Yobu 24 - KITAWO MALEŊ Catholic

¹ Raŋo Were kikethi ndelo ma thumo banja? Raŋo ji ma jotiyo rigo jokilim tiro?

² Jokidakana jofudho kew ma lowo, jokwalo mwendi aka joriwo jo kanyacel g'apajo.

³ Jotero punde pa nyathi kic, aka jomako dhiaŋ pa citho cuka culo banja.

⁴ Jodhiro joma nyap i thengi royo, aka joromo jocandi ringo jowopondi.

⁵ Jocale punde ma thim, ma jokadho i timo tic pajo, ma dwaro cemo i thim m'othwo, ma pidho nyithindhi jo.

⁶ Jokeco cemo i ndelo ma k'obedo apajo, aka jofono nyingi vini i ndelo vini pa jokidakana.

⁷ Jonindo wor gipi kinyoro, m'ongoye nanga, aka jongoye gi gium i ŋico.

⁸ Jodhiek gi thoyo ma wi gote, aka jomoko i tele ro mito bwok.

⁹ Ji joywayo nyathi kic wok i thundho, aka jomako nyithindho pa jocandi ri banja.

¹⁰ To jocandi jobedo kinyoro, m'ongoye nanga, aka joriyo kec kareno jokeco ŋano.

¹¹ Jobiyo mo oliv i bol pajo, aka jodhiŋo vini, gi riyo ma neko jo.

¹² Joma nitie i litho gi ma jotho joywak i tindi madwoŋ ri kony, kucel Were kidew kwoŋ kwayo pajo.

¹³ Nitie jono ma jokwero lero, ma jokiniaŋ yo mere, aka jokiluwi yo mere.

¹⁴ Janek ay othieno, neko jacandi gi ŋata bu gimoro, aka wor cal jakwo.

¹⁵ Waŋ jacot bende kuro colo, ka jowaco ni ongoye ŋata laneno jo, aka go rukere matek niaŋ kwoŋe.

¹⁶ Jokwo jokunyo udi wor, aka odieceŋ jopondo, johepa lero.

¹⁷ Mudho mapek cal rijo odikin, kole jobedo mere gi lworo ma mudho.

Zofar luwo

¹⁸ Jokidakana jomol ma dwir wi pi, Were okwoŋo lowo pajo, aka jokikidhi tic i ndelo vini pajo.

¹⁹ Paka milengela gi lietho cwiyo woko pi tor, apaka tho reyo woko jono ma jotieko timo reco.

²⁰ Kiri yok jo kipoy jo, to jomiti ri kudin. Ki poyi jo kende, aka ameno apaka kidakana tur paka yath.

²¹ Jomiyo dhako ma bu nyathi litho, aka jocando citho.

²² Kucel Were reyo woko jomwamba gi meni pere, ka go onyutho tim pere, jokidakana jotho.

²³ Go nyalo miyo jo bedo i siem, to thielo jo, to waŋe kingoye kwoŋ jo hongo je.

²⁴ Jakidakana yindira ma hongo macek, to rwenyo woko, joner to jotare paka doy, itoŋo jo paka wic ŋano.

²⁵ Ka k'obedo ameno, ŋa ma laridho ni atwodo, to nyutho ni gim'awaco k'obedo adieri.