Nehemia 12 - KITAWO MALEŊ Catholic

Jocway ri Were i wi migam kodi Jolevi ma jodwoko wok i twec

¹ Me nyingi jocway ri Were i wi migam kodi Jolevi ma jodwoko wok i twec gi Zerubabel wod Sealtiel kodi Yesuwa jadwoŋ pa jocway ri Were i wi migam: Seraya, Yeremia, Ezira,

² Amaria, Malik, Hatus,

³ Sekaniya, Rehum, Meremoth,

⁴ Ido, Ginethoi, Abija,

⁵ Miyamin, Madia, Bigla,

⁶ Samaya, Yoyarib, Yedaya,

⁷ Salu, Amok, Hilikia, Yedaya. Cwo me oyido jobedo jotel pa jocway ri Were i wi migam wadi jo je i hongo pa Yesuwa.

⁸ Jolevi: Yesuwa, Binuy, Kadmiel, Serebia, Yuda, kodi Matania. Cwo me am'oyido jotelo wer ma miyo foyo.

⁹ Cwo me: Bukbukia, Uno, kodi Jolevi wadi jo oyido jokworo wer.

Nyikway Yesuwa jadwoŋ pa jocway ri Were i wi Migam

¹⁰ Yesuwa obedo ba Joyakim, Joyakim obedo ba Eliasib, Eliasib obedo ba Yoyada,

¹¹ Yoyada obedo ba Yonathan, aka Yonathan obedo ba Yaduwa.

Jotel nonin pa jocway ri Were i wi migam

¹² Munyo Joyakim oyido obedo jadwoŋ pa Jocway ri Were i wi migam, me jocway ri Were i wi migam m'oyido jobedo jotel nonin pajo: Meraya jatel nono pa Seraya, Hanania jatel nono pa Yeremia,

¹³ Mesulam jatel nono pa Ezira, Yehohanan jatel nono pa Amaria,

¹⁴ Yonathan jatel nono pa Maluk, Yozefu jatel nono pa Sebania,

¹⁵ Adina jatel nono pa Harim, Helkai jatel nono pa Merayoth,

¹⁶ Zekaria jatel nono pa Ido, Mesulam jatel nono pa Ginethon,

¹⁷ Zikiri jatel nono pa Abija, Pilitai jatel nono pa Mowadia,

¹⁸ Samuwa jatel nono pa Bilga, Yonathan jatel nono pa Samaya,

¹⁹ Matenay jatel nono pa Yoyarib, Uzi jatel nono pa Yedaya,

²⁰ Kalay jatel nono pa Salay, Eber jatel nono pa Amok,

²¹ Hasabia jatel nono pa Hilikia, aka Nathanel jatel nono pa Yedaya.

Pecin pa Jolevi kodi Jocway ri Were i wi migam

²² I hongo pa jodongo pa jocway ri Were i wi migam, Eliasib, Yoyada, Johanan, kodi Yaduwa, tundo kiri i hongo ma dhum pa Kere Dario ma Pasia, ondiki nyingi jotel ma pecin pa Jolevi kodi jocway ri Were i wi migam.

²³ To ongoye gim'ondiki kwoŋ jotel ma pecin pa Jolevi munyo Yonathan, nyakwar Eliasib otieko tho.

Poko tic ma Ot pa Were

²⁴ Jotel pa Jolevi, Hasabia, Serebia, Yesuwa, Binuy, kodi Kadmiel kodi wadi jo, jopoko Jolevi i kitipin ario, miyo Were pak, paka Kere Daudi, jacwo pa Were oyido owodho or.

²⁵ Matania, Bakbukia, Obadia, Mesulam, Talmon, kodi Akub am'oyido jokuro kisikin ma kan macegin gi waŋkace ma Ot pa Were.

²⁶ Cwo me je jobedo i hongo pa Joyakim, wod Yesuwa aka nyakwar Yehozadak, kodi Nehemia gavana, kodi i hongo pa Ezira, jacway ri Were i wi migam m'oyido obedo jafonji Cik.

Nehemia ketho kor Ot i cingi Were

²⁷ Munyo iketho kor ot ma tindi madwoŋ i cingi Were, olwoŋi Jolevi wok i kisi kabedo pajo bino i kalima gi miyo foyo gi wer kodi forok ka jotuko tongol, adungu kodi gi wer man.

