Yeremia 40 - KITAWO MALEŊ Catholic

Yeremia bedo bongi Gedalia

¹ Wac pa Rwoth obino ri Yeremia rumacen munyo Nebuzaradan jamituka pa jolweny oweyo go dok i Rama, munyo otwey go i lijegere kanyacel gi jotwec man ma Yerusalem kodi Yuda m'oyido itero jo i Babilon.

² Jamituka pa jolweny oywayo Yeremia gicen to waco rigo ni, “Rwoth Were perin opiro kabedo me gi teko,

³ aka onyo Rwoth otieko kelo, to timo paka go owaco, kwoŋbedo wijoje witimo reco kwoŋ Rwoth aka wikiwinjo dwonde. Riameno gime obino kwoŋ win.

⁴ Onyo neni, atieko gonyin konon me kwoŋ lijegere m'oyido nitie i cingin. K'imito inyalo kadho kodan i Babilon, aka alakurin maber. To ka idaki kadho kodan i Babilon, inyalo weyo. Neni, piny gibe nitie ruwaŋin, kadhi kam'iparo nike ber aka otire rin kadh'iye.

⁵ K'idoŋ ka, kadhi bongi Gedalia wod pa Ahikam wod pa Safan, ma kere ma Babilon oketho paka gavana ma tindin ma Yuda, aka ibedi bongi go i dier ji, kosa kadhi kam'iparo nike otire rin kadh'iye.” Ameno Jamituka pa jolweny omiyo go cemo m'oromo kodi mic to weyo go kadho.

⁶ Kenyo Yeremia okadho bongi Gedalia wod pa Ahikam i Mizipa, aka obedo i dier ji m'oyido jodoŋ i piny.

Gedalia Gavana ma Yuda

⁷ Munyo jotel pa jolweny je kodi jolweny pajo ma piny jowinjo nike kere ma Babilon oketho Gedalia wod pa Ahikam bedo gavana i piny ma Yuda, aka omiyo go telo cwo kodi mon kodi nyithindho ma jocandi m'oyido k'oteri jo i twec i Babilon,

⁸ Isimayil wod pa Nethania, Yohana wod pa Kareya kodi Seraya wod pa Makathite jokidho bongi Gedalia i Mizipa kanyacel gi jolweny pajo.

⁹ Gedalia wod pa Ahikam wod pa Safan okwoŋere rijo kodi jolweny pajo ka waco ni, “Wikiri wibwok tiyo ri Jobabilon. Bedi win i piny me, aka witiy ri Jobabilon, aka labedo maber gi win.

¹⁰ Paka ri an, alabedo i Mizipa cungo ikawaŋ win ruwaŋ Jobabilon ma jobino bongi wan. To riwin, coki win vini kodi olemo ma cwir kodi mo, wikan iy'atewe mewin, to wibedo i tindin ma wimako.”

¹¹ I nger acel munyo Joyuda je m'oyido jonitie i Mowab kodi i dier Joamon kodi Joedom kodi i piny man jowinjo nike kere ma Babilon oyido oweyo ji ma joboth i Yuda, aka oketho Gedalia wod pa Ahikam wod pa Safan bedo gavana pajo,

¹² kenyo joje jodwoko wok i kabedo m'oyido jokedhere iye to jobino i Yuda, bongi Gedalia i Mizipa. Jocoko vini kodi olemo ma cwir i thotho.

Ineko Gedalia

¹³ Onyo Yohana wod pa Kareya kodi jotel je ma lweny i piny m'othangere jobino bongi Gedalia i Mizipa,

¹⁴ to jowaco rigo ni, “Iŋeyo paka Balis kere pa Joamon ooro Isimayil wod pa Nethania nekin?” To Gedalia wod pa Ahikam k'oyeyo wac pajo.

¹⁵ Kenyo Yohana wod pa Kareya oluwo gi Gedalia i Mizipa manyaliŋliŋ ka waco ni, “Mondo weyi akadhi aneki Isimayil wod pa Nethania, aka ongoye ŋata laŋeyo. Raŋo go mito nekin, ŋey Joyuda ma jocokere thokin jowokedhere, aka ji ma jodoŋ i Yuda joworere?”

¹⁶ To Gedalia wod pa Ahikam odwoko Yohana wod pa Kareya ni, “Ikir'itim nger gino, kwoŋbedo iluwo twodo kwoŋ Isimayil.”