Yobu 12 - KITAWO MALEŊ Catholic

Radwok pa Yobu: Alokere ginyero

¹ Kenyo Yobu odwoko ni

² Ongoye kiganagana ni wibedo ji, aka wilatho gi rieko mewin.

³ To an bende anitie gi cunyan paka win, aka akisisiri riwin.

⁴ Abedo ginyero ri merin paran, An, m'alwoŋo Were to dwokan, jacwo ma timo gim'otire aka ongoye g'apuse, onyo alokere ginyero.

⁵ Ji ma jongoye gi teko jocayo ji ma jopodho i teko, jokelo teko ri ŋata cegin podho.

⁶ Jokinyaga jonitie i siem, aka ji ma jomiyo Were nge jongoye gi teko, makada nende were pajo obedo meni ma cingi jo won.

⁷ To mondo penji ogwaŋe, aka jolafonjin, kosa winyin ma koyo, aka jolawaco rin.

⁸ Kosa geŋisa ri yen ma piny, aka jolafonjin, kosa rec ma nam, aka jolatuco rin.

⁹ Ŋa kwoŋ jome je m'okuya, ni cingi Rwoth otieko timo gime.

¹⁰ Kwo pa kisi gimoro je makwo nitie i cingi go, kanyacel gi luya pa dhano.

¹¹ Ithi jo kipima wac, paka lew jo bilo mito ma cemo?

¹² Rieko nitie bongi jom'otegino, aka niaŋ nitie i tiyo.

¹³ Rieko gi meni nitie bongi Were, aka mic rieko gi niaŋ nitie bongi go.

¹⁴ Ka go oturo piny, ongoye ŋata nyalo geto kendo, aka ka go ocego dhano, ongoye ŋata nyalo yawo.

¹⁵ Ka go omako koth, to milengela bino, aka ka go ogonyo koth, to piny dhiek.

¹⁶ Meni gi rieko nitie bongi Were, jotwodo gi ji m'iwondo je jobedo apere.

¹⁷ Go riemo woko jomic rieko gi par tiendi jo, aka miŋo jothum banja.

¹⁸ Go mayo kerin dhum, aka tweyo i pier jo kutiya.

¹⁹ Go riemo woko jocway ri Were i wi migam gi par tiendi jo, aka mako adhum pa jomeni.

²⁰ Go mwono dhok ji m'igeno jo luwo, aka kwanyo woko rieko pa jodongo.

²¹ Go cayo jodhum, aka kelo meni pa jomatek i gike.

²² Go wodho nyaliŋliŋ kamaler, aka loko mudho maler.

²³ Go loko nonin madwoŋ, aka reyo woko jo, go loko nonin malac, aka telo jo.

²⁴ Go mayo jotel ma piny niaŋ, aka miyo jo rwenyo i nywowirok.

²⁵ Jokindakinda i mudho m'ongoye lero, aka miyo jo kitangatanga paka jamero.