Yeremia 38 - KITAWO MALEŊ Catholic

Yeremia i waŋ pi m'ocwiyo

¹ Sefatiya wod pa Matan, Gedalia wod pa Pasur, Yukal wod pa Selemia kodi Pasur wod pa Malikia jowinjo wac pa Yeremia m'oyido waco ri ji ni,

² Me apaka Rwoth waco: Jono ma jodoŋ i tindi madwoŋ jolatho g'abor, kec kodi two nundu. To jono ma jokadhi yu Babilon jolakwo, kwo pajo labedo cul ma lweny aka jolakwo won.

³ Me apaka Rwoth waco: Tindi madwoŋ me adieri lamiyere i cingi jolweny pa kere ma Babilon aka ilamako.

⁴ Kenyo jodhum jowaco ri kere ni, “Jal me ber woneki, kwoŋbedo go cilo cuny jolweny ma jodoŋ i tindi madwoŋ me, kodi ji je gi waco kiti wac no rijo. Kole jal me kidwar bero pa ji me, to raco ayin.”

⁵ Kere Zedekia owaco ni, “Go ee, nitie i cingi win, kere ongoye gi dwoŋ kwoŋ win.”

⁶ Ameno jotero Yeremia to jobolo go i waŋ pi ma peco pa Malikia, wod pa kere m'oyido nitie i diedipo ma cel pa kere, ka joliero go piny gi thol. Onyo waŋ pi oyido ocwiyo, kwanyowoko cwodho kende am'oyido odoŋ, to Yeremia munyere i cwodho.

⁷ Ebed Melek Jaethopiya, jacwo m'okol i ot pa kere, owinjo nike oyido obol Yeremia i waŋ pi. Kere oyido obedo i Waŋkac pa Benyamin.

⁸ Ameno to Ebed Melek wok i ot pa kere to luwo gi kere ka waco ni,

⁹ “Rwoth paran kere, cwo me jotimo gikidakana i gima jotimo je ri Yeremia jatuci wac Were gi bolo go i waŋ pi wotho kenyo kec, kwoŋbedo mugat orumo i tindi madwoŋ.”

¹⁰ Kenyo Kere owodho or ri Ebed Melek Jaethopiya ka waco ni, “Kadhi gi cwo adek wok ka, aka wiyway Yeremia wifudhi go wok i waŋ pi mafodi k'otho.”

¹¹ Ameno Ebed Melek okadho gi cwo adek i ot pa kere, i kabada ma nangin kam'ikan'iye gigipiny, to jokwanyo okute kodi nangin m'oti, to jorudho piny ri Yeremia i waŋ pi gi thol.

¹² Kenyo Ebed Melek Jaethopiya owaco ri Yeremia ama: Kethi okute kodi nangin i ywothin kodi thol. Yeremia otimo ameno.

¹³ Kenyo joywayo Yeremia malo gi thondhe wok i waŋ pi. Rumacen to Yeremia doŋ i diedipo ma cel pa kere.

Zedekia kwayo Yeremia womiy go rieko

¹⁴ Kere Zedekia ooro wokel Yeremia jatuci wac Were aka ojolo go i dhiot mar'adek ma Ot pa Rwoth. Kere openjo Yeremia ni, “Anitie gi gim'amito penjin, ikir'imuŋan gimoro je.”

¹⁵ Yeremia owaco ri Zedekia ni, “K'anowaci rin, ilanekan, ik'onekan? K'anomiyin rieko, ikilawinjan.”

¹⁶ Ameno Zedekia okwoŋere ri Yeremia manyaliŋliŋ ka waco ni, “Paka Rwoth kwo, go m'omiyo wan kwo, akilanekin, aka akilakethin i cingi jono ma jodwaro kwo perin.”

¹⁷ Kenyo Yeremia owaco ri Zedekia ni, “Rwoth waco ama, Were pa lwak jolweny, Were pa Isiraili: K'inomiyere ri jodhum pa kere ma Babilon, jokilanekin, aka jokilawaŋo tindi madwoŋ me gi mac, aka in kodi peco perin wilakwo.

¹⁸ To k'ikimiyere ri jodhum pa kere ma Babilon, meno tindi madwoŋ me ilaketho i cingi Jobabilon t'iwaŋo gi mac, aka kiri in won gipi ik'obudhere i cingi jo.”

¹⁹ Kere Zedekia odwoko Yeremia ni, “Anitie gi bwok ri Joyuda ma joriwere gi Jobabilon, kole inyalo kethan i cingi jo to jomiyan litho.”

²⁰ Yeremia owaco ama: Be, kilamiyin i cingi jo. Mondo winji dwondi Rwoth i gim'awaco rin, aka labedo maber kodin, kilanekin.

²¹ To k'ikwero tiŋo cingin, me a gima Rwoth otieko nyuthan i menyirok ni latimere;

²² i menyirok, aneno mon je ma jodoŋ i ot pa kere ma Yuda kareno jotel pa kere ma Babilon jotelo jo ka jowaco ni, Merin perin m'oyido igeno swa jodwoŋin, aka jotieko lacin woko. Onyo pama paka tiendin omoko i cwodho, jojwangin woko.

²³ “Ilatero mon perin je kodi nyithindho kadho i Babilon, ma kiri in won gipi, ik'okwale wok i cingi jo. To kere ma Babilon lamakin, aka ilawaŋo tindi madwoŋ me gi mac.”

²⁴ Kenyo Zedekia owaco ri Yeremia ni, “Ikir'iwey dhano man woŋey kwoŋ kiliesa me, kwoŋbedo inyalo nekin.

²⁵ Ka jotel jowinji nike atieko luwo kodin, to jobino penjin ni, ‘Nyaka wac riwan gima kere owaco rin, ikir'imuŋ wan kwoŋbedo wanyalo nekin. Aŋo ma kere owaco rin?’

²⁶ Kenyo dwoki jo ni, ‘An oyido awodho ywak paran ri kere wokiri wodwokan i ot pa Yonathan atho koro.’ ”

²⁷ Jotel je jobino bongi Yeremia to jopenjo go; kenyo Yeremia dwoko jo wac ma kere oyido owodho rigo or waco. Ameno joweyere gi penjo go, kwoŋbedo ongoye ŋat'owinjo kiliesa pajo.

²⁸ Yeremia odoŋ i diedipo ma cel pa kere tundo i ndelo m'omak'iye Yerusalem.