Yobu 32 - KITAWO MALEŊ Catholic

Elihu bwoko merin pa Yobu 32:1—37:24

¹ Yobu owaco ni go ongoye gi banja i neno pere, riameno cwo adek no joweyo dwoko go.

² To Elihu wod Barakel janono pa Buzi, ma wok peco pa Ram omako nge swa, kwoŋbedo Yobu owaco ni go otire, makiweno Were.

³ Elihu omako nge kiri gi merin pa Yobu adek kwoŋbedo jok'onyalo dwoko Yobu maber, makada nende oyido jotieko waco ni Yobu okom.

⁴ Elihu oyido kuro luwo gi Yobu, kwoŋbedo go oyido thin kwoŋ jo.

⁵ To munyo Elihu oneno ni oyido ongoye radwok maber i wac m'owok i dhok cwo adek no, go omako nge swa.

⁶ Elihu ocako luwo ka waco ama, Athin ran kwoŋ win, aka witegino loyan, riameno oyido alworo waco riwin paro paran.

⁷ Awaco ni, weyi jom'otegino jowoluwi, aka weyi jowofonji rieko.

⁸ To adieri obedo cuny pa Were Majameni Je, ma bino bongi ji to miyo jo rieko.

⁹ K'obedo ni tegino ama miyo ji rieko, kosa miyo jo niaŋ gim'otire.

¹⁰ Riameno awaco ni, winjan win, aka an bende alawaco gim'aŋeyo.

¹¹ Abedo moth swa kareno awinjo wac mewin, apima niaŋ mewin kareno widwaro gir'awaca.

¹² Aciko ithan swa riwin, to ongoye kwoŋ win ŋat'opusa Yobu, ongoye ŋat'odwoko wac pere.

¹³ Kucel wikiri wiwaci ni, witieko nwaŋo rieko, Were ripo dwoko Yobu, kwoŋbedo win widhiere.

¹⁴ Yobu oyido kiluw kodan, to gi win, to dinyo akidwoko go paka win.

¹⁵ Jongoye gi gima jowaci, ongoye gima jonyalo dwoko.

¹⁶ Anomedere kuro, kareno jongoye gi gima jowaci? Anocungi ka munyo jongoye gi radwok?

¹⁷ An bende alamiyo radwok paran, alawaco gim'aŋeyo.

¹⁸ Athothi gi gim'anowaci, aka akinyali bedo liŋ.

¹⁹ K'aweyo m'akiluwo, dwondan nyalo bare paka pien vini manyen.

²⁰ Weyi aluw aka nyaka aywe, aripo ŋamo dhokan ŋey anyal dwoko.

²¹ Akilabedo nyakucel, aka ak'owondere ri dhano.

²² Kole akuya wondirok, kwoŋbedo Jacwec paran nyalo reyan woko.