Yeremia 48 - KITAWO MALEŊ Catholic

Reyo woko Mowab

¹ Me wac ma mako kwoŋ Mowab, Me apaka Rwoth pa lwak jolweny, Were pa Isiraili waco ama: Kidamba ri Nebo, kole odoŋ gunda! Kiriathayim odoŋ i wickwot aka omaki, kapondo mere otur woko.

² Dwoŋ pa Mowab orumo woko, jocano raco i Hesibon kwoŋe, ma reyo woko go bedo nono. Win bende, cwo ma joneko, ilamwolo win, ka abor oriem win.

³ Ji ma Horonayim joywak ama, Akaka gi rerok!

⁴ Orey woko Mowab, nyithindho pere joywak.

⁵ Winji derino ma cwako um gin, i yo ka joidho malo i Luhith, jokadho ka joywak gi litho, ka joloro piny i Horonayim.

⁶ Jowaco ni, kwakere win, ringi win wibothi kwo mewin, paka punda madhako madudi i thim.

⁷ Kole kwoŋbedo oyido iketho geno i tic perin kodi i lim perin, in bende ilamakin, were perin Kemos lakadho bedo i wiloka, kanyacel gi jotel pere kodi jocway ri were i wi migam pere.

⁸ Jarey woko labino i kisi tindi madwoŋ, aka ongoye tindi madwoŋ ma lakwale. Milelo kiri gi kam'othangere je lakisika woko, paka Rwoth otieko luwo.

⁹ Kethi gicen cumbi ri Mowab, kole go lapodho adieri, tindin pere ladoŋ nono, m'ongoye ji ma jobedi i iye.

¹⁰ Kwoŋ ri ŋata timo tic pa Rwoth gi lithirok, kwoŋ ri ŋat'owey ma k'ooro abor pere ma neko.

Ireyo woko tindin madongo ma Mowab

¹¹ Mowab oyido nitie i kwo m'otoy wok i soye pere go oyido opie paka vini m'opie, paka vini ma k'oloki wok iy'atawo konjo i man, cwe pere k'orumo, aka kur pere k'okwok.

¹² Riameno ndelo bino, Rwoth waco, m'abino dhiro ji ma jolayweyo go, aka jolalwindo atewe ma vini pere to joturo mathindho thindho.

¹³ Kenyo wickwot lamako Jomowab gi were pajo Kemos, paka cango wickwot omako Joisiraili gi Bethel were m'oyido jogeno.

¹⁴ Winyalo nedi waco ni, “Wabedo jomiseni, aka jolweny matek?”

¹⁵ Jarey woko Mowab kodi tindin pere otieko ay malo, aka yac pere mabeyo loyo jotieko kadho piny neki, Kere waco, go ma nyinge obedo Rwoth pa lwak jolweny.

¹⁶ Teko pa Mowab ocore cegin, aka rerok pere bino ma dwir.

¹⁷ Ywak win ri Mowab, win joger pere, kodi jono je ma joŋeyo nyinge. Waci win ni, “Neni nger maluth ma dhum pere otur'iye, luth madwoŋ!”

¹⁸ Lori win piny wok i dwoŋ, aka wibedi i piny i fukefuke, win ma wibedo i Dibon. Kole jarey woko Mowab otieko bino malo kwoŋ win, go otieko reyo woko kapondo mewin.

¹⁹ Cungi win i thengi royo winen, win ma wibedo i Arower. Penji win jacwo ma ringo kodi dhako ma kwale, ka wiwaco ni, “Aŋo m'otimere?”

²⁰ Wickwot omako Mowab, kole otur woko, goy win ndur aka ywak win! Waci win i thengi malawa Arinon, nike orey woko Mowab.

²¹ Kole otiek thumo banja ri piny m'obipere: Kwoŋ Holon, Jaza kodi Mefath.

²² Dibon, Nebo kodi Beth Diblathayim.

²³ Kiriathayim, Beth Gamul kodi Beth Mewon.

²⁴ Kerioth, Bozra kodi tindin je i piny Mowab, bor kodi cegin.

