Matayo 27 - KITAWO MALEŊ Catholic

Itero Yesu bongi Pilato

¹ Odikin munyo piny oyawere, jotel pa jocway ri Were i wi migam je kodi jotel pa ji joyiko can ma neko Yesu.

² Jotweyo go, jokadho gine, to joketho go i cingi Pilato, jadhum ma Roma.

Tho pa Yuda

³ Munyo Yuda, jacami ri Yesu sereko oniaŋ ni otiek thumo ri Yesu banja ma tho, owinjo malith i cunye to dwoko nusu feza piero adek ri jotel pa jocway ri Were i wi migam gi jotel pa ji, ka waco ni,

⁴ “Atieko timo gimarac icamo sereko ri dhano m'ongoye gi raco ni woneki.” To jono jowaco ni, “Wan wadewo ri waye kwoŋ gino? Meno makin.”

⁵ To Yuda bolo nusu feza no i Ot pa Were kenyo to kadho; to kidho dere.

⁶ To jotel pa jocway ri Were i wi migam jokwanyo nusu feza no munyo jowaco ni, “Wakiripi ketho pesa me i kakan ma Ot pa Were rupiri obedo pesa ma remo.”

⁷ Riameno joyere to jonyewo gine ndelo pa jacwec degi moro, paka kayik pa jokicar.

⁸ Am'omiyo ndelo no ilwoŋo ni Ndelo ma Remo kiri konon.

⁹ Gikenyo gima Yeremia jatuci wac Were owaco otundo i kare ni, “Jokwanyo nusu ma feza piero adek, welo ma Joisiraili joyere gine ma nyewo kwo pere,

¹⁰ aka jooro ma nyewo ndelo pa jacwec degi, paka Rwoth ooran.”

Pilato penjo Yesu

¹¹ Yesu ocungo ruwaŋ jadhum ma Roma m'openjo go ni, “Ibedo Kere pa Joyuda?” Yesu odwoko ni, “Ato eno iwaco.”

¹² To munyo jotel pa jocway ri Were i wi migam kodi jotel pa ji josegeya go, k'odwoko gimoro kwoŋ wac pajo.

¹³ Riameno Pilato openjo go ni, “Ikiwinji paka joketho kwoŋin wac kweth?”

¹⁴ To Yesu k'odwoko wac moro; gime omiyo Gavana no ouro go tektek.

Ithumo ri Yesu banja ma tho

¹⁵ Ndiri je, i kisi kalima madwoŋ ma Kadho, jadhum madwoŋ ma Roma yado maro gonyo jatwec moro acel ma lwak ji okwayo.

¹⁶ I hongo no oyido nitie jatwec m'oŋeyere m'ilwoŋo ni Baraba.

¹⁷ Am'omiyo munyo lwak ji ocokere, Pilato openjo jo ni, “Wiyenyo agony riwin ŋa? Baraba kosa Yesu m'ilwoŋo ni Kristo?”

¹⁸ Ato go onwaŋo oŋeyo maber nike jokelo Yesu bongi go ro nyeko m'omako jo gine.

¹⁹ Munyo Pilato oyido obedo i ot wothum banja, cege odhiro rigo mikwenda, ni “Ikir'itim gimoro kwoŋ dhano ma bu raco no, rupiri nende wor acandere swa i lek ma mako kwoŋe.”

²⁰ Jotel pa jocway ri Were i wi migam kodi jotel pa ji jodwoŋo ji ni jowokway Pilato wogonyi Baraba ayin aka woneki Yesu.

²¹ To Pilato odoko openjo jo ni, “Kwoŋ j'ario me, ŋa ma wiyenyo agony riwin?” To jodwoko ni, “Baraba!”

²² Aka Pilato openjo jo ni, “To atim aŋo gi Yesu m'ilwoŋo ni Kristo?” Jodwoko ni, “Gur go kwoŋ musalaba!”

²³ To Pilato penjo jo ni, “Raco aŋo ma go otimo?” Gikenyo jocako koko gi dwondi gin ma malo swa ni, “Wogur go kwoŋ musalaba!”

²⁴ Gikenyo munyo Pilato onwaŋo ni ongoye kony medirok gi penji aka kucel ji oyido jomedo ameda woy ayino, okwanyo pi to logo cinge ruwaŋ ji, munyo waco ni, “Tho pa ŋatin kimaki kwoŋan; me obedo tim mewin wiwegi!”

²⁵ Lwak ji odwoko ni, “Remo pere wobedi kwoŋ wan gi nyithindho mawan!”

²⁶ Gikenyo Pilato ogonyo Baraba rijo; ooro jo cwado Yesu to cwayo go rijo ni wogur kwoŋ musalaba.

Jolweny jonyero Yesu

²⁷ Gikenyo jolweny jotero Yesu i cel pa Gavana, aka kitipa pajo gipi ocokere to thoko go.

²⁸ Jolunyo nangin pere to joruko rigo kanzu m'obokere.

²⁹ Gikenyo jodolo thac kudho i wiye pa sangaria to joketho midole i cinge maracuc pa kere; aka joguro congi gin piny to joloko go ginyero munyo joŋalo go ni, “Kere pa Joyuda woyindira!”

³⁰ Joŋulo kwoŋe law, aka jokwanyo midole no to jogoyo gine wiye.

³¹ Munyo jotieko nyero go, jolunyo kanzu no to joruko rigo nangin pere won, aka jowodho go woko kidho guro go kwoŋ musalaba.

