Yeremia 30 - KITAWO MALEŊ Catholic

Cikirok pa Rwoth ri ji pere

¹ Wac pa Rwoth obino ri Yeremia wok bongi Rwoth ka waco ama:

² Rwoth Were pa Isiraili, waco ama: Ndiki i kitawo wac je m'atieko waco rin.

³ Kole ndelo bino adieri, Rwoth waco, m'abino dwoko lim pa ji paran, Isiraili kodi Yuda. Rwoth waco, aladwoko jo i lowo m'amiyo kwarere pajo aka jolalunjo.

⁴ Me wac ma Rwoth oluwo ma mako kwoŋ Isiraili kodi Yuda:

⁵ Rwoth waco ama: Watieko winjo ywak ma kirin, ywak ma lworo kodi ngoye pa siem.

⁶ Mondo penjere pama, aka neni, jacwo bende nyalo nywolo nyathi? To raŋo aneno kisi jacwo omako iye paŋini dhako ma nywol? Raŋo jolokere matar?

⁷ Kidamba! Ndelo no dwoŋ swa ongoye ma pimere gine; obedo hongo ma litho ri ji paran; kucel ilabotho jo kwoŋe.

⁸ I ndelo no, Rwoth pa lwak jolweny waco, alaturo majogi manitie i ŋuti jo t'akwanyo woko lijegere i ŋuti jo. Jopath jok'olok jo ŋecin kendo.

⁹ Kucel, jolatic ran, Rwoth Were pajo, kodi nyakwar Daudi kere pajo, m'abino ketho paka kere.

¹⁰ To paka riwin, ji paran, wikiri wibedi gi lworo, Rwoth waco, kosa wikiri wibwoki, awi Isiraili; kole akidho botho win wok bor, kodi nyikway win wok i lowo ma twec pajo. Wiladwoko peco to wibedo i siem; wilabedo m'ongoye teko, aka langoye ŋata bino miyo win lworo.

¹¹ Kole anitie gi win, Rwoth waco, ma botho win; alaketho i gike nonin je m'akedho win i dier jo, to akilareyo woko win. Alamiyo win gir'acula paka ripo, aka ak'owey m'akimiyo win gir'acula.

¹² Kole Rwoth waco ama: Adhola mewin kicangere, kama lithi mewin oasere.

¹³ Ongoye ŋata nyalo kuro win, wingoye gi yath ma mado adhola mewin, ongoye geno ma botho riwin.

¹⁴ Jomitirok mewin je wiy jo owil gi win; jokipar kada kwoŋ win. Kole atieko monjo win paka jakwor, gir'acula mewin obedo magway, kwoŋbedo kidakana mewin madwoŋ.

¹⁵ Raŋo wiywak ri kama lithi mewin? Litho mewin kicangere. Amiyo win nger gir'acula me kwoŋbedo reco mewin thoth aka kidakana mewin dwoŋ.

¹⁶ Riameno jono je ma jorey win woko ilareyo woko jo, aka jokwor mewin je, kisi dhano kwoŋ jo, ilatero jo i twec. Jono je ma jonyaga win, ilakinyaga jo, aka jono ma jodiy win, iladiyo jo bende.

¹⁷ Kole alamiyo wilama kendo; aka alacango adholin mewin je, Rwoth waco. Kwoŋbedo jotieko lwoŋin ni jawoko; Zayon m'ongoye ŋata dewo kwoŋe,

¹⁸ Rwoth waco ama: Akidho dwoko ji paran i lowo pajo, t'anyutho ŋono ri kisi peco. Ilageto Yerusalem kendo, t'idwoko cel pa kere mere kendo.

¹⁹ Ji ma jobedo kenyo jolawero pak; jolakoko ri kisangala. Alaloko jo mathoth, aka jokilabedo manok, alamiyo wowor jo, aka k'ocay jo.

²⁰ Nyithindho pajo jolabedo paka cango, kweth pajo lacungo matek ruwaŋan; aka alamiyo gir'acula ri jono ma jodiy jo.

²¹ Jadhum pajo labedo acel kwoŋ jo wegi, go bino wok i dier jo wegi. Alakelo go cegin, aka go lacore bongan, kwoŋbedo ŋa manyalo bedi gi miseni ma corok bongan? Rwoth penjo.

²² Wilabedo ji paran, aka alabedo Were mewin.

²³ Neni, asur pa Rwoth madwoŋ, keme pere owok, nge pere mager swa, lamwoc i wiy jokidakana.

²⁴ Nge pa Rwoth malieth kilagik cuka go otiek timo to cowo atoŋa ma paro pere. I hongo ma yuwaŋe, wilaniaŋ gime.