Yakobo 2 - KITAWO MALEŊ Catholic

Nyutho pokirok i dier ji kiber

¹ Wutmera gi nyimin, i kwo mewin paka jom'oyeyo Rwoth Yesu Kristo, Rwoth madwoŋ, wikiri wiyer ji munyo wiŋisa joman ro cal pajo ma woko.

² Ka jaŋaŋo moro m'oruko peta ma zahabu gi ruk mabeyo obino i romo mewin, to jacandi moro m'oruko oselo bende bino,

³ to wimiyo jaŋaŋo dwoŋ ka wiwaco rigo ni, “Bedi i kom m'oasa bero me.” To wiwaco ri jacandi ni, “cungi kaca, kosa ni bedi piny i lowo dho tiendan ka.”

⁴ Meno onyo wikibenga ikelo pokirok i dier win kareno wilokere paka jothumi banjin ma paro pajo reco?

⁵ Winji win wutmera! Wiparo ni Were k'oyero jocandi ma piny ka bedo jom'oŋaŋ i yeyo, gi lunjo Ker ma go ociko jom'omaro go?

⁶ To kole wicayo jocandi! Ŋata diyo win aka yware gi win tero win i kapido, ki joŋaŋo?

⁷ Ki jono ama joluwo marac kwoŋ nyingi ŋataber m'ilwoŋo win gine no?

⁸ Ka wimako maber cik ma Ker ma nwaŋere i ndiko ma waco ni, “Mari nyawotin paka iwon imarere.” Meno witimo gim'otire.

⁹ To ka wipoko ji cungo kwoŋ cal pajo ma woko, meno witimo gimarac, aka itero win paka jotur cik cungo kwoŋ Cik manitie.

¹⁰ Kole ŋata turo nyaka kada or acel ma Cik bedo jabanja paka ŋat'oturo cik je.

¹¹ Ato ŋat'owaco ni, “Ikir'itim cot.” Ama bende owaco ni, “ikir'ineki.” Kad'ikitim cot, to k'ineko dhano meno kole itieko bedo jatur cik.

¹² Riameno luw win, odoko bedi win gi tim, paka ji m'ibino thumo rijo banja cungo kwoŋ cik ma kelo siem,

¹³ rupiri Were k'onyuthi wor ri ŋata k'onyutho wor ri wadi. To ŋata nyutho wor meno otieko loyo banja.

Yeyo gi tim

¹⁴ Wutmera gi nyimera! Bero aŋo m'obedi ri dhano ka waco ni, “Anitie gi yeyo.” To tim pere kinyuthi ameno? Yeyo pere no won kende dinyal botho go?

¹⁵ Paka ranen, bedi nitie omin wan kosa nyamin wan m'ongoye gi gir'aruka kodi cemo ma romo,

¹⁶ bero aŋo manitie k'acel kwon win owaco rigo ni, “Were womiyin silwany, kadhi i siem aka icem maber.” Ma k'omiyo go gima yenyere i kwo?

¹⁷ Meno bende apaka yeyo won kende, ka tim ma thielo ongoye, bedo gim'otho.

¹⁸ To moro kwoŋ win bino waco ni, “Kole in gi yeyo; aka an gi tim.” Meno adwoko ni: “Nyuthan paka inyalo bedo gi yeyo m'ongoye tim; to an abino nyuthin yeyo paran i tim paran.”

¹⁹ Wiyeyo nike Were nitie acel? Meno ber! Kole jwogi bende joyeyo ameno aka jokirin gi lworo.

²⁰ Dhano mamiŋ! Imito wonyuthin nike yeyo m'ongoye tim ongoye kony?

²¹ Kere cango okethi kwari wan Abraham i tiro gi Were nedi? Kole obedo i tim, munyo go ocwayo ri Were wode Isaka wi migam.

²² Kenyo inyalo neno ni, yeyo pere kodi tim pere jotiyo kanyacel; aka yeyo pere oridhi i tim pere.

²³ Aka ndiko otundo i kare ma waco ni, “Abraham oyeyo Were, aka ro yeyo pere Were okwano go paka ŋat'otire.” Aka Were olwoŋo go ni, mere paran Abraham.

²⁴ Am'omiyo wineno ni dhano iketho i tiro gi Were kwoŋ gima go timo, makiweno kwoŋ yeyo kende.

²⁵ Apaka bende obedo gi Rahab m'oyido tana delkwoŋe i timo giwickwot; okethi go i tiro gi Were ro tim pere munyo go ojolo jopendo pa Joyuda to wodho jo gi yu royo man.

²⁶ Ato paka del m'ongoye cuny meno gim'otho, apaka bende yeyo m'ongoye tim meno gim'otho.