Matayo 21 - KITAWO MALEŊ Catholic

Jaboth donjo Yerusalem gi dwoŋ

¹ Munyo joriko Yerusalem, jobino Bethfage, wi got Oliv, to Yesu oro jofonjirok pere ario yuwiye gi wac me:

² “Kidhi win loka ma yuwiy win kama wibino nwaŋ'iye ma piyo, punda m'otwey i loc gi nyathi mere. Gony win jo wikel ran.

³ Aka ka ŋatimoro owaco riwin gimoro, waci win rigo ni, ‘Jadwoŋ ama yenyo.’ Go bino weyo wokadhi mayot.”

⁴ Gime otimere ma miyo gima jatuci wac Were owaco wotundi i kare ni,

⁵ “Waci ri tindi Zayon ni, Neni kere perin bino bongin. Go mwol aka obedo wi punda, wi nyathi punda, wi punda mathin.”

⁶ Gikenyo jofonjirok jokadho yuwiye to jotimo paka Yesu ooro jo;

⁷ jokelo punda gi nyathi mere, joketho kwoŋ jo nangin pajo, to jomiyo Yesu bedo wiye.

⁸ Lwak ji madwoŋ jopedho nangin pajo i royo, kareno joman jotoŋo jangi yen aka jopedho i royo.

⁹ Lwak ji m'oyido wotho yuwiy Yesu kodi m'oyido luwo go cen jocako koko ni, “Ozana! Pak wobedi ri Nyakwar Daudi! Were womiy ŋata bino i nyingi Rwoth silwany! Ozana! Pak wobedi malo swa i polo!”

¹⁰ Munyo Yesu odonjo Yerusalem, ji ma tindi gibe jocako woy, kareno jopenjo ni, “Me ŋa?”

¹¹ Lwak ji odwoko ni, “Me Yesu jatuci wac Were, ma wok Nazareth ma Galili.”

Yesu donjo i Ot pa Were

¹² Yesu odonjo i Ot pa Were aka oriemo woko jom'oyido jonyewere kosa jotana gigipiny i Ot pa Were; oŋilo woko mezin pa joma wilo pesa kodi kombere pa jom'oyido jotana akurin.

¹³ To waco rijo ni, “Ondiki i Ndiko Maleŋ ni Were owaco ni, ‘Ot paran ibino lwoŋo ni ot ma kwayo.’ T'onyo pama wiloko ŋungu pa jokwo ayino!”

¹⁴ Joma waŋ jo otho kodi jom'oŋol jobino bonge i Ot pa Were to botho jo.

¹⁵ Jotel pa jocway ri Were i wi migam kodi jondiko nge omako jo munyo joneno gir'aura ma go otimo, kareno nyithindho jokoko i Ot pa Were ni, “Wopak Nyakwar Daudi!”

¹⁶ Gikenyo jopenjo Yesu ni, “Iwinjo gima jowaco?” Yesu odwoko ni, “Awinjo maber. Fodi wikisoma ndiko ma waco ni, ‘I dhok nyithindho kodi nyithindho ma dhoth am'owok'iye pak maber ma kakare?’ ”

¹⁷ Yesu oweyo jo to wok i tindi no kareno como yu Bethania, to nindo korago.

Yesu kwoŋo makuyu

¹⁸ Munyo Yesu ogik i tindi odikin yawere mere, go oyido winjo kec.

¹⁹ Go oneno kiti makuyu moro m'icamo i thengi royo to kidho i tiende, to k'onwaŋo kwoŋe gim'onyak kwanyo woko boke kende. Gikenyo go owaco ri makuyu ni, “Ik'odoko inyak gimoro!” Piyo piyo to makuyu no thwo.

²⁰ Jofonjirok joneno gime to jodhier. Jopenjo ni, “Othwo mayot nedi ama?”

²¹ Yesu odwoko ni, “Adieri awaco riwin, ka wibedo gi yeyo, aka wikiganagana, wibino nyalo timo gim'atimo ri makuyu me; ki meno kende, wibino nyalo waco ri got me ni, ‘Ay ka ibolere i nam.’ To bende timo ameno.

²² Ka winigi yeyo, wibino limo gimoro je ma wikwayo Were.”

Penji kwoŋ meni pa Yesu

²³ Yesu odonjo i Ot pa Were aka munyo go fonjo, jotel pa jocway ri Were i wi migam kodi jotel pa Joyuda jobino bonge to jopenjo go ni, “Meni aŋo m'initie gine ma timo gigipiny me? Ŋa m'omiyin meni no?”

