Mika 4 - KITAWO MALEŊ Catholic

Rwoth bino miyo ji siem

¹ Ndelo ma rumacen bino, ma got ma Ot pa Rwoth, bino bedo got mabor loyo, aka ibino tiŋo malo kalo tendere je, aka ji jobino mol i iye.

² Aka nonin kweth jolabino to jowaco ni, “Biye win, weyi wakadhi wi got pa Rwoth, i Ot pa Were pa Yakobo ŋey go wofonji wan yo pere, aka wawothi i yo pere.” Kole cik wok i Zayon, aka wac pa Rwoth wok i Yerusalem.

³ Rwoth bino thumo banja i dier ji kweth, kodi i dier piny ma jotek cegin gi bor. Jobino thedho abor pajo loko kwe dhok, gi toŋ pajo loko apalin ma kikolesa. Piny acel k'otiŋ abor kwoŋ piny man kendo, kosa jok'oyikere ri lweny kendo.

⁴ Kisi nyatoro bino bedo i siem i tiendi yath vini gi makuyu pere, aka ongoye ŋata bino miyo jo bedo gi lworo, kole dhok Rwoth pa lwak jolweny otieko luwo.

⁵ Kisi ji jowotho, i nyingi were pajo, to wan, wabino wotho i nyingi Rwoth Were mawan, cil gi cil.

⁶ I ndelo no, Rwoth waco, abino coko kanyacel jor'aŋolo, jono ma riemo jo woko, kodi jono m'atieko miyo litho.

⁷ Alaloko jor'aŋolo ji m'odoŋ, aka jom'oyido abolo woko, alaloko piny madwoŋ. Rwoth bino dhumo jo wi got Zayon, wok pama kadho yuwaŋe aka cil gi cil.

⁸ Paka ri in, Yerusalem, kama Rwoth kur'iye ji pere paka jakwath rombo, ibino bedo tindi madwoŋ ma ker m'oyido obedo aperin kendo.

⁹ Onyo raŋo wigoyo ndur? Kere ongoye i dier win? Jamic rieko mewin otho, ma wicandere paka dhako ma ŋedi ramo?

¹⁰ Dwanyere win aka wiuja ji ma Yerusalem, paka dhako ma colo nyathi. Kole onyo pama wilawok i tindi madwoŋ, to wibedo i piny m'othangere; wibino kidho i Babilon. Kenyo ibino botho win, kenyo Rwoth bino botho win, wok i cingi jokwor mewin.

¹¹ Onyo pama piny kweth, jocokere monjin, jowaco ni, “Weyi warey Yerusalem, aka wanen ni go orere.”

¹² To jokuya paro pa Rwoth, jokiniaŋ can pere nike go otieko coko jo paka ŋano m'itero i kisia.

¹³ Rwoth waco ni, “Ji ma Yerusalem, kadhi win wimiy jokwor mewin gir'acula! Abino loko win matek pa thwon, manitie gi tunge ma nyweny kodi tiende ma ywel. Wibino ŋinyo piny kweth, aka lim ma jolimo g'akaka, wibino miyan, Rwoth ma piny gibe.”