Yeremia 51 - KITAWO MALEŊ Catholic

Thumo banja man ri Babilon

¹ Me apaka Rwoth waco: Akidho ico koyo ma reyo woko, kwoŋ Babilon, kodi ji ma jobed'iye.

² Aladhiro jopath i Babilon, aka jolayweyo go, to joweyo go m'othangere. Jolathoko go i kisi thenge, i ndelo ma teko.

³ Ongoye yeyo ŋata celo abor celo, kosa ruko gilweny pajo. Ongoye weyo yac pere, reyi woko win jolweny pere kicutho.

⁴ Jolalimo litho to jotho i piny Babilon, kodi i royin ma tindin madongo.

⁵ Were, Rwoth pa lwak jolweny, fodi k'ojwango Isiraili kodi Yuda, makada nende lowo pajo opoŋ reco, ruwaŋ Ŋataleŋ pa Isiraili.

⁶ Ngoye win woko i Babilon, kisi dhano wobothi kwo pere! Wikiri wirere ro reco pere, kwoŋbedo me hongo ma Rwoth cul'iye kwor kwoŋ Babilon, aka miyo go gir'acula ma ripo gine.

⁷ Babilon oyido cal kikopo ma zahabu i cingi Rwoth, m'amiyo piny gipi mer. Nonin jomadho vini mere, riameno jotimere paka joneko.

⁸ Babilon opodho abwap aka oŋinyere woko, ywak win rigo, keli win mo ri adhola pere, poyi go nyalo cango.

⁹ Watemo cango Babilon, to go k'onyalo cango. Jwangi win go, aka weyi kisi dhano kwoŋ wan, wodoki i piny pere won. Kole Were ma i polo am'omiyo go gir'acula, aka rerok pere owinjere bor.

¹⁰ Rwoth otieko miyo wan loyo, biye win watuci i Zayon, tic pa Rwoth Were mawan.

¹¹ Pak win aserin, yik win kwote mewin! Rwoth otieko guro cuny kerin ma Medes, kwoŋbedo atoŋa pere ri Babilon obedo ma reyo woko. Ameno apaka go laculo kwor ma reyo woko Ot pa Were.

¹² Tiŋi malo siro perin kwoŋ kor udi ma Babilon. Ridhi jakur! Dhiri jokur! Kethi cwo i lweny apondi. Kole Rwoth otieko timo can je to timo gima go oluwo ma mako kwoŋ ji ma bedo i Babilon.

¹³ Piny manitie gi malawin kweth kodi cwe kweth, gike perin otieko tundo, thol ma kwo perin oŋadi woko.

¹⁴ Rwoth pa lwak jolweny won gipi otieko kwoŋere: Adieri alapoŋin gi jolweny paka tome bonyo, aka jolagoyo koko ma kikengila kwoŋ win.

Wer ma pak ri Were

¹⁵ Rwoth am'ocweyo piny gi meni pere; gi rieko pere ocweyo piny aka gi niaŋ pere oyaro polo.

¹⁶ Ka go ogoyo dwonde, mor pa pi bedo i polo, aka go miyo fumbi ay wok i tielo ma piny. Go timo lithkoth ri koth, aka wodho woko koyo wok i kakan mere.

¹⁷ Ka ji joneno gime, jolokere mamiŋ ma jongoye gi geno; jothedhi nywenye je ikwoto wiy jo gi cal pajo; kwoŋbedo cal pajo obedo gitwodo, aka luya ongoye i jo.

¹⁸ Jongoye kony, tic ma twodo; i hongo ma gir'acula pajo jolakisika.

¹⁹ Were pa Yakobo k'obedo paka jo; go a ŋat'ocweyo kisi gimoro, aka Isiraili obedo nono mar'alunja pere; Rwoth pa lwak jolweny obedo nyinge.

Nyundu pa Rwoth

²⁰ Rwoth waco, “Babilon, ibedo nyundu paran, gilweny paran. Aorin ma ŋinyo woko nonin gi kerin,

²¹ ma ŋinyo punde kodi jogwey, ma ŋinyo woko cawilin kodi jogwey,

²² ma ŋinyo woko cwo gi mon; ma neko jom'oti kodi yac; ma neko yac gi nyir,

²³ ma neko jokwath gi mwendi pajo, ma neko jofur kodi kitipa pajo; ma neko jodhum kodi jotel.”

