Matayo 26 - KITAWO MALEŊ Catholic

Can ma neko Yesu

¹ Munyo Yesu ocowo waco gigipiny me je, owaco ri jofonjirok pere ni,

² “Wiŋeyo ni ka ndelo ario orumo, Kalima ma Kadho bino tundo, aka ibino ketho Wod Dhano i cingi joma jolaguro go kwoŋ musalaba.”

³ Gikenyo jotel pa jocway ri Were i wi migam kodi jotel pa ji jocokere i diedipo pa jadwoŋ pa jocway ri Were i wi migam m'ilwoŋo ni Kaifas,

⁴ aka jocano mako Yesu nyaliŋliŋ jowoneki go.

⁵ “Wakiri watim gime i ndelo madwoŋ, rupiri ji jonyalo cako woy.”

Iwiro Yesu gi mo i Bethania

⁶ Munyo Yesu oyido nitie Bethania i ot pa Simon jadhowo,

⁷ dhako moro obino bonge kodi cupa mo ma welo kendo maŋwe kur, to konjo i wiye, kama go onwaŋo obed'iye dhower.

⁸ To munyo jofonjirok joneno ameno, joramere, to jowaco ni, “Onyeki mo me raŋo?

⁹ Kole gime d'onyal kitana pesa madit, t'imiyo jocandi!”

¹⁰ To Yesu, paka oŋeyo gime, owaco rijo ni, “Wikwinyo dhakodwoŋ me rango. Kole go ee otimo ran gimaber tektek.

¹¹ Winitie gi jocandi noknok, to wikilabedo kodan noknok.

¹² Kole go okonjo mo me kwoŋan ma yiko gine delkwoŋ m'ikidho yiko i kaliel.

¹³ Adieri awaco riwin, kamoro je ma Wac Manyen Maber me ofonj'iye i piny gipi, gima go otimo me ibino waco ma poyo go.”

Yuda yeyo camo sereko ri Yesu

¹⁴ Gikenyo acel kwoŋ jofonjirok apar g'ario, m'ilwoŋo ni Yuda Iskariot okidho bongi jotel pa jocway ri Were i wi migam,

¹⁵ to penjo ni, “Wibino miyan aŋo ka aketho Yesu i cingi win?” To jokwano rigo pesa ma nusu feza piero adek to jomiyo go.

¹⁶ Wok i hongo no Yuda odwaro royo ma nyalere ma ketho Yesu i cingi jo.

Yesu camo Kalima ma Kadho gi Jofonjirok pere

¹⁷ I ndelo marapena ma kalima ma mugat ma buthow, jofonjirok jobino bongi Yesu to jopenjo go ni, “Imito ni wayiki rin Kalima ma Kadho gi kune?”

¹⁸ To waco rijo ni, “Kidhi win i tindi i peco pa nyatoro wiwaci rigo ni, ‘Jafonji waco ni, hongo paran otundo; alacamo kalima ma Kadho kodi jofonjirok paran i ot perin.’ ”

¹⁹ Jofonjirok jotimo paka Yesu owaco rijo to joyiko Kalima ma Kadho.

²⁰ Munyo hongo m'othieno otundo, Yesu kodi jofonjirok pere apar g'ario jobedo piny cemo.

²¹ Aka munyo jocemo Yesu owaco ni, “Adieri awaco riwin, acel kwoŋ win bino camo ran sereko.”

²² Jofonjirok jodhier swa to jocako penjo go, acel acele ni, “Rwoth, iwacan?”

²³ Yesu odwoko ni, “Ŋat'opilo cemo i sen acel kodan ama bino camo ran sereko.

²⁴ Wod Dhano bino tho paka Ndiko Maleŋ waco, to kidamba bino bedo ri ŋati m'ocami rigo sereko! D'ober loyo bedi cango k'onywol go!”

²⁵ Gikenyo Yuda, jacami sereko, oluwo malo ni, “Adieri Jafonji, meno miti ikiwacan?” To Yesu dwoko ni, “Eno iwon iwaco.”

Cemo pa Rwoth M'othieno

²⁶ Munyo jocemo, Yesu okwanyo mugat, to miyo silwany to turo, to poko jofonjirok pere munyo waco ni, “Kwany win wicam; me delkwoŋ.”

