Yobu 15 - KITAWO MALEŊ Catholic

Kiliesa mar'ario 15:1—21:34 Elifaz luwo: Yobu cayo dini

¹ Kenyo Elifaz ma wok i Teman odwoko ni,

² Ŋatariek kiripi miyo radwok gi wac nono, kosa koyo nono.

³ Ongoye ŋatariek manyalo luwo paka in, kosa cwakirok gi wac m'ongoye.

⁴ To isewo lworo Were, aka igeŋo ji ketho paro pajo kwoŋ Were.

⁵ Kidakana perin neno i gim'iwaco, aka lewin mit paka jobanirok.

⁶ Dhokin won tweyin, makiweno an, aka lewin segeya in.

⁷ Iŋat'ibedo dhano marapena nywolirok? Itelo bedo mafodi k'ocwey gote?

⁸ Itieko ye winjo kwoŋ pido pa Were? In kendin iŋat'initie gi rieko?

⁹ Aŋo m'iŋeyo, ma wan wakuya? Aŋo m'itieko niaŋ kwoŋe m'omuŋere riwan?

¹⁰ Jolwar gi jom'oti jonitie i dier wan, ma joloyo benin gi oro.

¹¹ Kweyo cuny pa Were kiromin? Kosa wac pere kimwol rin?

¹² Raŋo cunyin wondin? Raŋo imoro waŋin riwan.

¹³ Ilamako nge gi Were, gi luwo nger wac no?

¹⁴ Nitie dhano manyalo bedo m'olony? Kosa dhano ma dhako onywolo bende nyalo bedo m'otire?

¹⁵ Me, kwoŋbedo go kigen kiri jomalaika pere, aka jokileŋ ruwaŋ go.

¹⁶ To kosa ji ma jomadho reco paŋini jomadho pi, ey, jokitim adieri, aka jobu kony.

¹⁷ Onyo winji, Yobu, gima an aŋeyo, gim'atieko neno, atuco.

¹⁸ Me gima jomariek jotieko waco, aka kwarere pajo jok'omuŋo.

¹⁹ Jo kende ama omiy jo lowo no, aka ongoye japath m'obedo i dier jo.

²⁰ Jakidakana candere i litho i kwo pere je, ma oro je ma jodiyo joman.

²¹ Koko ma bwok nitie i ithi jo, jokinyaga jomonjo jo i hongo ma joparo ni jonitie i siem.

²² Jongoye gi geno ma wok i mudho, kwoŋbedo abor bino wok kamoro neko jo.

²³ Jolera ri cemo ka jopenjere ni, nikune? Joŋeyo ni ndelo ma mudho orikere.

²⁴ Litho gi paro bwoko jo, jokengila jo paka kere m'oyikere lweny.

²⁵ Kole jowito adol kwoŋ Were, aka jocayo Jameni Je.

²⁶ Jonoro aka jogwenyirok, jomako kwot pajo gi wictek, aka joredo lweny gi Were.

²⁷ Jopoŋ bor nono, gi iy jo m'obomere gi bor.

²⁸ Jolanindo i tindin madongo m'ojwangi, i udi m'ongoye ŋata bed'iye, i udi ma ripo lokirok kidhur gundin.

²⁹ Jok'oŋaŋ aka lim pajo k'oyindira, kiri bathi jo je larere.

³⁰ Jokilakwale kwoŋ mudho, mac lawaŋo jangi jo, aka koyo lakudho woko jo.

³¹ Jokiri jowokethi geno i gima bukony, kwoŋbedo meno labedo kemba pajo.

³² Jolarere mafodi hongo pajo k'otundo, aka jolathwo paka jangi yath.

³³ Jolabedo paka yath vini ma oyo olemo ma fodi numu, kosa paka yath oliv ma oyo woko thiwe.

³⁴ Kole ji ma bu Were jongoye gi nyikway jo, aka mac reyo woko wema pa jocam nyew.

³⁵ Jo ama joparo marac to jokelo teko, aka cuny jo opoŋ twodo.