Yeremia 28 - KITAWO MALEŊ Catholic

Yeremia kodi jatuci wac Were Hanania

¹ Obedo i oro acel no won, i cakirok ma dhum pa Kere Zedekia ma Yuda, i dwe mar'abic ma oro mar'aŋwen, jatuci wac Were Hanania wod pa Azur, ma wok Gibeon, oluwo kodan i Ot pa Rwoth, munyo jocway ri Were i wi migam kodi ji je jonitie, ka waco ni,

² “Rwoth pa lwak jolweny, Were pa Isiraili waco ama: Atieko turo woko meni pa kere ma Babilon.

³ I hongo ma oro ario aladwoko i kabedo me atewe je ma Ot pa Rwoth, ma Kere Nebukadineza ma Babilon okwanyo wok i kabedo me to tero Babilon.

⁴ Aladwoko bende i kabedo me Kere Yekonia wod pa Yehoyakim ma Yuda, kodi jotwec je wok Yuda ma jokidho Babilon, Rwoth waco, rupiri alaturo woko meni pa kere ma Babilon.”

⁵ Kenyo to jatuci wac Were Yeremia luwo kodi jatuci wac Were Hanania munyo jocway ri Were i wi migam kodi ji je m'oyido jonitie jocungo i Ot pa Rwoth;

⁶ to jatuci wac Were Yeremia waco ni, “Ayeyo! Weyi Rwoth wotim ameno; weyi Rwoth wokethi i kare wac je m'itieko luwo, aka wodwoki i kabedo me wok Babilon atewe ma Ot pa Rwoth kodi jotwec je.

⁷ To winji win wac me m'aluwo ka wiwinjo kodi ka ji je jowinjo.

⁸ Jotuci wac Were ma jopen bedo riwin gi an wok i hongo macon joluwo kwoŋ lweny, kec kodi two nundu kwoŋ piny kweth kodi kerin madongo.

⁹ Paka ri jatuci wac Were m'oluwo kwoŋ siem, ka wac pa jatuci wac Were no obedi adieri, nyaka bino ŋeyere ni Rwoth adieri am'odhiro jatuci wac Were no.”

¹⁰ Kenyo jatuci wac Were Hanania to kwanyo majogi i ŋuti jatuci wac Were Yeremia to turo woko.

¹¹ Hanania oluwo munyo ji je jowinjo, owaco ni, “Rwoth waco ama: Ama apaka alaturo woko meni pa Kere Nebukadineza ma Babilon wok i ŋuti nonin je nyaka i oro ario kende.” Kenyo jatuci wac Were Yeremia to kadho yo pere.

¹² Kare moro munyo jatuci wac Were Hanania otieko turo woko majogi wok i ŋuti jatuci wac Were Yeremia, wac pa Rwoth obino ri Yeremia ama:

¹³ “Kidhi iwaci ri Hanania, Rwoth waco ama: Itieko turo woko majogi ma mbawo to alayiko man ma nyweny lunjo jo!

¹⁴ Kole me apaka Rwoth pa lwak jolweny, Were pa Isiraili waco: Atieko ketho majogi ma nyweny i ŋuti nonin me je ŋey jowonyal tic ri Kere Nebukadineza ma Babilon, aka adieri jolatic rigo; atieko miyo kiri ogwaŋe mager madudi tiyo rigo.”

¹⁵ Jatuci wac Were Yeremia to waco ri jatuci wac Were Hanania ni, “Winji, Hanania, Rwoth k'odhirin, aka imiyo ji me joketho geno pajo i twodo.

¹⁶ Riameno Rwoth waco ama: Akidho kwanyin woko i piny. I oro me won ilatho, rupiri itieko luwo gwenyirok kwoŋ Rwoth.”

¹⁷ I oro no won, i dwe mar'abirio, to jatuci wac Were Hanania tho.