Matayo 20 - KITAWO MALEŊ Catholic

Jotic i ndelo vini

¹ “Ker ma polo cale won ndelo vini m'oay odikin worwor ketho ji moro tic i ndelo pere ma vini.

² Go ocikere kodi jo ni bino culo jo kemba ma ndir je, siringi acel ndelo acel, to dhiro jo i ndelo pere.

³ Go odoko oay to kidho i katale sawa adek to neno jomoro jocungo kenyo ma bu tic.

⁴ Omiyo go owaco rijo ni, ‘Wibende kidhi win witiy i ndelo paran ma vini, aka abino miyo win gima ripo je.’

⁵ To jono jokidho. Aka sawa aucel kodi sawa abuŋwen go odoko otimo ameno.

⁶ Dho kapa sawa apar g'acel go okidho i katale kendo to neno ji moro ma fodi oyido jocungo kenyo. Go openjo jo ni, ‘Raŋo ma winyeko ndelo gipi ma wikitim gimoro?’

⁷ Jodwoko ni, ‘fodi ongoye ŋat'omiyo wan tic.’ Gikenyo go owaco ri jono ni, ‘Ere wibende kidhi win witiy i ndelo vini paran.’ ”

⁸ “Aka munyo piny otundo othieno, won ndelo owaco ri jakur jotic pere ni, ‘Lwoŋ jotic imiy jo kemba pajo, icaki kodi jom'oketh i tic macowe, aka icowi kodi joma open ketho jo i tic.’

⁹ Joma nende jocako sawa apar g'acel, omiy jo siringi acel acele.

¹⁰ Meno omiyo munyo joma jopen i tic jobino limo kemba pajo, joparo ni di jonwaŋo madwoŋ loyo, to jo bende omiy jo siringi acel acele won.

¹¹ Jojolo pesa pajo to jocako kiŋunyaŋunya gi won tic.

¹² Jowaco ni, ‘Jome, m'oketh jo i tic macowe me, kole jotiyo nyaka sawa acel won kende, to neni wan wathiele gi tic mapek ndelo gipi i min ceŋ, ama odoko iculo jo marom gi wan!’

¹³ Won ndelo odwoko ŋat'acel kwoŋ jo ni, ‘Nyawotan akibuyin pesa. Kole nende wayere kodin timo tic odieceŋ gipi kwoŋ siringi acel.

¹⁴ In maki kemba perin idok peco; an awon ayero miyo ŋat'aketho i tic macowe me kemba marom kodi m'amiyin.

¹⁵ Iparo ni angoye kodi thwolo timo paka ayenyo gi pesa paran won? Kosa nyeko makin nyaka ni rupiri atimo bero ri ŋatiman?’ ”

¹⁶ Aka Yesu omedo ni, “Am'omiyo joma cowe ama jobino bedo marapena, aka joma bedo marapena jobino bedo macowe.”

Yesu luwo mar'adek kwoŋ tho pere

¹⁷ Munyo Yesu onwaŋo kidho Yerusalem, otero jofonjirok japar g'ario gicen to luwo gi jo nyaliŋliŋ.

¹⁸ Owaco rijo ni, “At'onyo wakidho Yerusalem kam'ibino bol'iye Wod Dhano i cingi jotel pa jocway ri Were i wi migam kodi jondiko to jothumo rigo banja ma tho.

¹⁹ Aka jobino ketho go i cingi Jopath wonyeri go, wocwadi go, t'iguro go kwoŋ musalaba, aka i ndelo mar'adek ibino cerino go.”

Kwac pa min yac ario

²⁰ Gikenyo min wot Zebedayo obino bongi Yesu gi wote ario to goyo conge ruwaŋe munyo kwayo go gimoro.

²¹ Yesu openjo go ni, “Aŋo m'iyenyo?” Go odwoko ni, “Tim cikirok ni wotan me jobedi yuracuc kodi yuracam perin k'ilokere Kere.”

²² Yesu odwoko jo ni, “Wikuya gima wikwayo. Winyalo madho agwata m'akidho madho?” To jodwoko ni, “Wanyalo”.

²³ Yesu owaco ni, “Adieri winyalo riwin madho agwata paran, to angoye kodi meni ma yero joma jobedi yuracuc kodi yuracam paran. Kabedo me obedo apa joma Baba oyiko rijo.”

²⁴ Munyo jofonjirok wadi gin apar jowinjo kwoŋ gino, nge omako jo gi wutmere ario no.

²⁵ To Yesu lwoŋo joje kanyacel bonge, to waco ni, “Wiŋeyo nike joma dhumo Jopath jodhumo gi maker, aka jotel pajo jodhumo gi mbaka.

²⁶ To k'obedi i dier win ameno. Kucel ka moro kwoŋ win mito bedo madwoŋ, go ripo bedo ŋeca mewin;

²⁷ aka ŋata yenyo bedo marapena i dier win, ripo bedo ŋeca mewin,

²⁸ paka Wod Dhano ma k'obino ka ni wotiy rigo, to ni wotiy ri ji gi miyo kwo pere paka cul ri ji mathoth.”

Yesu botho cwo ario ma waŋ gin otho

²⁹ Munyo Yesu kodi jofonjirok pere joeye Yeriko, lwak ji joluwo go.

³⁰ Ji ario ma waŋ gin otho oyido jobedo i thengi royo; munyo jowinjo ni Yesu oyido kadho, jocako koko ni, “Wod pa Daudi! Maki ye wor gi wan!”

³¹ Lwak ji no jobwoko jo ka jowaco ni jowoliŋ! To jome jomedo koko malo loyo ni, “Nyakwar Daudi, mondo Rwoth, maki ye wor gi wan!”

³² Gikenyo Yesu ocungo to lwoŋo jo to penjo jo ni, “Wimito atim riwin aŋo?”

³³ Jodwoko ni, “Rwoth, wayenyo waŋ wan wonen.”

³⁴ Yesu omako gi jo wor, aka tekin ogeyo waŋ jo to jocako neno to joluwo go.