²⁵ Otur woko tungi Mowab, aka dhum pere orey woko, Rwoth waco.

Mowab lamwole

²⁶ Rwoth waco ni, Miy win Mowab womer, kwoŋbedo go otiŋere malo kwoŋ Rwoth. Weyi Mowab woŋindere i ŋok pere. Go bende lalokere ginyero.

²⁷ Isiraili oyido obedo ginyero rin, makada nende k'omaki go i dier jokwo. To kisi k'oyido iluwo kwoŋ go, iyengo wiyin.

²⁸ Ngoye win i tindin aka wibedi i telin, win ji ma wibedo i Mowab! Bedi win paka akuro ma geto ode, i thengi milelo maluth.

²⁹ Watieko winjo kwoŋ delok pa Mowab, go jakwoto swa. Watieko winjo kwoŋ telok pere, delok kodi gero pere, kodi kwoŋ kwoto ma cunye.

³⁰ An won aŋeyo kwoŋ gero pere, Rwoth waco, delok pere ma twodo, gi tim pere ma twodo.

³¹ Riameno agoyo ndur ri Mowab, aywak ri Mowab gibe, aka arem ri ji ma Kiri Heres.

³² Aywak riwin loyo ji ma Yazer, awi ji ma Sibima! Jangin okalo nam, aka otundo bor kiri Yazer. To jarey woko otieko podho kwoŋin, olemo perin ma cwir kodi kwoŋ nyingi vini perin.

³³ Omayin woko forok kodi kisangala, wok i piny Mowab ma wega olemo. Atieko juko vini wok i kadhiŋo vini, ongoye ŋata biyo vini gi kisangala, aka koko ma kisangala ongoye.

³⁴ Ji ma Hesibon kodi Eliale joywak, aka ywak pajo winjere tundo kiri Yahaz. Dwondi jo winjere i Zowar kiri i Horonayim kodi Egilath Selisiya.

³⁵ Rwoth waco ni, “Alakwanyo woko ji ma jomiyo cowirok kodi mic ri werin pajo i kalamo.”

³⁶ Riameno adundo paran ywak ri Mowab paka madundo kodi ri ji ma Kiri Heres. Kole lim m'oyido jolimo orere woko.

³⁷ Joje jotieko lielo ye wi jo kodi ye tik jo. Joje jogwero cingi jo to jotweyo kutiya i pier jo.

³⁸ I wi udi ma Mowab je kodi kam'othangere je ongoye giman kwanyo woko ywak, kwoŋbedo an atieko turo woko Mowab paka atawo m'ongoye ŋata mito, Rwoth waco.

³⁹ Neni paka otur! Neni paka joyway! Neni paka Mowab owiro ŋeye i wickwot! Ameno apaka Mowab otieko lokere ginyero kodi gibwok ri joger pere je.

Mowab kilakwale

⁴⁰ Kole Rwoth waco ama: Neni, nono moro laay mayil paka ango, to yaro bwombe kwoŋ Mowab.

⁴¹ Ilamako tindin, kodi kapondo. Cuny jolweny ma Mowab, labwok i ndelo no, paka cuny dhako ma ŋedi ramo.

⁴² Ilareyo woko Mowab paka nono, kwoŋbedo go ogwenyere kwoŋ Rwoth.

⁴³ Teko, bur kodi bwo, nitie ruwaŋ win, awi ji ma Mowab. Rwoth waco.

⁴⁴ Kisi ŋat'oringi kwoŋ teko, lapodho i bur, aka kisi ŋat'owok i bur, lamoko i bwo. Rwoth waco.

⁴⁵ I tipo ma Hesibon, ji ma joringo jocungo ma joloc, kole mac owok i Hesibon, cuk mac owok i ot pa Sihon, aka oreyo woko nyim Mowab, kasik pa ji ma jogwenyirok.

⁴⁶ Kidamba rin, awi Mowab! Ji pa were Kemos jotieko rere woko, kole oter wot win i twec, kanyacel gi nyiki win.

⁴⁷ Kucel aladwoko lim ma Mowab, i ndelo ma bino, Rwoth waco. Me apaka athumo ri Mowab banja.