Yeremia 10 - KITAWO MALEŊ Catholic

Lamo cal kodi lamo mar'adieri

¹ Ji ma Isiraili, winji win wac ma Rwoth waco riwin.

² Me apaka Rwoth waco: “Wikiri wiluw tim pa nonin, kosa ranyuth ma polo wokiri wocandi paro mewin; kole gigipiny me cando paro pa nonin.

³ Kole kula pa ji me obedo gim'okom: Yath ma lul itoŋo woko, itiyo gine gi le gi cingi japac;

⁴ ji joloko maŋon gi feza gi zahabu; joridho gi nyundu kodi musumalere ŋey wokiri wodhire.

⁵ Cal pajo jocale gim'itimo ma miyo winyin lworo i ndelo pa gima nitie pige ma cal nyarieŋa, aka jokinyal luwo; itiŋatiŋa jo, rupiri jokinyal woth. Wikiri wilwor jo, rupiri jokinyal timo teko, aka jokinyal timo bero moro.”

⁶ Ongoye ŋata cale kodin, awi Rwoth; Idwoŋ, aka nyingin dwoŋ i meni.

⁷ Ŋa m'oyido kinyal lworin, awi kere pa nonin? Kole iripo awora. I dier jomariek je ma nonin kodi i kerin pajo je ongoye ŋata cale kodin.

⁸ Joje jongoye gi rieko aka jomiŋ; fonji ma cal jomiyo k'opokere kodi yath!

⁹ Feza m'onyadhi ikelo wok Tarsis, kodi zahabu wok Ufaz. Jobedo tic pa japac kodi tic ma cingi jathedhi zahabu; ruk pajo obedo manyabululu kodi mar'ariŋo; joje jobedo gima jondijo am'otimo.

¹⁰ To Rwoth obedo Were mar'adieri; go obedo Were makwo kodi Kere ma cil gi cil. I keme pere piny yengere, aka nonin kinyal ciro nge pere.

¹¹ Wibino waco rijo ama: Werin ma jok'ocweyo polo gi piny jolakisika wok i piny kodi wok i pendi polo.

Wer ma pak ri Were

¹² Obedo Rwoth m'ocweyo piny gi meni pere, go m'ocako piny gi rieko pere, aka gi niaŋ pere to yaro polo.

¹³ Ka go ogoyo dwonde, pi mor i polo, aka go miyo tor ay wok i tielo ma piny. Go miyo lithkoth pilin i koth, aka go wodho koyo wok i ot pere ma kan.

¹⁴ Ka ji joneno gime, jolokere mamiŋ ma jongoye gi ŋeyo; jothedhi zahabu je iketho jo i wickwot gi cal pajo; rupiri cal pajo jobedo gim'okom, aka jongoye gi kwo.

¹⁵ Jongoye kony, tic ma twodo; i hongo pajo ma gir'acula jolakisika.

¹⁶ Were pa Yakobo kicale jo; go ama timo kisi gimoro, aka go otieko yero nono ma Isiraili ni wobedi alunja pere; Rwoth pa lwak jolweny am'obedo nyinge.

Kadho wiloka ma bino

¹⁷ Ji ma Yerusalem, okar win! Coki win gigipiny mewin.

¹⁸ Kole Rwoth waco ama: Akidho dwiro woko ji ma piny i hongo me; alakelo kidamba kwoŋ jo ŋey jowonyal winjo.

¹⁹ Ji ma Yerusalem joywak ni, nga walimo litho marac! Adholin mawan k'ocangi. T'awaco ni, “Me gir'acula paran, aka aripo ciro.”

²⁰ Kayindi paran orey woko, aka dende paran je otur woko; nyithindho paran jokadho joweyan, aka jongoye kicutho; ongoye nyatoro m'oyar kayindi paran kendo, m'olier nangin mere ma geŋo.

²¹ Kole jotel mawan jomiŋ, jokipenji Rwoth gir'atima; riameno ongoye gima jotimo to kadho maber aka ji pajo je jokedhere.

²² Winji, mikwenda eno bino nywowirok madwoŋ wok i piny ma yumalo ma loko tindin madongo ma Yuda kam'ojwangi kam'ondiek jobed'iye.

²³ Aŋeyo, awi Rwoth, ni ji wegi jokidhum kwo pajo, ni ji ka jowotho wegi jokinyuthere ka luwo.

²⁴ Tir wan, awi Rwoth, to i nger ma ripo; kosa imiy wan gir'acula ka nge omakin, kole inyalo reyo wan woko.

²⁵ Konji keme perin kwoŋ nonin ma fodi jokuya in, kodi kwoŋ ji ma jokilwoŋ nyingin; rupiri jotieko neko ji perin; jotieko reyo woko wan kicutho to joweyo piny mawan nono.