Yobu 2 - KITAWO MALEŊ Catholic

Sitan temo Yobu kendo

¹ Ndelo acel jomalaika jobino ruwaŋ Rwoth, aka jakwor Sitan bende obino i dier jo ruwaŋ Rwoth.

² Rwoth openjo Sitan ni, “Iwok yukune?” Sitan odwoko ni, “Awok thembo ka gi kaca, kilera i piny.”

³ Rwoth openjo jakwor Sitan ni, “Iliewo ye ŋeca paran Yobu? Ongoye ŋata cale gi go i piny, go ongoye g'apuse aka obedo jacwo m'otire ma lworo Were aka kitim reco. Go fodi ocwire i timo gim'otire makada nende itemo kwinyan kwoŋ go, reyo woko go m'ongoye atoŋa.”

⁴ Sitan odwoko Rwoth ni, “Del ri del! Dhano miyo kisi gima go nitie gine ŋey wonyali kwo.

⁵ To riey cingin igey cokin pere gi delkwoŋe, aka Yobu lakwoŋin ruwaŋin.”

⁶ Rwoth owaco ri Sitan ni, “Meno ber go nitie i cingin, t'ikir'igey kwo pere.”

⁷ Kenyo Sitan oeye woko ruwaŋ Rwoth, aka otula kwoŋ Yobu g'adholin wok i par tiende tundo i tipin wiye.

⁸ Yobu okadho to bedo i buru aka okwanyo thago to cako gwaro gine delkwoŋe.

⁹ Kenyo dhako pere openjo go ni, “Fodi icwire timo gim'otire? Kwoŋ Were, aka itho.”

¹⁰ To Yobu odwoko ni, “Iluwo paka mon mamiŋ joluwo. Walajolo nyaka bero kende wok i cingi Were m'ongoye raco?” I gime je Yobu k'otimo reco i luwo pere.

Merin pa Yobu jobino

¹¹ Merin pa Yobu adek jowinjo kwoŋ teko me je m'oyido opodho kwoŋ go, aka kisi dhano owok peco pere bino. Merin me jobedo Elifaz ma wok i tindi madwoŋ Teman, Bilidad ma wok i piny Suha, kodi Zofar ma wok i piny Namath. Joromo kanyacel kadho kweyo cuny gi yomo cuny Yobu.

¹² Munyo joneno go gi bor, jok'onyalo niaŋ kwoŋe, aka jotiŋo dwondi gin malo to joywak, joyeco nangin pajo aka jobolo fukefuke i koyo i wi jo.

¹³ Jobedo piny i lowo gi go odieceŋ abirio gi wor abirio, aka ongoye ŋat'oluwo wac rigo, kwoŋbedo joneno ni candirok pere oyido dwoŋ swa.