Gir'acula pa Babilon

²⁴ Alaculo Babilon kodi ji je ma bed'iye ma wineno ro gimarac ma jotieko timo i Zayon, Rwoth waco.

²⁵ Kole amon swa kodin, awi got ma jarey, Rwoth waco. Alarieyo cingan kwoŋin, t'afuta in piny wok malo t'alokin buru.

²⁶ Ongoye telin ma lawok i gundin perin m'ilaoro ma geto. T'ilabedo paka opalipat cil gi cil, Rwoth waco.

²⁷ Tiŋi malo ranyuth i piny, kudhi gwara i dier nonin; yik nonin ma lweny gi Babilon! Lwoŋ nonin jowolweny gine, Ararat, Mini, kodi Asikenaz jowomonji. Kethi rigo jatel ma telo lweny, keli punde paka tome bonyo.

²⁸ Yik nonin ma lweny kodi Babilon, kerin ma Mediya, gi jodhum kodi jotel, gi kisi piny i dhum pajo.

²⁹ Piny kirin aka yengere, kwoŋbedo Rwoth timo can pere ma loko Babilon thim, m'ongoye ŋata bed'iye.

³⁰ Jolweny ma Babilon jotieko weyo lweny, jodoŋ i kambi pajo. Meni pajo orumo, jotieko lokere paka mon. Ocwiny udi pajo, nywenye pajo otur woko.

³¹ Jaŋwec acel riŋo ma romo gi man, aka jamikwenda acel riŋo romo gi man, ma waco ri kere ma Babilon ni tindi pere madwoŋ omaki wok i thenge gi thenge.

³² Jokwor jotieko mako malawa, aka jotieko waŋo cel gi mac. Jolweny ma Babilon jokirin.

³³ Kole Rwoth pa lwak jolweny waco ama, Were pa Isiraili: Nyar Babilon cal paka kisia i hongo m'onyon iye; kucel i hongo macek hongo ma keco go bino tundo.

³⁴ Kere Nebukadineza ma Babilon otieko cuto woko Yerusalem, otieko ŋinyo woko Yerusalem. Go oweyo tindi madwoŋ m'ongoye gimoro paka jagi, go omwonyo Yerusalem paka ogwaŋ madwoŋ ma nam. Go otieko poŋo iye gi gigipiny ma Yerusalem mabeyo, to bolo megi woko.

³⁵ Weyi ji ma Zayon jowowaci ni, “Weyi woculi kwor kwoŋ Babilon ro akaka m'otimi riwan.” Weyi Yerusalem wowaci ni, “Woculi kwor kwoŋ Babilon ro candirok mawan.”

Rwoth bino konyo Isiraili

³⁶ Riameno Rwoth waco ama ri ji ma Yerusalem: Akidho kiosa banja mewin t'aculo kwor riwin. Alathwo woko nam pere t'acwiyo woko waŋ pi pere.

³⁷ Babilon lalokere kidhur gundin, kero kibwe, gima miyo jo bwok gi kirin, m'ongoye ŋata bed'iye.

³⁸ Paka nyithindhi simbwore jobino kiuja kanyacel.

³⁹ Jobedo joworo? Alayiko rijo kalima t'amero jo to josangala. Jolakidho nindo to jok'ocew, apaka Rwoth waco.

⁴⁰ Alatero wothum jo, paka rombo, diegi gi wot rombo. An Rwoth, atieko luwo.

Gima latimere ri Babilon

⁴¹ Rwoth waco mako kwoŋ Babilon: Tindi madwoŋ ma piny gipi jopako, otiek mako! Nga Babilon onyo, olokere gima kiber anena ri nonin!

⁴² Nam onyo mol i wi Babilon to umo, gi derino mere ma mor.

⁴³ Tindi madongo onyo jolokere gima, miyo ji lworo, aka onyo jocale opalipat, gi thim. Lowo m'ongoye ŋata bed'iye kosa luw'iye.

⁴⁴ Alamiyo Bel gir'acula, were pa Jobabilon, t'amiyo go weyere kodi gigipiny pere, m'okwal. Nonin jok'olam go kendo; kor udi ma Babilon jotieko podho.

⁴⁵ Ji ma Isiraili, ringi wingoye woko kenyo! Ringi wiboth kwo mewin kwoŋ nge pa Rwoth!

