Yeremia 52 - KITAWO MALEŊ Catholic

Podho pa Yerusalem

¹ Zedekia oyido jaoro piero ario g'acel munyo olokere kere ma Yuda, to dhumo Yerusalem ma oro apar g'acel. Yok mere oyido ilwoŋo ni Hamutal, nyar Yeremia m'obedo i tindi madwoŋ ma Libina.

² Kere Zedekia otimo reco ruwaŋ Rwoth, i nger acel paka Yehoyakim oyido otimo.

³ Adieri, Rwoth omako nge swa gi ji ma Yerusalem kodi Yuda m'omiyo go oriemo jo woko ruwaŋe. Zedekia ogwenyere kwoŋ Kere Nebukadineza ma Babilon.

⁴ Riameno Nebukadineza obino gi jolweny pere je to jomonjo Yerusalem k'apar i dwe mar'apar i oro mar'abuŋwen ma dhum pa Zedekia. Jojengo kambi pajo woko ma tindi madwoŋ, to jogoyo cel thoko.

⁵ Ameno othoki tindi Yerusalem cuka tundo oro mar'apar g'acel ma dhum pa Zedekia.

⁶ Ka ndelo abuŋwen ma dwe mar'aŋwen i oro acel no won, munyo kec gway swa ji oyido jongoye gi gir'acama,

⁷ t'ituro woko kor udi ma tindi madwoŋ. Joluwo gi royo ma kidho i ndelo pa kere, joluwo gi waŋkac ma riwo kor udi ario, to jokwale gi i royo ma kidho Milelo ma Yordan.

⁸ To jolweny ma Babilon joriemo Kere Zedekia, jomako go i kam'obipere macegin gi Yeriko, to jolweny pere je jokedhere, to joweyo go.

⁹ Kenyo to jomako kere, to jokelo go bongi Kere Nebukadineza ma Babilon i Ribila i piny pajo Hamath, to Kere Nebukadineza thumo ri Zedekia banja.

¹⁰ Kere Nebukadineza oneko wot Zedekia munyo Zedekia neno ama, to neko bende jotel ma Yuda i Ribila.

¹¹ Ogolo woko waŋ Zedekia, to tweyo go gi lijegere, to kere ma Babilon tero go Babilon. Oketho Zedekia i katwec cuka tundo ndelo ma tho pere.

Reyo Ot pa Were

¹² K'apar i dwe mar'abic i oro mar'apar g'abuŋwen ma dhum pa Kere Nebukadineza ma Babilon, Nebuzaradan, jamic rieko pa kere kodi jamituka pa jolweny pere, jodonjo i Yerusalem.

¹³ Nebuzaradan owaŋo Ot pa Rwoth, cel pa kere, kodi udi pa ji madongo je ma Yerusalem;

¹⁴ to jolweny pere joredho piny kor udi ma tindi madwoŋ.

¹⁵ Kenyo to Nebuzaradan kadho gi ji m'oyido jodoŋ i tindi madwoŋ i Babilon, jotic ma jondijo ma jodoŋ, kodi jono m'oyido jowiro bongi Jobabilon.

¹⁶ To Nebuzaradan oweyo i Yuda ji moro ma jocandi, jom'oyido jongoye gi lim moro, to ketho jo tic i ndelo vini kodi i ndelin.

¹⁷ Jobabilon joturo mathindho thindho sirin ma ywel m'oyido nitie i Ot pa Rwoth madalin kodi pipin ma ywel, to jotero ywel je i Babilon.

¹⁸ Jokadho bende gi kitiyin, giketho buru m'ioro ma lonyo migam, gigipiny m'ioro ma dhiro talin madongo, bakulere m'ioro ma jolo remo ma cowirok, bakulere m'ioro ma waŋo buban kodi gigipiny ma ywel je m'ioro ma timo tic i Ot pa Rwoth.

¹⁹ Jokadho gi kisi gimoro je m'otimi gi zahabu gi feza: Bakulere mathindho, wer, kalayere, degi, kacungo pa talin, kijikin kodi bakulere m'ioro ma konjo woko mic ma vini.

²⁰ Gigipiny ma ywel ma Kere Solomon oyido oyiko ri Ot pa Rwoth: Sirin ario, magalere, pipa acel kodi thwondhe apar g'ario ma jothielo; ywel ma gigipiny me oyido pek ma kipimere.

²¹ Paka ri sirin, ŋawirok pa siro acel oyido obedo mita 8 kodi mita 5.3 thoko. Nyweny oyido oŋamere aka nywol mere oyido obedo milimita 75.

²² I wiye oyido nitie ywel madwoŋ; ŋawirok pa acel oyido obedo mita 2.2 aka thoko iye je oyido obedo nywenye maŋon m'oriw jo kanyacel gi pomo, m'oyido otim joje gi ywel.

²³ I wi kisi siro acel m'oyik maŋon, oyido nitie je pomo 100 aka 96 kwoŋ jo oyido nenere wok piny.

Itero ji ma Yuda Babilon

²⁴ Medo kwoŋ meno, Nebuzaradan, jamituka, okadho kodi Seraya jacway ri Were madwoŋ, Zefania m'oyido luwo Seraya i dwoŋ, kodi jotel man madongo adek ma Ot pa Rwoth.

²⁵ Wok i tindi madwoŋ Nebuzaradan okadho kodi jatel m'oyido obedo jamituka pa jolweny, jomic rieko pa kere abirio m'oyido fodi jonitie i tindi madwoŋ, ŋata luwo kor jamituka, m'oyido obedo jandiko, kodi cwo 60 man madongo.

²⁶ Nebuzaradan otero jo ri kere ma Babilon, m'oyido nitie i tindi madwoŋ ma Ribila.

²⁷ Kere ma Babilon orwadho jo piny, to neko jo i Ribila i piny ma Hamath. Ameno to Yuda kadho i wiloka woko ma piny pere.

²⁸ Me a welo pa ji ma Nebukadineza otero paka jotwec i wiloka: I oro mar'abirio, Joyuda 3,023

²⁹ i oro mar'apar g'aboro ma dhum pa Nebukadineza go otero i wiloka wok Yerusalem ji 832

³⁰ i oro ma 23 ma dhum pa Nebukadineza, Nebuzaradan jamituka otero i wiloka ma Yuda ji 745. Ji je m'okadhi gi jo obedo 4,600.

Inyutho Yehoyakin wor i katwec

³¹ I oro ma 37 ma bedo i wiloka pa Kere Yehoyakin ma Yuda, i dwe mar'apar g'ario ka ndelo piero ario g'abic Kere Evilmerodak ma Babilon, i oro ma go ocak'iye dhum, go onyutho wor ri kere Yehoyakin ma Yuda to wodho go woko ma katwec.

³² Evilmerodak oluwo gine gi wor, to miyo go kabedo ma malo loyo kerin man je m'oyido go nitie gine i Babilon.

³³ Ameno to Yehoyakin ketho gicen nangin pere ma katwec, aka kisi ndelo ma kwo pere noknok go ocemo i meza pa kere.

³⁴ Kere Evilmerodak ma Babilon omiyo go pesa ma kwo kisi ndelo, tekin go oyido fodi kwo, tundo i ndelo ma tho pere.