Yobu 33 - KITAWO MALEŊ Catholic

Elihu bwoko Yobu

¹ To mondo Yobu, winji luwo paran, aka winji wac paran je.

² Mondo winji, ayawo dhokan, aka ee, aluwo.

³ Waci paran obedo adieri ma wok i cunyan, aka dhokan luwo gim'oŋeyo.

⁴ Cuny pa Rwoth ocweyan, luya pa Jameni Je omiyan kwo.

⁵ Dwokan, k'inen inyalo, can wac perin ruwaŋan, aka cungi.

⁶ Neni, ruwaŋ Were warom, aka an bende ocweyan gi lowo.

⁷ Riameno ikir'ilworan, akilaloyin gi meni.

⁸ Adieri itieko luwo k'awinjo, ak'atieko winjo derino ma wac perin.

⁹ Iwaco ni, “Alony, aka angoye gikibenga, abu banja aka angoye gi reco.

¹⁰ To Were nwaŋo atoŋa ma monjan, aka go teran paka jakwor pere.

¹¹ Go tweyo tiendan gi lijegere, aka neno yo paran je.”

¹² To winji Yobu, ikitire, aka aladwokin. Were dwoŋ loyo dhano moro je.

¹³ Raŋo ipiemo gi Were, gi waco ni go kidwoki kigeŋisa mawan?

¹⁴ Were luwo i nger acel, kodi madirio, kada ngoye ŋata niaŋ.

¹⁵ Bedo i lek, i menyirok ma wor, ka nindo mapek okwalo ji, kareno jonur i kanindo pajo,

¹⁶ go yawo ithi jo, aka bwoko jo gi pir.

¹⁷ Were luwo ma miyo jo weyo tim pajo marac, kodi geŋo jo kwoŋ noro.

¹⁸ Go botho adundo pajo ka jokidho tho, kodi kwo pajo rerok g'abor.

¹⁹ Were tiro ji gi litho i kanindo pajo, kodi mwodirok i cokin pajo.

²⁰ Gime miyo cuny jo cile kwoŋ cemo, kiri cemo ma jomaro swa.

²¹ Delkwoŋ jo lokere mamok ma kinen, aka cokin pajo m'oyido cango kinen gule woko.

²² Adundo pajo core cegin gi tho, aka kwo pajo core cegin gi jono ma jokelo tho.

²³ Kabedi nwaŋere rijo acel kwoŋ jomalaika, japido, acel kwoŋ jomalaika ganin, ŋata tuco tiro pa dhano.

²⁴ Malaika dinyo owaco i wor ni, “Both win go kadho i piny pa jom'otho, atieko nwaŋo cul ma botho go.

²⁵ Delkwoŋe lalokere mafoth, aka go labedo matek kendo.

²⁶ Kenyo go lakwayo, to Were dwoko, go lalamo Were gi kisangala, aka Were laculo go ri tiro pere.”

²⁷ Ŋato lawaco ri joman ni, “Atimo reco, aka aweyo timo gim'otire, t'akilimo gir'acula.

²⁸ Were obotho adundo paran kwoŋ tho, aka fodi aneno lero.”

²⁹ Adieri Were timo gigipiny me je, dirio kosa didek gi ji,

³⁰ ma botho adundo pajo tho, ŋey jowoneni lero ma kwo.

³¹ Awi Yobu, ciki ithin maber, aka winjan, liŋ, aka alaluwo.

³² To k'inen initie gi g'irawaca dwokan, luw, kwoŋbedo alayeyo ni itire.

³³ To ka be, winjan, liŋ, aka alafonjin rieko.