Yeremia 6 - KITAWO MALEŊ Catholic

Jokwor jothoko Yerusalem

¹ Ŋwec wipondi, awi ji pa Benyamin, wok win i dier Yerusalem! Kudhi win gwara i Tekowa, aka witiŋ malo ranyuth i wi Beth Hakerem; kole teko bino wok yumalo, kodi rerok madwoŋ.

² Atieko kipima Yerusalem kodi lum maŋon tektek.

³ Jokwath jolakelo mwendi pajo iye. Jolajengo kayindere pajo thoko go, jolakwayo mwendi, kisi dhano iy'adec pere.

⁴ Jobino waco ni, “Yikere ma lweny gi Yerusalem, ay win, weyi wamonji go sawa aucel m'odieceŋ!” “Amien riwan, kole piny oyutho, aka tipo m'othieno onyo lokere mabor!”

⁵ “Ay win, weyi wamonji win go wor, to wareyo woko cel mere je m'ogoy!”

⁶ Kole Rwoth pa lwak jolweny waco ama: “Toŋ woko yen pere; witinda bibiro kwoŋ Yerusalem. Me obedo tindi madwoŋ ma ripo amiya gir'acula; ongoye gimoro i iye kwanyowoko adica.

⁷ Paka jwom kuro pi mere ma k'onyekere, ameno apaka Yerusalem kuro kidakana pere ma k'onyekere. Gwayo kodi rerok jowinjere i iye; two kodi adholin a gigipiny m'aneno.

⁸ Gwokere, awi Yerusalem, rupiri anyalo wire kwoŋin i jok, t'ajwangin paka piny ma kibed'iye.”

Isiraili ma jagwenyirok

⁹ Rwoth Were pa lwak jolweny waco ama: “Lweri m'ikibudho paka yath vini, joma joboth ma jok'otho ma Isiraili, paka jacoki nyingi yath, tel cingin kendo i jange.

¹⁰ Anoluw gi ŋa t'amiyo gwokirok, ŋey jowonyal winjo? Neni, ithi jo ocule, jokinyal winjo. Wac pa Rwoth rijo obedo gima jocayo; jokisangala gine.

¹¹ To an ayeŋ kodi keme pa Rwoth; aloc gi tiŋo.” Rwoth owaco ran ni, “Konji nge paran kwoŋ nyithindho i royo, kodi kwoŋ coko nyithindho bende; cwo gi mon je ilakadho gi jo, jom'otegino kodi jom'oti.

¹² Udi pajo ilamiyo joman, kanyacel gi ndelin pajo kodi mon pajo; kole alatelo cingan kwoŋ joma bedo i piny.

¹³ Kole wok kwoŋ jomathindho tundo i jomadongo kwoŋ jo, kisi dhano obedo jaworo ri magowa ma k'otire; aka wok i jatuci wac Were tundo i jacway ri Were i migam, kisi dhano je obedo jabanirok.

¹⁴ Jomado adholin pa ji paran kicar, ka jowaco ni, ‘Siem, siem.’ To kucel siem ongoye.

¹⁵ Jotimo giwickwot, jotimo amien; kucel wiy jo k'okwoti, jok'oŋeyo nger ma bedo giwickwot. Riameno jolapodho i dier jono ma jopodho; i hongo m'abino miy'iye jo gir'acula, alamayo jo dhum.” Rwoth waco.

Isiraili kwero yo pa Were

¹⁶ Rwoth waco ama: “Cungi win i dhoyin, aka winen, penji win yo macene, kama royo maber nitie i iye; wiwoth'iye, aka winwaŋ ywomirok ri cuny win.” To jowaco ni, “Wak'owoth'iye.”

¹⁷ Aketho bende jokur riwin: Winji win dwondi gwara! To jowaco ni, “Wak'owinji.”

¹⁸ Riameno winji win, awi nonin, aka wiŋey, awi cokirok, gima latimere rijo.

¹⁹ Winji, awi piny, akidho kelo kidamba kwoŋ ji me, gima wok i can pajo, rupiri jokwero winjo wac paran; aka paka ri fonji paran, jotieko kwero woko.

²⁰ Buban ma wok Seba konyan nedi, kosa niaŋ mamit ma wok i piny mabor? Mic mewin awaŋa kijol, aka cowirok mewin bende kisangala an.

²¹ Riameno Rwoth waco ama: Neni, aketho ruwaŋ ji me amien ma jolakitangatanga i wiye; jonywol kodi nyithindho kanyacel, jager kodi mere jolakisika woko.

Monji ma wok yumalo

²² Rwoth waco ama: “Neni, ji jobino wok i piny ma yumalo, nono madwoŋ jotukere wok iy'adec mabor ma piny.

²³ Jomidho asere kodi toŋ, joger aka jongoye gi wor, derino pajo cal kodi nam ma mor; jogweyo kayinin. Joyikere paka jolweny apondi ri kama lweny ogunj'iye; lweny kodin, awi Yerusalem!”

²⁴ “Watieko winjo wac manyen ma mako jo, meni oloyo wan; lworo omako wan, nger litho pa dhako ma nywol.

²⁵ Wikiri wikidhi i ndelo, kosa wiwoth i royo; rupiri jakwor nitie g'abor, lworo nitie kisi thenge.”

²⁶ Awi ji paran, ruk win kutiya, aka wiŋindere i buru; ywak win paka wiywako nyathi acel g'acel, ywak win gi geregere swa; kole jarey ji labino, abwap kwoŋ wan.

²⁷ Atieko lokin jatemo kodi cel i dier ji paran ŋey inyal ŋeyo t'itemo kula pajo.

²⁸ Joje jobedo joma wiy gin tek ma jogwenyirok, jolera aka joluwere kicar; wiy jo tek paka ywel kodi nyweny, joje jotimo tim ma nyew.

²⁹ Mac m'odheth liel m'ogaga, nywenye ma jongoye kony mac camo jo; bedo gipilok medo rudo jo, kwoŋbedo jokidakana kikwany jo woko.

³⁰ Ilwoŋo jo ni “Feza m'okwer.” Kole Rwoth otieko kwero jo.