Iguro Yesu kwoŋ musalaba

³² Munyo jokadho, joromo kodi nyatoro m'owok Sireno ma nyinge Simon, to jomiyo go cukirok gi tiŋo musalaba pa Yesu.

³³ Jotundo kam'ilwoŋo ni Golgotha, dwoŋ mere ni, “Kama dikahanga wic ji.”

³⁴ Kenyo jomiyo go vini m'oruw gi pigi yath makec pa kedhino ni womadhi ma konyo go; to munyo go otieko bilo, k'oyeyo madho.

³⁵ Joguro go kwoŋ musalaba, to jopoko nangin pere munyo jogoyo kwir.

³⁶ Rumacen jobedo piny kenyo kuro go.

³⁷ Yuwiye malo ondiki wac m'oosa gine go ni, “Me Yesu, Kere pa Joyuda.”

³⁸ Gikenyo joguro jokwo moro ario kwoŋ musalaba gi Yesu, ŋat'acel yuracuc, ŋatiman yuracam pere.

³⁹ Joma kadho kenyo joyengo wiy gin aka joyeto Yesu ni,

⁴⁰ “In m'onwaŋo ikidho kedho Ot pa Were t'igero man i ndelo adek, onyo iwon bothere! Aka k'inen ibedo Wod Were adieri ere lori wi musalaba wanen!”

⁴¹ Meno bende apaka jotel pa jocway ri Were i wi migam kodi jondiko kodi jotel pa ji joyeto go.

⁴² Jowaco ni, “Go obotho joman to won kinyal bothere. Go a Kere pa Joisiraili. Ere wolori wi musalaba no aka wanoyey wac pere.

⁴³ Kole go geno Were; aka owaco ni go Wod Were. Ere weyi wanen ka Were mito botho go pama!”

⁴⁴ Aka kiri jokwo m'ogur jo gine kwoŋ musalaba bende joyeto go i yo acel no won.

Tho pa Yesu

⁴⁵ Wok sawa aucel tundo sawa abuŋwen m'odieceŋ, piny gipi mudho oumo cowo hongo ma sawa adek.

⁴⁶ Dho kapa sawa abuŋwen, Yesu okoko gi derino madwoŋ ni, “Eli, Eli, lama sabac than?” Madwoŋ mere ni, “Were paran, Were paran, ijwangan raŋo?”

⁴⁷ Aka munyo jomegi kwoŋ jom'ocungo kenyo jowinjo gime, jowaco ni, “Jame lwoŋo Elia.”

⁴⁸ Ŋat'acel kwoŋ jo oringo mayot, okwanyo cangwe, obilo i vini, to ketho wi luth, aka otemo miyo go ni womadhi.

⁴⁹ To joman jowaco ni, “Kuri win, wanen ye ka Elia bino botho go!”

⁵⁰ Yesu odoko okoko malo aka nyaka oweyo cunye ocot, to tho.

⁵¹ Gikenyo nanga m'olier i Ot pa Were oyec ario wok malo kiri piny. Piny oyengere, telin obare,

⁵² Kaliele obare, aka ji pa Were mathoth jocerino i kwo kendo.

⁵³ Jowok i kaliele, aka munyo Yesu ocerino kwoŋ jom'otho, jokidho i Tindi Maleŋ, kama ji mathoth jonen'iye jo kendo.

⁵⁴ Munyo jasirikale madwoŋ kodi jom'onwaŋo ni bonge munyo jokuro Yesu joneno yengirok pa piny kodi giman je m'otimere, lworo omako jo to jowaco ni, “Adieri me oyido Wod Were.”

⁵⁵ Kenyo oyido bende nitie mon mathoth m'oyido joneno gima timere gi bor; jome joluwo Yesu wok i Galili munyo jokonyo go.

⁵⁶ I dier jo obedo Maria Magadalina, Maria min Yakobo gi Yozefu, kodi min wot Zebedayo.

Yiko Yesu

⁵⁷ Munyo piny oyutho, jaŋaŋo moro ma wok Arimatheya m'ilwoŋo ni Yozefu otundo; aka go oyido bende olokere jafonjirok pa Yesu.

⁵⁸ Go okidho bongi Pilato to kwayo delkwoŋ Yesu. Pilato owodho or ni womiy Yozefu delkwoŋ Yesu.

⁵⁹ Yozefu okwanyo del no, oboyo gi suka manyen,

⁶⁰ to ketho i kaliel pere won, m'oyido go nyaka ogworo i kor tele. Gikenyo go oŋilo kidi madwoŋ, oculo gine dhok kaliel no to kadho.

⁶¹ Maria Magadalina kodi Maria man oyido jobedo piny kenyo joŋiyo kaliel.

Jokur i kaliel

⁶² Yawere mere, i ndelo m'oluwo ndelo ma yikirok, jotel pa jocway ri Were i wi migam kodi Jofarisayo joromo kodi Pilato to jowaco rigo ni,

⁶³ “Jadwoŋ, wapoyo ni munyo jatwodo no oyido fodi kwo owaco ni, ‘Abino cerino i ndelo mar'adek.’

⁶⁴ Am'omiyo, wodhi or ma kuro kaliel pere tundo i ndelo mar'adek, ŋey jofonjirok pere jokiri jowonyal kidho kwalo go, to jowaco ri ji ni go ocerino kwoŋ jom'otho, aka twodo macowe me bino loyo m'otelo.”

⁶⁵ Pilato owaco rijo ni, “Ter win jokur wikuri kaliel no matek paka winyalo je.”

⁶⁶ Gikenyo jokidho to jomwono tele ma dhok kaliel matek, to joweyo jokur moro kenyo.