Obadia 1 - KITAWO MALEŊ Catholic

Gir'acula ri ji ma piny Edom

¹ Me wac pa Rwoth Were m'obino ri Obadia tuco ma mako kwoŋ piny Edom. Rwoth ooro jamikwenda pere bongi piny je, aka watieko winjo mikwenda pere. Yikere win wakadhi i lweny gi Edom.

² Neni, abino lokin masisiri i piny je, aka kisi nyatoro bino cayin.

³ Pakirok ma cunyin otieko wondin, in m'ibedo wi got malo, iwaco i cunyin ni, “Ŋa manyalo ywayan piny?”

⁴ Makada nende inoay paka ango, makada nende odin obedi i pondeponde, je fodi abino ywayin piny.

⁵ Ka jokwo jobino bongin, ka jokinyaga jobino wor, jokwanyo gima jomito kende. Ka ji jofono nyingi vini, joweyo ye manok. To jokwor perin jotieko kisika in woko kicutho.

⁶ Nyikway Esau, lim mewin otiek kinyaga woko,

⁷ ji m'oyido joriwere kodin jotieko wondin, joriemin woko i piny perin. Ji m'oyido jonitie i siem kodin, onyo pama jokengila in. Merin perin m'oyido i cemo gi jo jociko in gi bwo jowaco ni, “Nikune rieko m'oyido go nitie gine je?”

⁸ I ndelo no abino miyo gir'acula, abino kisika woko cwo mariek, t'awaro woko rieko pajo.

⁹ Cwo ma jolweny i tindi Teman je jobino bwok, aka kisi jalweny i piny Edom ibino neko.

Atoŋa ma miyo Edom gir'acula

¹⁰ Rupiri ikwalo t'ineko, wutmin in nyikway Yakobo, ibino kisika in, aka ikilalimo wor cil gi cil.

¹¹ Ipor gicen i ndelo no, munyo jokwor pajo joturo waŋkac pajo. In bende oyido icale jopath no, ma jotiŋo lim pa Yerusalem aka jopoko i dier jo.

¹² Dinyo ikisiemere, kwoŋ lifol pa wutmin in ma Yuda. Dinyo ikisangala, i ndelo ma rerok pajo. Dinyo ikipakere, i ndelo ma rembo pajo madwoŋ.

¹³ Dinyo ikidonjo i tindi pa ji paran, siemirok kwoŋ candirok pajo, kodi kinyaga gigipiny pajo, i ndelo ma teko pajo.

¹⁴ Dinyo ikicungo i jangi yo, mako jom'oyido jotemo ringo. Dinyo ikimiyo jo i cingi jokwor pajo, i ndelo ma rembo pajo madwoŋ.

Were bino thumo banja ri nonin

¹⁵ Ndelo cegin ma An Rwoth, abino thumo banja ri kisi piny. Edom, gim'itieko timo ibino timo rin bende, aka tim perin bino gik i wiyin.

¹⁶ Ji paran jomadho kikopo makec ma gir'acula, wi got paran maleŋ. To piny je thoko bino madho, kikopo makec loyo ma gir'acula, jobino madho je to jorere.

Loyo pa Isiraili

¹⁷ To wi got Zayon jomegi jobino kwale, aka bino bedo Kabedo Maleŋ. Ji pa Yakobo jobino bedo gi lim pajo wegi gi lowo pajo wegi.

¹⁸ Ji pa Yakobo gi Yozefu jobino cale mac, aka jobino kisika woko ji pa Esau, paka mac sika woko kanja. An Rwoth atieko luwo.

¹⁹ Ji ma yupiny ma Yuda jobino bedo i Edom, aka ji ma yupodho ceŋ jobino mako piny Filistia. Joisiraili jobino bedo iy'adec ma Efrayim kodi Samaria, aka ji pa Benyamin jobino tero Giliad.

²⁰ Jolweny m'oyido joringo wok yumalo ma Isiraili, jobino dwoko to jobedo Fonisia, tundo kiri yumalo ma Zarefath. Jom'oyido joringo wok i Yerusalem ma jonitie i Sardis, jobino mako tindin manitie yupiny ma Yuda.

²¹ Cwo ma jotieko loyo i Yerusalem, jobino monjo Edom to jodhumo. Aka Rwoth won bino bedo kere.