Nehemia 1 - KITAWO MALEŊ Catholic

Nehemia winjo wac kwoŋ Yerusalem

¹ Me wac pa Nehemia wod Hakalia. I dwe ma Kislev i oro ma piero ario munyo Aritakises obedo kere ma Pasia, an, Nehemia oyido anitie i tindi madwoŋ Susa

² Hanani, acel kwoŋ wutmin an, obino bongan gi cwo mogo wok i Yuda, aka apenjo jo kwoŋ Joyuda m'oyido jodwoko wok i twec gi kwoŋ Yerusalem.

³ Jodwokan ni, “Ji ma jodwoko wok i twec jonitie gi teko kweth swa aka jonitie i wickwot. Kor ot ma Yerusalem otur aka owaŋ waŋkace mere gi mac.”

Nehemia kwayo ri ji pere

⁴ Munyo awinjo wac me je, abedo piny t'aywak. Aywak aka ariyo kec ma ndelo m'oromo, kareno akwayo Were ma i polo.

⁵ Awaco ni, “Awi Rwoth Were ma i polo, idwoŋ aka walworin. Ikuro cikirok perin gi mar perin makiwire ri jono ma jomarin aka jokuro or perin;

⁶ ciki ithin, aka ŋiyan iwinji kwayo pa ŋeca perin m'akwayo wor g'odieceŋ ri Joisiraili me. Watuco reco mawan, wan Joisiraili. An gi peco pa baba watimo reco.

⁷ Watimo gikidakana kwoŋin aka wakitimo paka or perin waco. Wakikuro cik m'imiyo wan luwo kwoŋ Musa, ŋeca perin.

⁸ Poyi wac m'iwaco ri Musa ni, ‘Ka winongoye g'adieri ran, alakedho win i dier nonin man.

⁹ To ka winowire bongan timo paka or paran waco, aladwoko win i kabedo m'ayero ni wolaman'iye, makada nende obedi ni wikedhere kiri i gike piny.’ ”

¹⁰ “Rwoth, me obedo ŋecin perin, ji perin won. Ibotho jo gi meni perin madwoŋ gi cingin matek.

¹¹ Awi Rwoth, ciki ithin iwinji kwayo pa ŋeca perin gi ŋecin perin je ma jofore i lworo nyingin. Miyan loyo konon me, ŋey kere wobedi ran gi wor.” I hongo no oyido abedo jakonji ri kere vini.