Ruth 1 - KITAWO MALEŊ Catholic

Elimelek gi peco pere jotuk i Mowab

¹ I hongo ma Joisiraili oyido fodi jongoye gi kere, kec oyido nitie i piny. Jacwo moro ma wok i Bethelehem i Yuda okadho i piny Mowab, go gi cege kodi wote ario.

² Jacwo no nyinge Elimelek; nyingi cege obedo Naume kodi wote ario Mahilon kodi Kilion. Jobedo Joefratha ma jowok i Bethelehem i Yuda. Jokadho iy'adec ma Mowab aka jodoŋ koro.

³ Munyo jonitie i piny no, Elimelek cwor Naume otho, to weyo cege kodi wote ario.

⁴ Yac me jonywomo mon ma jowok i Mowab; acel oyido ilwoŋo ni Oripa aka man ni Ruth.

⁵ Munyo jotieko bedo kenyo ma romo oro apar, to Mahilon gi Kilion bende jotho; to Naume doŋ kende ma bu cwore kiri gi nyithindho.

Naume kodi Ruth jodok i Bethelehem

⁶ Munyo hongo moro okadho, Naume owinjo ni Rwoth omiyo ji pere silwany aka omiyo jo cemo. To go gi mondiwote joyikere ay i piny Mowab dok i piny Yuda.

⁷ Ameno dheno gi mondiwote joay to joweyo kam'oyido jobed'iye to jomako yo ma dok Yuda.

⁸ To munyo jowotho, Naume owaco ri mondiwote ni, “Kadhi win, kisi dhano wodoki i ot ma thugin. Weyi Were wotim gi win wor paka oyido wiworo jom'otho kodan.

⁹ Rwoth womiy win cwogi win man aka wibedi gi pecin.” Munyo Naume otieko waco ama opodho i kor jo to sewila jo, aka Ruth gi Oripa jogoyo ndur to joywak.

¹⁰ Jowaco ri Naume ni, “Be, waladok kodin bongi ji perin”.

¹¹ To Naume waco rijo ni, “Gik win mondiwotan. Raŋo wimito dok kodan! Lokere fodi anitie gi yac moro i iyan ma jolokere cwogi win.

¹² Dok win mondiwotan, maki win yo mewin, kole an onyo ati swa ma bedo gi jacwo.

¹³ Aka makada nende abedi gi geno t'anwaŋo jacwo wor me won t'anywolo yac, winokur jo cuka jodongi! Winobedi ma wikinywomere ka wikuro jo! Be mondiwotan, cunyan raman swa ro win; kwoŋbedo Rwoth otieko miyan candirok”.

¹⁴ Wac me omiyo doko jogoyo ndur aka joywak; aka Oripa opodho i kor adhamere to sewila go, to Ruth ocwire kwoŋe.

¹⁵ Naume owaco ri Ruth ni, “Neni, nyekin dok bongi jothugin, bongi werin pajo; ibende dok gi go”.

¹⁶ Ruth odwoko ni, “Ikir'iroman weyin kosa weyo luwin, kole kam'inokidh'iye alakidho, kam'inobed'iye alabedo; ji perin jolabedo ji paran, aka were perin labedo were paran

¹⁷ kam'inoth'iye abende abino tho iye, t'iyikan kenyo. Weyi Rwoth wotim gime ran aka kiri maloyo makada nende tho opok wan”.

¹⁸ Naume munyo otieko neno paka Ruth oridho dok gi go oliŋ ma k'owaco gimoro.

¹⁹ Ameno jocako nywako yo kanyacel cuka jotundo i Bethelehem. Aka munyo jotundo i Bethelehem, tindi gibe obwok to mon waco ni, “Me Naume!”

²⁰ Go owaco rijo ni, “Wikiri wilwoŋan ni Naume, lwoŋan win ni Mara, kole Jameni je otieko tic kodan gi gwayo.

²¹ Akadho munyo abup, Rwoth onyo odwokan thangalala. Raŋo wilwoŋan ni Naume, ma Rwoth otieko kelo ran candirok gi kidamba!”

²² Ameno Naume odok gi ciwode Ruth ma wok i piny Mowab. Jotundo i Bethelehem munyo nyaka ocaki keco ŋano.