Yobu 28 - KITAWO MALEŊ Catholic

Pako rieko

¹ Adieri nitie kware ma feza, gi ka thodho zahabu.

² Cuma iwodho wok i fukefuke, aka waya ilenyo wok i tele.

³ Joudo gike ma mudho, aka jodwaro lutho ma piny, jokunyo telin wok i mudho.

⁴ Joyawo dago i milelo kama ji jokibed'iye, kosa kama ji jokiwoth'iye. Jotweyo thondhe i pier gin aka joliero gine, kama jotiy'iye kakendi jo.

⁵ Cemo wok i lowo, kucel pendi piny no won, ikedho woko paka mac.

⁶ I telin ma piny nwaŋere tele gu manyabululu, aka i fukefuke mere nwaŋere zahabu.

⁷ Ongoye winyo ma camo riŋo m'oŋeyo royo ma kware, aka acut fodi jok'oneno.

⁸ Ogwaŋe mager fodi jok'odonj'iye, aka simbwor fodi k'otund'iye.

⁹ Jokunyo tele matek acingi, aka joredho gote gi tiendi gin.

¹⁰ Jokunyo ger i telin, aka jonwaŋo telin ma welo.

¹¹ Jokunyo cuka jotundo i waŋ malawin, aka jothango gim'opanere.

¹² To rieko nwaŋere kune? Walafonjere kune niaŋ?

¹³ Ji jokuya nger ma limo rieko, aka kinwaŋere i lowo pa jomakwo.

¹⁴ Lutho waco ni, “Ongoye i an.” Nam bende kwero ni, “Ongoye bongan.”

¹⁵ Rieko kinyew gi zahabu, kosa feza kicul welo mere.

¹⁶ Zahabu ma Ofir kirom gi cwe mere, aka thiwino ma welo kirom gine.

¹⁷ Zahabu kodi ndewiro kirom gine, kosa kinyal wilo ri thiwino m'otimi gi zahabu macil.

¹⁸ Cwe ma rieko dwoŋ loyo, telin m'oruwo rangi macol, matar kodi nyalando, telin ma pilin, aka welo mere kalo telin ma rangi m'obokere kodi ma nyalando.

¹⁹ Tele manyatongweno ma Ethopiya, kodi zahabu macil kirom gine.

²⁰ Onyo to, rieko wok kune? Wanyalo nwaŋo niaŋ kune?

²¹ Rieko opanere ruwaŋ kisi gima kwo, aka omuŋere ri winyin ma koyo.

²² Kiri tho gi rerok je jowaco ni, watieko winjo nyaka pokopoko.

²³ Were kende ama oŋeyo yo mere, aka go ama oŋeyo kabedo mere.

²⁴ Kole go ŋiyo gike ma piny, aka go neno kisi gima nitie i pendi polo.

²⁵ Munyo Were omiyo koyo derino mere, aka munyo Were opima dwoŋo ma nam,

²⁶ munyo Were oyero kama koth ocw'iye, kodi kama pondeponde ma mwoc koth oluw'iye,

²⁷ kenyo ama Were oneno rieko, aka otemo bero mere, to go yere gine.

²⁸ Were owaco ri dhano ni, “Adieri, lworo Were, meno obedo rieko, aka weyo raco obedo niaŋ.”