Yobu 18 - KITAWO MALEŊ Catholic

Bilidad Luwo: Were miyo jokidakana gir'acula

¹ Kenyo Bilidad ma wok i Suha odwoko ama,

² Iladwaro gir'awaca kiri keraŋo Yobu? Liŋ luwo, aka walaluwo.

³ Raŋo ikwano wan kwoŋ dhok, aka itero wan paka ji mamiŋ?

⁴ In won imiyere litho ro nge perin. Dhano wowey piny me ro in? Kosa Were lakwanyo woko gote ro in?

⁵ Adieri ilaneko woko lero pa jokidakana, aka mac pajo k'oliel.

⁶ Lero lokere mudho i wema pajo, aka ineko woko tala i wi jo.

⁷ Inyapo woko tiendi jo matek, aka jothuyere gi can pajo wegi.

⁸ Tiendi gin wegi tero jo i bwo, aka jopodho i bur.

⁹ Mitego por iy'odondo pajo, aka moko gi jo.

¹⁰ Iciko rijo thol t'iyiko i lowo, iciko rijo thol i royo.

¹¹ Teko bwoko jo i kisi thenge, aka riemo jo ka tiendi jo.

¹² Kec omayo jo meni, aka teko kuro miyo jo podho.

¹³ Two halo woko pien delkwoŋ jo, aka ŋundo woko lwet jo.

¹⁴ Iyeco woko jo i wema m'oyido jogeno, aka iriyo jo romo gi Kere Tho.

¹⁵ Ongoye gima doŋ i wemin pajo, aka ikir'iye kares ma kwanyo woko two.

¹⁶ Fuc pajo thwo woko piny i lowo, aka jangi jo ner woko.

¹⁷ Ki poyi jo kendo i piny, aka nyingi jo rere woko i royo.

¹⁸ Ibolo jo wok i lero kadho i mudho, aka iriemo woko jo i piny.

¹⁹ Jongoye gi nyithindho kosa nyikway jo i dier ji pajo, aka ongoye ŋat'obothi kama cango jobed'iye.

²⁰ Ji ma yupodho ceŋ jodhier kwoŋ podho pajo, aka ji ma yuwok ceŋ jobwok gi kirin.

²¹ Adieri meno a kabedo pa jokidakana, meno a gike pa ji ma jokuya Were.