⁴⁶ Cuny win wokiri wopodhi kosa wibedi gi lworo kwoŋbedo luwo makicar ma wiwinjo. Kisi oro luwo makicar m'opokere nyay; luwo makicar mar'akaka i piny, kodi kere acel ma lwenyo gi man.

⁴⁷ Aridho riwin, ndelo bino m'alamiy'iye gir'acula ri cal ma Babilon; piny pere gipi ilaketho i wickwot, aka ji mere je ilaneko.

⁴⁸ Kisi gimoro je ma piny kodi ma polo jolakoko gi kisangala ka Babilon opodhi i cingi ji ma jowok yumalo ma reyo woko, Rwoth waco.

⁴⁹ Babilon okelo tho ri ji i piny gipi, aka onyo riameno Babilon lapodho kwoŋbedo otieko miyo ji kweth ma Isiraili jotho. An Rwoth, atieko luwo.

Mikwenda pa Were ri Joisiraili i Babilon

⁵⁰ Rwoth waco ri ji pere i Babilon ni: “Witieko kwale kwoŋ tho! Pama kadhi win! Wikiri wikuri! Kada wibor gi peco, par win kwoŋan, an Rwoth mewin, aka wipoy Yerusalem.

⁵¹ Wiwaco ni, ‘Lifol omako wan, to wickwot mako wan; wawinjo ni wangoye kony kicutho kwoŋbedo jopath jotieko tero Kabedo Maleŋ i Ot pa Were.’

⁵² Onyo riameno, adieri hongo bino, Rwoth waco, m'alamiy'iye gir'acula ri calin pere, aka ma jolimi litho joladwanyere gi litho to joywak i piny gipi.

⁵³ Kada Babilon oidhi pondeponde to geto cel matek kenyo, fodi alanyalo dhiro ji ma turo woko, Rwoth waco.”

Rerok man ma Babilon

⁵⁴ Rwoth waco ni, “Winji win derino ma ywak i Babilon, ma ywak ro rerok i piny pa Jokaldin!

⁵⁵ Kole Rwoth reyo woko Babilon, aka miyo go liŋ nisi. Jolweny joyombere i iye paka derino pa pi ma mol, to jomonjo gi derino ma woy.

⁵⁶ Jobino ma reyo woko Babilon; omaki jolweny mere, aka aserin pajo otur woko. Kole Rwoth obedo Were ma miyo gimarac gir'acula, aka alatic gi Babilon paka mitere.

⁵⁷ Alaloko jodhum mere jomero, cwo ma joriek, jotel gi jolweny. Jolakidho nindo to jok'ocew. Kere waco, go ma nyinge obedo Rwoth pa lwak jolweny.

⁵⁸ Rwoth pa lwak jolweny waco ama: Kor ot ma Babilon mapando ilariewo piny, aka waŋkace mere ma joŋawere ilawaŋo gi mac. Ji jool rigo nono, aka nonin jolacere nyaka ri mac.”

Idhiro mikwenda pa Yeremia i Babilon

⁵⁹ Jakur pa kere Zedekia oyido obedo Seraya, wod pa Neria, nyakwar Maseya. I oro mar'aŋwen munyo Zedekia obedo kere ma Yuda, Seraya oyido kidho gine Babilon, t'amiyo go fonji moro.

⁶⁰ Yeremia ondiko i kitawo gima mako rerok je m'oyido labino kwoŋ Babilon, kanyacel gi gigipiny man me je ma mako kwoŋ Babilon.

⁶¹ Yeremia owaco ri Seraya ni, “K'itundo Babilon, neni ni isoma malo ri ji kisi gimoro je m'ondiki ka.

⁶² Kenyo t'ikwayo ama: Awi Rwoth, in won gipi itieko waco ni ilareyo woko kabedo me ŋey ji kosa ogwaŋe jokiri jowobed'iye, aka ibino jwango cil gi cil.

⁶³ Seraya, k'itieko kisoma kitawo me ri ji, kenyo itwey i tele t'ibolo i dier Malawa Yufrete,

⁶⁴ t'iwaco ni, ‘Me a gima latimere ri Babilon, lamunyere, aka k'oay malo kendo, kwoŋbedo rerok ma Rwoth kidho kelo kwoŋe.’”