Yeremia 47 - KITAWO MALEŊ Catholic

Mikwenda pa Rwoth ma mako kwoŋ Filistia

¹ Me wac pa Rwoth m'obino ri Yeremia jatuci wac Were ma mako kwoŋ Jofilistia, mafodi Farawo k'omonjo Gaza.

² Rwoth waco ama: Neni, pi tula wok yumalo, aka lalokere paka mikula m'opoŋ de oy, jolaumo piny kodi kisi gima nitie iye, tindi madwoŋ kodi jono ma jobed'iye. Ji jolaywak, aka ji ma piny jolagoyo ndur.

³ I mayindo ma tiendi kayinin pere, i derino ma cawilin pere kodi yengirok ma tiendi jo, jonywol jokinyal gik omo nyithindho pajo, kwoŋbedo cingi gin nyapere.

⁴ Ndelo bino, ma reyo woko Jofilistia je, ilacego woko i Tire kodi Sidon, kony je m'oyido odoŋ. Kole Rwoth lareyo woko Jofilistia, ji ma jodoŋ i Kirete.

⁵ Pata otieko mako ji ma Gaza ro ywak, Asikelon oliŋ nisi. Awi ji ma jodoŋ i milelo pajo, wilaywak kiri keraŋo.

⁶ Awi, abor pa Rwoth, ilakudere kiri keraŋo? Gik i odin, ywomere aka liŋ.

⁷ To oliŋ nedi, ma Rwoth otieko wodho rigo or, kwoŋ Asikelon kodi ji ma jobedo i thengi nam, otiek miyo go tic koro.