²⁴ Yesu odwoko jo ni, “Abende abino penjo win gimoro, ka winodwokan aka abende anowaci riwin kam'anwaŋ'iye meni m'atimo gine gigipiny me.

²⁵ Meni pa Yohana ma kibatisa owok kune; owok bongi Were kosa bongi dhano?” Wegi jocako piem kendi gin ni, “Wawaci aŋo? Ka wanodwoki ni, owok bongi Were, go bino penjo wan ni to raŋo ma wikiyeyo Yohana?

²⁶ To ka wadwoko ni owok bongi dhano, walworo gima ji jonyalo timo, kwoŋbedo ji je joridho ni Yohana oyido obedo jatuci wac Were.”

²⁷ Riameno jodwoko Yesu ni, “Wakuya.” Gikenyo go bende owaco rijo ni, “Abende ak'owaci riwin kam'anwaŋ'iye meni m'atimo gine gigipiny me.”

Ageca kwoŋ yac ario

²⁸ Onyo wiparo nedi? Jal moro oyido nigi wote ario. Go okidho bongi wode madwoŋ to waco ni, “Wodan, kidhi itiy reye i ndelo konon.”

²⁹ Wode odwoko ni, “Ak'otim ameno.” To rumacen odoko owiro paro to kidho tic i ndelo vini.

³⁰ Gikenyo bajo okidho bongi wode man, to kwayo go bende ameno. Wode no odwoko ni, “Alakidho, jadwoŋ.” To go k'okidho.

³¹ Mene kwoŋ jario no m'otimo gima bamere oyenyo? To jodwoko ni, “Wode madwoŋ.” Yesu owaco rijo ni, “Adieri awaco riwin, jocoki misolo kodi mon ma jotana delkwoŋ jo i timo giwickwot ama jolakidho i Ker pa Were to widoŋ.

³² Kole Yohana obino i dier win kareno nyutho win royo m'otire ma wiluw, to wikwero yeyo go; to jocoki misolo kodi mon ma jotana delkwoŋ jo i timo giwickwot ama joyeyo go. Odoko kada munyo wicowo neno ameno je fodi wikiwiro paro mewin wiyey go.”

Ageca kwoŋ jotic i ndelo vini

³³ Yesu owaco ni, “Winji win ageca man: Obedo won lowo moro m'opidho vini pere i ndelo, ogoyo cel othoko gine, okunyo bur ma biyo medho ma vini, to gero ot acurcur ma kur. Gikenyo go oketho ndelo vini no i cingi jotic to eye peco kidho woth.

³⁴ Munyo ndir otundo ma fono vini, go ooro ŋecin pere bongi jotic nike jowomiy go vini pere.

³⁵ Jotic jomako ŋecin pere no, jogoyo acel, joneko man, to jogoyo man gi telin.

³⁶ Go odoko ooro ŋecin man mathoth loyo jomarapena, to jotic jotimo jo ameno bende.

³⁷ Macowe, go ooro rijo wode won ka waco ni, ‘Waŋin jobino woro wodan.’

³⁸ To munyo jotic joneno wode, jowaco i dier gin wegi ni, ‘Me won a wode ma bino lunjo gigipiny pere. Waneki go win eno, aka wakwanyi lim pere!’

³⁹ Riameno jomako go, jobolo go woko ma ndelo vini, to joneko go.”

⁴⁰ “Onyo ka won ndelo vini obin, otim aŋo ri jotic no?”

⁴¹ Jodwoko Yesu ni, “Go adieri bino neko ji mareco no to ketho ndelo vini i cingi jotic man ma jobino miyo go vini pere m'ofon i ndir m'otire.”

⁴² Yesu openjo jo ni, fodi wikisoma i Ndiko Maleŋ ni, Kole tele won ma jogeto jocayo ni bukony am'olokere tele ma thielo kindi ot. Me obedo tic pa Rwoth; aka neno maber swa riwan!

⁴³ Am'omiyo awaco riwin, Ker pa Were ibino kwanyo woko kwoŋ win t'imiyo ji ma jobino nyak gim'otire.

⁴⁴ [Ŋat'opodhi wi tele me bino ŋadere wolokere mathindho thindho; aka ŋata tele me opodhi kwoŋe tele me opodhi kwoŋe, tele bino ŋinyo go loko go pa fukefuke].

⁴⁵ Jotel pa jocway ri Were i wi migam kodi Jofarisayo jowinjo agecin pa Yesu to joŋico nike go oyido luwo kwoŋ jo.

⁴⁶ Riameno jotemo mako go, to jolworo lwak ji ma joyeyo ni Yesu obedo jatuci wac Were.