²⁷ To kwanyo agwata, aka munyo otieko miyo silwany, omiyo jo munyo waco ni,

²⁸ “Madhi win giman'iye, wijoje; rupiri vini me obedo remo paran ma ridho cikirok manyen ma Were otimo gi ji pere, m'ooy ri ji mathoth ma cwako reco.

²⁹ Awaco riwin, akibino madho vini me kendo cuka ndelo m'anomadh'iye vini manyen gi win i Ker pa Baba.”

³⁰ Aka munyo jotieko wero wer ma pako Were, jowok woko to jokidho i got Oliv.

Yesu tuco kwedirok pa Petero

³¹ Gikenyo Yesu owaco rijo ni, “Wijoje wibino ringo to wiweyan wor ma konon, kole ndiko waco ni, ‘Abino neko jakwath to rombo tiakere woko.’

³² To k'atieko cerino, abino telo kidho riwin Galili.”

³³ Petero owaco rigo kamaler ni, “Kada joje joweyin, an akibino weyin.”

³⁴ Yesu owaco rigo ni, “Adieri awaco rin, wor ma konon won me, mafodi wod gweno k'okoko, ibino kwedere kwoŋan didek.”

³⁵ Petero odwoko go ni, “Kada bedi ni aripo tho kodin, ak'okwedere kwoŋin.” Aka meno apaka jofonjirok man je bende jowaco.

Yesu kwayo i Gethsemane

³⁶ Gikenyo Yesu okidho gi jo kama ilwoŋo ni Gethsemane, to waco ri jofonjirok pere ni, “Bedi win ka, fodi akidho ye gicen kwayo.

³⁷ Go okwanyo Petero kodi wot Zebedayo jario. Gikenyo cunye ocako ramo to bedo gi rem.

³⁸ Aka owaco rijo ni, ‘Cunyan raman tektek, pa kidho nekan. Bedi win ka, aka wibedi waŋ win kodan.’

³⁹ Aka munyo go omedere yumalo nyaka mathin, opodho gi nyime to kwayo. To waco ni, ‘Baba, ka nyalere, weyi agwata me woeye bongan. To weyi wobedi paka iyenyo makiweno paka an ayenyo.’ ”

⁴⁰ Yesu ogik bongi jofonjirok pere to nwaŋo jonindo, to waco ri Petero ni, “Adieri wikinyalo bedo waŋ win kodan kada nyaka ma sawa acel won?

⁴¹ Bedi win waŋ win wikway aka ŋey wikiri widonji i karatem. Cuny win yenyo, to del ama nyap.”

⁴² Odoko madirio, oeye to kidho kwayo. To waco ni, “Baba, ka agwata me kilaeye kwoŋan m'akimadho, weyi gim'iyenyo wotimere.”

⁴³ Go odoko odwoko to nwaŋo jonindo, rupiri nindo oyido dit swa i waŋ jo.

⁴⁴ Munyo oweyo jo kenyo, oeye kendo to kidho kwayo mar'adek, gi wac acel no won.

⁴⁵ Gikenyo go ogik bongi jofonjirok pere, to waco ni, “fodi winindo aninda wiywomere? Hongo onyo otundo m'ibino cam'iye ri Wod Dhano sereko t'ibolo go i cingi joreco.

⁴⁶ Ay win wakadhi! Jacami ran sereko eno otieko rikere cegin.”

Imako Yesu

⁴⁷ Munyo go fodi luwo, Yuda, acel kwoŋ jofonjirok apar g'ario otundo. Go oyido nitie gi dwol ji madwoŋ ma jotiŋo abor kodi abirin, aka jowok bongi jotel pa jocway ri Were i wi migam kodi jotel pa Joyuda.

⁴⁸ Jacami sereko oyido otieko cano gi dwol ji no ranyuth ni, “Ŋat'anocwiy lembe meno a ŋata wiyenyo; kendo ama wimaki.”

⁴⁹ Yuda otundo to kidho tirtir bongi Yesu to waco ni, “Siem wobedi kodin, Jafonji.” To cwiyo lembe.

⁵⁰ Yesu odwoko go ni, “Jawodhan, tim gim'okelin ka ayin.” Gikenyo jobino to jomako Yesu jowokadhi gine.

⁵¹ Ŋat'acel m'onwaŋo nitie gi Yesu oyuyo abor to toŋo ithi ŋeca pa jadwoŋ pa jocway ri Were i wi migam to codo woko.

⁵² To Yesu owaco rigo ni, “Dwoki abor perin i ode, kole ji je ma jooro abor jobino tho g'abor.

