Tito 3 - KITAWO MALEŊ Catholic

Kite manyakristo

¹ Poyi ji perin ni joripo mwolok ri jodhum kodi rwodhe, winjo jo, gi yikirok timo gimoro je maber.

² Ceri jo luwo marac kwoŋ nyatoro, to jowobedi m'ongoye dhawirok, jomamwol, aka ndir je jowonyuthi kite mabeyo ri ji je.

³ Kole wan wegi onwaŋo yado wamiŋ, wajocay, aka oyido orweny wan woko. Wan oyido wabedo ŋecin pa awanya kodi kisangala ma piny; oyido waoro kwo mawan ma timo ri ji raco kodi nyeko; oyido wadakere gi ji.

⁴ To munyo bero kodi mar pa Were ma Jaboth mawan onenere,

⁵ go obotho wan; ki ro tic mabeyo moro m'onwaŋo wawegi watieko timo, to ro wor pere won. Go obotho wan gi lwoki ma Cuny Maleŋ omiyo wan gine nywolirok manyen kodi kwo manyen.

⁶ Kole Were okonjo riwan Cuny Maleŋ i thotho, luwo kwoŋ Kristo Jaboth mawan,

⁷ nike paka otieko ketho wan i tiro gi nema pere, wanyal bedo nyithindho pere makayo kareno wageno lunjo kwo makirum.

⁸ Me wac mar'adieri. Amito ni imedi ridho gigipiny me, ŋey nyaka jom'oyeyo Were jowonyal miyirok i timo tic mabeyo. Gigipiny me beyo odoko dikony ri ji je.

⁹ To weyi donjo i piem ma miŋo, gi tito tiendi wat kwoŋ bol maboyo ma nyingi kwarere pajo, tiakirok gi dhawirok kwoŋ Cik. Gigipiny me ongoy'iye cwe odoko ongoye kony.

¹⁰ Tem juko jakeli pokirok dicel kosa dirio, aka rumacen ingoye kodi go gi tic.

¹¹ Kole iŋeyo nike ŋata pameno okom, aka reco pere nyutho nike go won ocowo thumo banja pere.

¹² Ka tekin adhiro Aritema kosa Tikiko bongin, item paka inyalo bino bongan i Nikopoli, rupiri atieko yiko bedo kenyo i hongo ma pe ŋic'iye piny.

¹³ Tem paka inyalo konyo Zena japido ri cik kodi Apolo i woth pajo, akinen ni jonitie gi gimoro je ma joyenyo.

¹⁴ Ji mawan joripo fonjere timo tic mabeyo, ŋey jowolimi gikonyirok ma noknok aka nyaka jokiri jowobedi gi kwo m'ongoye kony.

¹⁵ Joma wan gi jo je jodhiro riwin moth. Mothi riwan ji je ma jomaro wan i yeyo. Nema pa Were wobedi gi wijoje.