Yobu 3 - KITAWO MALEŊ Catholic

Kigeŋisa pa Yobu ri Were

¹ Rumacen Yobu oyawo dhoke aka okwoŋo ndelo m'onywol'iye go.

² Yobu owaco ni,

³ Weyi ndelo m'anywol'iye worere, gi wor m'ogaman'iye i ici!

⁴ Weyi ndelo no wobedi mudho, weyi Were ma malo okir wodew kwoŋe, kosa lero okir woliel'iye.

⁵ Weyi ndelo no wobedi ndelo ma kumo gi mudho mapek, weyi pondeponde woum, aka colo wobwoki.

⁶ Weyi mudho mapek worey woko wor no, okir okwan kwoŋ ndelo ma oro, kosa kwoŋ ndelo ma dwe.

⁷ Ey weyi ndelo no worere, aka wongoy'iye kisangala.

⁸ Weyi jono ma jokwoŋo Nam jowokwoŋ, jono ma jondijo ma ico Leviathan.

⁹ Weyi micalin ma keko mere jokiri jowoliel, aka okir obedi gi geno ma lero.

¹⁰ Kwoŋi wor no kwoŋbedo omiyan anywole, to thangan ri teko gi rem.

¹¹ Kabedi oyido atho ran i iy mama, kosa bedi oyido atho tekin itieko colan.

¹² Raŋo mama otiŋan i tiende, kosa omiyan dhoth?

¹³ Dinyo pama ariere ran piny liŋ, dinyo pama aywomere ran inindo;

¹⁴ kanyacel gi kerin kodi jodhum ma piny, ma jogeto kendo gundin rijo wegi.

¹⁵ Kosa dinyo pama anindo kanyacel gi wot kerin, ma jopoŋo udi pajo gi zahabu kodi feza.

¹⁶ Raŋo k'oyikan paka ici m'opodho woko, paka nyathi ma k'oneno lero?

¹⁷ Koro jokidakana joweyo candirok, aka jom'ol joywomere.

¹⁸ Kenyo jotwec jobedo i siem kanyacel, jokiwinji dwondi jakur jiera.

¹⁹ Jomathindho gi jomadongo jonitie koro, aka ŋecin jogonyere kwoŋ jodongo pajo.

²⁰ Raŋo imiyo lero ri ŋata nitie i kumo? Raŋo imiyo kwo ri ŋata nitie i rem?

²¹ Jokuro tho, to tho kibin, aka jodwaro tho loyo lim m'opanere.

²² Josiemere swa, aka josangala ka jotho.

²³ Raŋo imiyo lero ri ŋata yo pere opanere, ri dhano ma Were ocego yo pere?

²⁴ Kole ahamo kareno auco ayin, ikabedo pa cemo, aka ywak paran ma litho ule paka pi.

²⁵ Adieri gim'oyido alworo bino kwoŋan, aka gim'oyido miyan bwok otundo ran.

²⁶ Adieri kiyot ran, aka angoye i siem, angoye gi ywomirok, to teko bino.