Yeremia 29 - KITAWO MALEŊ Catholic

Balwa pa Yeremia ri Joyuda ma jonitie i Babilon

¹ Me a wac ma balwa ma jatuci wac Were Yeremia odhiro wok Yerusalem ri jodongo ma jodoŋ i dier jotwec kodi jocway ri Were i wi migam, jotuci Wac Were, kodi ji je ma Nebukadineza oyido otero i twec wok Yerusalem.

² Gime otimere munyo Yekonia kodi nyamicala, jotel ma kapido, jotel ma Yuda gi Yerusalem, jopac, jothedhi nyweny oyido jotieko ay wok Yerusalem.

³ Balwa no odhir i cingi Elasa wod pa Safan kodi Gemaria wod pa Hilikia, ma Kere Zedekia ma Yuda odhiro i Babilon bongi Kere Nebukadineza ma Babilon. Owaco ama:

⁴ Rwoth pa lwak jolweny, Were pa Isiraili waco ama, ri jotwec je m'adhiro jo i twec wok i Yerusalem kidho Babilon:

⁵ Geti win udi to wibed'iye. Pidhi win cemo to wicamo ranyak mere.

⁶ Nywom win to winywolo nyithindho. Nywom win ri wot win, aka wiyey nyiki win jowonywomere, ŋey jowonyal nywolo nyithindho; jowonyay kenyo ma jok'omojere.

⁷ To tiyi win ri bero pa tindi madwoŋ kam'adhiro win'iye i twec, aka wikway Rwoth i nyingi jo, rupiri i bero pajo wilalimo bero.

⁸ Kole me apaka Rwoth pa lwak jolweny, Were pa Isiraili waco ama: Wikiri wiyey jotuci wac Were kodi joma joparo ni joŋeyo gima latimere yuwaŋe ma jonitie i dier win jowowondi win, aka wikiri wiwinji lek pajo ma joleko,

⁹ rupiri obedo twodo ama joluwo riwin kwoŋe i nyingan, akidhiro jo, Rwoth waco.

¹⁰ Kole Rwoth pa lwak jolweny waco ama: “Ka oro piero ario pa Babilon orumo, nyaka t'aciko ithan riwin, alaketho i gike cikirok paran riwin t'adwoko win i kabedo me.

¹¹ Adieri aŋeyo can m'anitie gine riwin, Rwoth waco, can ma bero mewin makiweno raco, ma miyo win hongo ma yuwaŋe gi geno.

¹² Kenyo nyaka ka wilwoŋan to wibino to wikwayan, alawinjo win.

¹³ Ka wirangan, wilanwaŋan, ka widwaran gi cuny win je,

¹⁴ wilanwaŋan, Rwoth waco. Aladwoko silwany mewin t'acoko win wok i nonin je kodi kabedo je m'akedh'iye win, Rwoth waco. Aladwoko win i kabedo m'akwany'iye win t'atero win wiloka.”

¹⁵ Kwoŋbedo witieko waco ni, “Rwoth otieko miyo wan jotuci wac Were i Babilon.”

¹⁶ Rwoth waco ama kwoŋ kere ma bedo i kom ma dhum pa Daudi, kodi kwoŋ ji je ma jobedo i tindi madwoŋ me, wade mewin ma jok'okadho gi win i wiloka.

¹⁷ Rwoth pa lwak jolweny waco ama, akidho gonyo kwoŋ jo abor, kec kodi two nundu, aka alaloko jo paka nyandere m'otop marac swa ma kinyal camo.

¹⁸ Alariemo jo g'abor, gi kec kodi two nundu, aka alaloko jo gibwok ri kerin je ma piny. Jolabedo paka kwoŋ, gibwok, gidhier, kodi ginyero i dier nonin je kam'atieko kedh'iye jo.

¹⁹ Gime latimere rijo kwoŋbedo jok'oworo mikwenda paran, munyo amena dhiro rijo ŋecin paran jotuci wac Were. Jokwero winjo, Rwoth waco.

²⁰ To onyo pama, win ma winitie i wiloka je m'ariemo wok Yerusalem kidho Babilon, winji win wac pa Rwoth.

²¹ Rwoth pa lwak jolweny, Were pa Isiraili waco ama, ma mako Ahab wod pa Kolaya kodi Zedekia wod pa Maseya, ma joluwo gitwodo i nyingan. Akidho ketho jo i cingi Kere Nebukadineza ma Babilon, aka go laneko jo ka wineno.

²² Ka ji m'oter jo paka jotwec wok Yerusalem kidho Babilon jomito kelo kwoŋ nyatoro, jobino waco ni, “Weyi Rwoth wotim riwin paka Zedekia kodi Ahab, ma kere ma Babilon obulo jo i mac.”

²³ Kwoŋbedo jotimo gimiŋo i Isiraili to jotimo cot gi mon pa wadi gin, aka jotieko luwo wac ma twodo i nyingan m'akioro jo; aŋat'aŋeyo aka abedo jakony, Rwoth waco.

Balwa pa Semaya

²⁴ Waci ri Semaya ma Nehelam ni:

²⁵ Rwoth pa lwak jolweny, Were pa Isiraili waco ama: I nyingin won idhiro balwa ri ji je ma jonitie i Yerusalem, kodi ri jacway ri Were i wi migam Zefania wod pa Maseya, kodi ri jocway ri Were i wi migam je, k'iwaco ama:

²⁶ Rwoth won gipi am'olokin jacway ri Were i wi migam i kabedo pa jacway ri Were i wi migam Yehoyada, ŋey jotic jowonyal bedo i Ot pa Rwoth ma geŋo ŋatimoro ma kethere ni obedo jatuci wac Were, ma ketho go i lijegere ma ŋute oŋinere.

²⁷ Onyo riameno raŋo ikibwoko Yeremia ja Anathoth m'okethere ni go obedo jatuci wac Were riwin?

²⁸ Rupiri go obino bongi wan i Babilon, ka waco ni, “Labedo hongo malac; geti win udi wibed'iye, fur win cemo to wicamo ranyak mere.”

²⁹ Jacway ri Were i wi migam Zefania osoma balwa me munyo jatuci wac Were Yeremia winjo.

³⁰ Kenyo to wac pa Were bino ri Yeremia:

³¹ Dhiri ri joma nitie i wiloka je mikwenda me, k'iwaco ni, “Rwoth waco ama Semaya ja Nehelam: Kwoŋbedo Semaya otieko luwo gi win, kad'akidhiro go, aka otieko miyo win ketho geno mewin i twodo,

³² riameno Rwoth waco ama: Akidho miyo Semaya ja Nehelam kodi nyikwaye gir'acula. Go k'obedi kodi nyatoro moro je makwo kwoŋ ji me m'onen gimaber m'akidho timo ri ji paran, Rwoth waco, rupiri go otieko luwo gwenyirok kwoŋ Rwoth.”