⁵³ Wikuya nike d'anyalo kwayo Baba ni womiyan kony, piyo piyo no to go dhiro ran lwak jomalaika ma lwenyo apar g'ario.

⁵⁴ K'ameno onyo Ndiko Maleŋ ma waco ni gime ripo wotimere otundi nedi i kare?”

⁵⁵ Gikenyo Yesu oluwo kodi dwol ji no ni, “Oyido ripo ni wibin kodi abirin makan, paŋini a jakwo? Kole ndelo je abedo i Ot pa Were afonjo, to wikimakan.

⁵⁶ To gime je otimere ŋey gima jotuci wac Were jondiko wotundi.” Gikenyo jofonjirok je joweyo go to joringo.

Yesu ruwaŋ jopido

⁵⁷ Joma jomako Yesu jotero go i ot pa Kaifas, jadwoŋ pa jocway ri Were i wi migam, kama jondiko kodi jotel pa ji oyido jocoker'iye.

⁵⁸ Petero oluwo go gi bor tundo i diedipo ma ot pa jadwoŋ pa jocway ri Were i wi migam. Go odonjo i diedipo to bedo piny kodi jokur kareno mito neno paka gimoro je obedi.

⁵⁹ Jatel pa jocway ri Were i wi migam kodi jopido jotemo rango gir'anena ma twodo kwoŋ Yesu, ma d'omiyo woneki go;

⁶⁰ to jok'onwaŋo atoŋa moro, kada jomathoth jotemo nyayo wac ma twodo kwoŋe. Rumacen j'ario jocungo,

⁶¹ to jowaco ni, “Ŋati me owaco ni, ‘Anyalo turo woko Ot pa Were me to agero man i ndelo adek.’ ”

⁶² Jadwoŋ pa jocway ri Were i wi migam ocungo to penjo Yesu ni, “Ingoye gi radwok kwoŋ wac m'okel kwoŋin me?”

⁶³ To Yesu oliŋaliŋa. Jadwoŋ pa jocway ri Were i wi migam odoko oluwo gine ni, “I nyingi Were makwo, pama onyo akethin i kwoŋirok; waci riwan k'inen ibedo Kristo, Wod Were.”

⁶⁴ Yesu odwoko go ni, “Ato eno iwaco. To awaco riwin ni rumacen wibino neno Wod Dhano munyo obedo yu cingi Jameni je maracuc, odoko wibino neno ka bino i pondeponde ma polo.”

⁶⁵ Ro wac me jadwoŋ pa jocway ri Were i wi migam oyeco nangin pere to waco ni, “Me luwo gima k'otire kwoŋ Were! Mar'aŋo ma wayenyo jokony man kendo? Eno witieko winjo wac pere mareco!

⁶⁶ Wiparo nedi?” Jodwoko ni, “Banja oloyo go, aka go ripo tho.”

⁶⁷ Gikenyo joŋulo i waŋe law to jogoyo go. Joman jogoyo lembe g'adhoŋ kareno jowaco ni,

⁶⁸ “Tuci riwan, Kristo! Tuci riwan ŋat'ogoyin!”

Petero kwedere kwoŋ Yesu

⁶⁹ Petero onwaŋo obedo piny i diedipo, to acel kwoŋ jotic manyir mapa jatel pa jocway ri Were i wi migam obino bonge to waco ni, “Ibende oyido initie gi Yesu Jagalili.”

⁷⁰ To go okwero i waŋ joje ni, “Akuya gim'iluwo kwoŋe.”

⁷¹ To ay to kidho dho waŋkac ma diedipo. Jatic manyako man oneno go kenyo to waco ri ji man kenyo ni, “Jame oyido nitie gi Yesu Janazareth.”

⁷² Petero odoko okwero ni, “Akwoŋere, akuya ran jalo!”

⁷³ Munyo hongo okadho macek, ji m'oyido jocungo kenyo jobino bongi Petero to jowaco ni, “Adieri in acel kwoŋ jo. Odoko paka in iluwo wodhin awodha kamaler!”

⁷⁴ Gikenyo Petero ocako kwedirok gi kwoŋirok ni, “Akuya ran jalo!” I hongo no won to wod gweno koko.

⁷⁵ Gikenyo Petero opoyo wac pa Yesu ni, “Kafodi wod gweno k'okoko, ibino kwedere kwoŋan didek.” Riameno go owok woko to ywak malith swa.