Nehemia 2 - KITAWO MALEŊ Catholic

Nehemia kadho i Yerusalem

¹ I dwe ma Nisan i oro piero ario ma dhum pa Kere Aritakises, atero rigo vini. Kere oyido fodi k'oneno ka waŋan ongoye gi siem ruwaŋe.

² Ameno kere openjan ni, “Raŋo waŋin ongoye siem, kucel k'obedo ni itwo? Ripo bedo ni ingoye gi kisangala.” Kenyo oyido apoŋ gi lworo swa

³ aka adwoko kere ni, “Weyi kere paran woyindira! Waŋan obedi nedi gi siem, munyo tindi madwoŋ, kam'oyik'iye kwarere paran odoŋ gunda aka waŋkace mere mac oreyo woko?”

⁴ Kenyo kere openjan ni, “Kwac perin aŋo?” Ameno akwayo Were ma i polo,

⁵ aka awaco ri kere ni, “K'inen sangala kere, aka k'inen ŋeca perin onwaŋo wor ruwaŋin, akwayin ioran i Yuda, tindi madwoŋ kam'oyik'iye kwarere paran, ŋey anyal geto kendo.”

⁶ Kere openjan ni, “Ilacowo koro hongo aŋo aka iladwoko keraŋo?” I sawa no nyamicala oyido obedo i kabuti kere.

⁷ Kenyo awaco ri kere ni, “K'inen sangala kere, weyi womiyan balwin ri jogavana mar'adec ma yupodho ceŋ ma Yufrete, ma yeyan woth cuka atundo i Yuda;

⁸ kodi balwa man ri Asaf, jakur lul pa kere, ma miyo go or miyan mbawo ma geto waŋkace gi kor tindi madwoŋ, gi ot paran ma nindo.” Kere omiyan gigipiny m'akway je, kwoŋbedo Were oyido nitie kodan.

⁹ Kenyo abino bongi jogavana ma yupodho ceŋ ma Yufrete, aka amiyo jo balwin ma kere ondiko. Onyo kere oyido omiyan jotel jolweny gi jogwey kayinin kwaŋan.

¹⁰ To munyo Sanbalat ma wok i Bethhoron, gi Tobia, jadhum mar'adec ma Amon jowinjo gime, k'osangala jo swa neno ni nitie ŋat'oyido obino rango bero pa Joisiraili.

¹¹ Ameno akadho i Yerusalem, aka ma ndelo adek

¹² akiwaco ri dhano gima Were oyido oketho i cunyan timo ri Yerusalem. Ogwaŋ ma watero kende obedo punda m'oyido agweyo.

¹³ Kenyo aay malo wor gi Waŋkac ma Milelo kalo Waŋ pi pa Bulir kiri i Waŋkac ma Woyo. Akaŋasa kor tindi madwoŋ m'oyido otur gi waŋkace ma mac oyido owaŋo woko.

¹⁴ Kenyo amedere kiri i Waŋkac ma Kidiwa kiri i Kabuko pi pa kere, to yo oyido ongoye m'ogwaŋ m'oyido agweyo nyalo luwo.

¹⁵ Ameno aloro piny aka aluwo i milelo wor t'akaŋasa kor ot. Kenyo awire t'adonjo gi Waŋkac ma Milelo, t'adwoko.

¹⁶ Ongoye kwoŋ jodhum ma tindi madwoŋ m'oŋeyo kam'oyido akadh'iye kosa gim'oyido atimo; kole oyido fodi akiwaco ri Joyuda, jocway ri Were i wi migam, jotel, jodhum, gi joman m'oyido joripo timo tic.

¹⁷ Kenyo awaco rijo ni, “Wineno teko ma wanit'iye, nger ma Yerusalem odoŋ gunda aka waŋkace mere owaŋ! Biye win, weyi wageti kendo kor ot ma Yerusalem, ŋey wickwot me worum.”

¹⁸ Awaco rijo nger ma Were oyido nitie kodan aka okonyan, gi gima kere oyido owaco ran. Jodwoko ni, “Weyi wacak geto kendo!” Ameno wegi jomiyere cako tic.

¹⁹ To munyo Sanbalat Jahoron, Tobia ŋeca, Joamon gi Jamwarabu m'ilwoŋo ni Gesem jowinjo gim'oyido wacano timo, jonyero wan aka jowaco ni, “Wiparo ni witimo aŋo? Wilagwenyere kwoŋ kere?”

²⁰ Adwoko jo ni, “Were ma i polo ama lamiyo wan loyo. Wabedo ŋecin pere, aka wakidho cako geto; to win wingoye gi dwoŋ kwoŋ lim ma Yerusalem je, aka wingoye g'adec i thenethene mere.”