²⁸ Jolevi jocokere wok kam'oyido jobed'iye thoko Yerusalem kodi wok i tindin thoko Netofa,

²⁹ kodi wok i Bethgilgal, Geba, kodi Azimaveth.

³⁰ Jocway ri Were i wi migam kodi Jolevi jotimo kwer ma lonyo jo, ji, waŋkace, kodi kor ot ma tindi madwoŋ.

³¹ Kenyo an, Nehemia, akelo jotel ma Yuda i wi kor ot, aka amiyo jo telo kitipin ario ma joŋanjo thoko tindi madwoŋ i wi kor ot, ka jomiyo Were foyo. Kitipa acel okadho yuracam tundo i Waŋkac ma Woyo,

³² aka Hosaya kodi adec ma jodhum joluwo jo cen.

³³ Kenyo oluwo jocway ri Were i wi migam: Azaria, Ezira, Mesulam,

³⁴ Yuda, Benyamin, Samaya, kodi Yeremia,

³⁵ joje oyido jokudho gwarin. Ŋat'oluwo obedo Zekaria, wod Yonathan aka nyakwar Samaya aka janono pa Asaf. Kwarere pere man jobedo: Matania, Mikaya, kodi Zakur.

³⁶ Kenyo oluwo jonono pa Asaf man: Samaya, Azarel Milalai, Gilalai, Mai, Nethanel, Yuda, kodi Hanani, joje oyido jotiŋo gi wer pa Kere Daudi, jacwo pa Were. Ezira jafonji Cik otelo kitipa me.

³⁷ I Waŋkac ma Kidiwa, joidho madala malo kadho i Tindi madwoŋ pa Daudi, kalo peco pa Daudi, gik i kor ot i Waŋkac ma Waŋ pi, i thenge ma yuwok ceŋ ma tindi madwoŋ.

³⁸ Kitipa mar'ario pa ji ma jomiyo foyo joluwo yuracuc i wi kor ot, aka aluwo jo, kanyacel gi adec man pa jotel ma Yuda. Wakadho kalo Acurcur ma Oven, kiri i Kor ot ma Woko,

³⁹ aka wok kenyo wakadho kalo Waŋkac pa Efrayim, Waŋkac pa Yesana, Waŋkac ma Rec, Acurcur ma Hananel, Acurcur ma Miya, kiri i Waŋkac ma Rombo. Wacungo cegin gi waŋkac ma Ot pa Were.

⁴⁰ Ameno kitipin ario je m'oyido jomiyo Were foyo joromo ruwaŋ Ot pa Were. I kitipa paran oyido nitie adec ma jodhum,

⁴¹ kodi jocway ri Were i wi migam me m'oyido jokudho gwara: Eliakim, Maseya, Miniamin, Mikaya, Eliowenay, Zekaria, kodi Hanania;

⁴² aka cwo me oyido joluwo jo: Maseya, Samaya, Eliazar, Uzi, Yehohanan, Malikija, Elam, kodi Ezer. Yezrahia am'oyido telo jower.

⁴³ I ndelo no omiy cowirok madwoŋ aka ji oyido jofore kwoŋbedo Were omiyo jo kisangala. Mon kodi nyithindho bende jofore, aka kisangala pa Yerusalem owinjere bor swa.

Tic ma Ot pa Were

⁴⁴ I ndelo no oyer cwo bedo jotel ma kisikin ma kano mic ma Ot pa Were, kiri gi acel wiy apar, kodi ŋano marapena gi olemo macek kisi oro. Cwo me oyido joripo coko mic pa jocway ri Were i wi migam kodi Jolevi wok i ndelin macegin gi tindin madongo paka Cik waco. Ji ma Yuda je oyido josangala gi jocway ri Were i wi migam kodi Jolevi,

⁴⁵ kwoŋbedo oyido jotimo kwer ma lonyo ji kodi tic man ri Were pajo. Jower kodi jokur ma Ot pa Were bende jotimo tic pajo paka Kere Daudi kodi wode Solomon joketho cik.

⁴⁶ Wok i hongo pa Kere Daudi kodi jawer Asaf cango con, oyido nitie jatel pa jower kodi wer ma pak kodi ma miyo Were foyo.

⁴⁷ I hongo pa Zerubabel kodi i hongo pa Yeremia, Joisiraili je jomiyo mic ma kisi ndelo ma thielo jower kodi jokur ma Ot pa Were. Ji jomiyo Jolevi mic pajo, aka Jolevi jomiyo jocway ri Were i wi migam mic pajo.