Yobu 30 - KITAWO MALEŊ Catholic

¹ To onyo pama ji ma jothindho ran jonyeran, ji ma bacere pajo oyido akinyali kiri yeyo jo kuro rombo paran.

² Magowa aŋo ma dinyo alimo wok kwoŋ meni pajo? Meni pajo je oyido orumo.

³ Kwoŋbedo candi gi kec ma wor i thim, jonyamo lowo m'othwo gi thombin.

⁴ Joŋweto ayuyu i dudi to jocamo, kodi fuc raywe ma miyo jo lietho.

⁵ Iriemo woko jo i dier ji, ji jokoko rijo paŋini jakwo.

⁶ Jobedo i milelo, i buce m'okunyere i lowo, kodi i telin.

⁷ Johola i dier dudi, aka jowura kanyacel i tiendi kudhin.

⁸ Lwak ji ma bukony, m'ongoye ŋat'oŋeyo jo, oriem woko jo i lowo gi kiboko.

⁹ Onyo pama jonyoma an i wer, abedo gir'awaca rijo.

¹⁰ Joŋisa an, aka jobedo bor kodan, aka jokigal gi ŋulo law ruwaŋan.

¹¹ Kwoŋbedo Were olokan manyap aka m'ongoye kony, jowire kwoŋan gi nge pajo je.

¹² Yu racuc paran, lwak jomonjan, jomiyan ringo ka joyiko ran yo ma rerok.

¹³ Jocego ran royo ma ringo, aka jotemo reyan woko, t'ongoye ŋat'ocieri jo.

¹⁴ Jonyule paka jolweny jonyule gi hoŋ madwoŋ, aka joriewere kwoŋan.

¹⁵ Lworo opodho kwoŋan abwap, aka dwoŋ paran ware woko paka koyo, bero paran rere woko paka pondeponde.

¹⁶ Onyo pama kwo paran wisawisa, aka ndelo ma teko orundan.

¹⁷ Cokin paran je mwodan, aka litho ma raman kikwe.

¹⁸ Were makan gi kitogi paran, aka deyan gi nangin paran.

¹⁹ Go witan i cwodho, aka atieko lokere fukefuke gi buru.

²⁰ Aywak ri kony, to ikidwokan, atieko cungere, to ikidewo kwoŋan.

²¹ Iteran gi gwayo, aka icandan gi cingin ma dimeni.

²² Iweyo koyo tiŋan woko, aka iwitan iy'asur mager.

²³ Aŋeyo ni iteran tho, i kabedo ma kisi dhano ripo kadh'iye.

²⁴ Adieri ongoye ŋata nyalo monjo dhano ma rere woko, ka ywak i hongo ma teko.

²⁵ Kole an aywak gi ji ma jonitie i teko, aka awinjo litho ri jocandi.

²⁶ To munyo arango bero, teko obino, munyo akuro lero, to mudho bino.

²⁷ Cunyan ule swa ma kikwe, aka teko podho ran radhik.

²⁸ Awotho i mudho, m'ongoye waŋceŋ, atieko cungo i dier lwak ywak ri kony.

²⁹ Atieko lokere omin ogwaŋe madudi, kodi mere pa mayin.

³⁰ Pien delkwoŋan ocido, aka cokin paran waŋ gi lietho.

³¹ Tongol paran onyo wodho wer ma rem, aka milowe paran wodho wer ma ywak.