Yobu 16 - KITAWO MALEŊ Catholic

Yobu medo ridho ni go bubanja

¹ Kenyo Yobu odwoko ama,

² Atieko winjo nger gigipiny no kweth, yomo cuny ma wimiyo kelo nyaka litho.

³ Wac koyo ongoye gi gike? Kosa aŋo ma ramo win ma wilamedo luwo?

⁴ An bende dinyo anyalo luwo paka win, kabedi oyido gimoro acel timere riwin. Dinyo acoko wac kwoŋ win, aka dinyo ayengo wiyan riwin.

⁵ Dinyo adiyo cuny win gi wac, aka dinyo akweyo cuny win gi dhokan.

⁶ Makada nende aluw, litho paran kikwe, aka makada nende aliŋ, je rom.

⁷ Adieri Were, itieko tiyan woko, aka ireyo woko peco paran je.

⁸ Itieko makan, aka moki paran, nyutho ji ni abedo jabanja.

⁹ Go otieko yecan i nge pere, aka odakan, okayo ran lake, jakwor paran obitho waŋe kwoŋan.

¹⁰ Ji joŋiyan gi dhok jo m'oŋamere, jopayo lemban gi yet, aka joriwere karan.

¹¹ Were oweyan ri ji ma bu Were, aka obolan ri jokidakana.

¹² An oyido anitie i siem, to go oturan woko, go omakan gi dwondan, aka oŋinyan woko, to comere kodan.

¹³ Go bayo aserin wok i thenge je, aserin ma kedho rogan aka miyo litho, m'ongoye nyutho wor; aka oyo woko kedhino paran piny i lowo.

¹⁴ Go miyan litho radhik, aka rure kwoŋan paka jalweny.

¹⁵ Atieko kwoyo kutiya kwoŋan, aka abedo piny i fukefuke m'aloc.

¹⁶ Waŋan obokere ro ywak, aka onyo obore to cor.

¹⁷ Makada nende cingan kitim gir'akaka, aka kwayo paran olony.

¹⁸ Awi piny, ikir'ium remo paran, aka ywak paran womedere.

¹⁹ Ma kiri gi pama, adieri, jakony paran nitie i polo, ŋata cungo ran to thielan.

²⁰ Merin paran jonyeran, t'aoyo pigi waŋan ri Were.

²¹ Kabedi dhano moro oyido nyalo ywak ran ye gi Were, paka dhano timo ri mere pere.

²² Oro paran rumo, alakadho kama akiladwoko kendo.