litho.

²⁹ Ka Were omito liŋ, ŋa manyalo kipusa go, ka go opano waŋe, ŋa manyalo neno go, obedi dhano kosa nono?

³⁰ Dinyo ŋa m'ocero ji ma bu Were dhum, kosa ji ma jodiyo joman.

³¹ Nitie ŋat'otieko waco ri Were ni, “Atieko limo gir'acula, akilatimo reco kendo?

³² Fonjan gim'akuya, aka k'atieko timo reco, akilamedere timo.”

³³ Paka nyo ipiemo gi gima Were timo, kwoŋbedo ipiemo gi go, riameno yero obedo aperin makiweno aparan, wac gim'iŋeyo.

³⁴ Joma niaŋ jolawaco ran, aka jorieko ma jowinjan jolawaco ni,

³⁵ “Yobu luwo gim'okuya, aka wac pere ongoye rieko.”

³⁶ Kabedi inyalo temo Yobu kiri i cowe, ilaneno ni go luwo paka jakidakana luwo.

³⁷ Go medo gwenyirok kwoŋ reco pere, go goyo adhoŋ i dier wan, aka medo wac kweth kwoŋ Were.