Nahum 2 - KITAWO MALEŊ Catholic

Podho pa Ninivi

¹ Jamonji otieko ay ruwaŋin, gwoki cel; kur royo; ridhi pierin; coki meni perin je.

² Kole Rwoth ladwoko dwoŋ pa Yakobo, paka dwoŋ pa Isiraili, kole joreyi jotieko reyo woko jo, aka jotieko nyeko woko jangi jo.

³ Kwot pa jolweny pajo obokere; cwo ma jomeni joruko nangin m'obokere; Nyweny ma wi cawila cot mac, i ndelo ma go yiker'iye monjo, kayinin ma lweny joicere.

⁴ Cawilin jolatimere pa joneko i royin madongo, jorure acen gi malo i kabedo m'othangere; jomenyin pa lero, joŋweco acen g'amalo pa lithkoth.

⁵ Go lwoŋo jodhum pere; jotangatanga i woth pajo, jokwakere i kor ot mere, aka joyiko gi thoko mako.

⁶ Waŋkace ma thengi malawin otiek yawo, peco pa kere leny woko.

⁷ Otiek ridho ni wothangi nyamicala, ŋecin mere ma mon okwany jo woko, joywak pa dwondi akurin aka cuny jo gore.

⁸ Ninivi cale pi m'ocokere abuka, wok i ndelo mere ji joringo. Cungi! Cungi! Joywak, to ngoye ŋata wire cen.

⁹ Nyaga feza, nyaga zahabu! Ongoye gike ma lim! Dito ma kisi gimoro je ma welo.

¹⁰ Odoŋ nono, odoŋ nono, aka orere woko! Cuny podho gi lworo aka congi kirin, meni ongoye, ji jokirin, nyim jo ojowo bondo.

¹¹ Nikune kabedo pa simbwore, kodi lum pa nyithindhi simbwore, kama simbwor kadh'iye, simbwor madhako kodi nyithindhe, m'ongoye ŋata cando jo?

¹² Simbwor otieko yeco ma romo ri nyithindhe, aka odeyo gim'omako ri simbwor pere madhako; aka otieko poŋo ode gi gim'omako, kodi kabedo pere gi riŋo m'oyeco.

¹³ Kole adakin, Rwoth pa lwak jolweny waco, aka alawaŋo woko cawilin perin i yiro, abor laneko nyithindhi simbwore perin; alareyo woko giperin m'imako wok i piny, aka dwondi jomikwenda perin k'owinji kendo.