Matayo 18 - KITAWO MALEŊ Catholic

Ŋatadwoŋ loyo wadi

¹ I hongo no jofonjirok jobino bongi Yesu, to jopenjo go ni, “Ŋatadwoŋ loyo wadi je i Ker ma polo?”

² Yesu olwoŋo nyaka nyathi, to ketho go cungo i nyim jo,

³ aka owaco ni, “Adieri awaco riwin ni, wik'odonji i Ker ma polo, kwanyo woko ka wiwire aka wilokere paka nyithindho.

⁴ Ŋatadwoŋ loyo wadi je i Ker ma polo obedo ŋata bwonere paka nyathi me.

⁵ Aka ŋata jolo nyaka nyathi ma nger me i nyingan, meno jolan.”

Karatem

⁶ “Aka ŋat'omiy jomathindho ma joyeyan me timo reco, d'ober rigo k'otwey kidi madwoŋ i ŋute t'ibolo go i wakawaka maluth.

⁷ Rac adieri ri piny nike nitie gigipiny ma miyo ji timo reco! Gigipiny ma cale ameno bino timere ndir je, to bino raco loyo ri ŋata miyo kiti gigipiny no timirok!”

⁸ “Ka cingin acel kosa tiendin miyin timo gimarac, toŋi woko ibol woko! Ber rin donjo i kwo ma bu cingin kosa tiendin loyo bedo gi cingin je kodi tiendin je t'ibolin i mac makitho.

⁹ Aka ka waŋin miyin timo gimarac, goli ibol woko! Ber rin swa donjo i kwo gi nyaka waŋin acel loyo bedo gi waŋin ario je t'ibolin i mac makitho.”

Ageca kwoŋ rombo m'orwenyo

¹⁰ “Neni ni wikicay nyaka jomathindho me; kole awaco riwin, i polo koro jomalaika pajo jonitie ruwaŋ Baba man polo hongo je.

¹¹ [Kole Wod Dhano obino botho jom'orwenyo”].

¹² “Wiparo nedi? Aŋo ma dhano di tim ka go nitie gi rombo miya acel to acel kwoŋ jo rwenyo? Go kiwey piero abuŋwen g'abuŋwen jocemo wi tendere kenyo to kidho rango nyaka rombo acel m'orwenyo no?

¹³ Aka k'onwaŋo rombo no, awaco riwin, go kole bedo gi kisangala madwoŋ ri rombo no loyo piero abuŋwen g'abuŋwen ma jok'orwenyo ca.

¹⁴ I royo acel, Bawin manitie i polo bende kiyeny acel kwoŋ jomathindho me rwenyo.”

Omerin m'otimo rin marac

¹⁵ “K'omin in otimo rin marac, kidhi bonge inyuthi go reco pere. T'itimi ameno nyaliŋliŋ, nyaka i dier wijario. Ka go owinjin, meno itieko dwoko omin in bongin.

¹⁶ To ka go okwer winjin, kwany ŋat'acel kosa ji man ario ikidhi gi jo, aka ŋey wac moro je woridho munyo j'ario kosa adek jothielo paka ondiki.

¹⁷ To ka k'owinjo jo bende, ere tuci gimoro je ri kitipa pa jom'oyeyo. Aka ka go okwer winjo kiri kitipa pa jom'oyeyo bende, onyo ter go paka jakicar kosa jacoki misolo.”

Kwero gi yeyo

¹⁸ “Adieri awaco riwin, gima winotwey i piny ka ibino tweyo i polo, aka gima winogony i piny ka ibino gonyo i polo.”

¹⁹ “Aka awaco riwin kendo, ka j'ario kwoŋ win i piny ka joyere i gimoro ma jokway, Baba manitie i polo bino timo rijo gino.

²⁰ Ato kama j'ario kosa adek jocoker'iye i nyingan, meno anitie i dier jo kenyo.”

Ageca kwoŋ jatic ma k'oyeyo cwako nyawote

²¹ Gikenyo Petero obino bongi Yesu to penjo go ni, “Rwoth, k'omera timo ran marac, anocwaki go didi? Dibirio?”

²² Yesu odwoko ni, “Be, ki dibirio, to dipiero abirio dibirio.

²³ Ato Ker ma polo cale kere m'ocano kidho penjo jotic pere jowotiti rigo kwoŋ lim pere ma jotic pere no jonigine.

²⁴ Go onwaŋo nyaka cako timo amanago t'ikelo acel kwoŋ jom'oyido jonigi banja pere ma muma pesa gana apar.

²⁵ To paka ŋato oyido ongoye gi nger ma culo banja no, rwoth pere owodho or nike wotana go, kodi cege kodi nyithindho pere kodi lim pere je, woculi banja no.

²⁶ Jatic no ogoyo conge piny i nyim kere, to kwayo go ni, ‘Diy cunyin kodan, abino culin gimoro je.’

²⁷ Rwoth pere cunye oramo rigo, am'omiyo ocwako go banja no to weyo go kadho.”

²⁸ “To munyo jatic no oyido kadho, oromo gi jatic nyawote m'onwaŋo nigi banja pere ma muma pesa miya acel, go omako ŋato to cako deyo. Owaco ni, ‘Culan pesa paran m'ikopa!’

²⁹ Jatic nyawote ogore piny to kwayo go ni, ‘Diy cunyin kodan, abino culin!’

³⁰ To go k'oyeyo; kucel omiyo obol ŋato i twec cuka woculi banja no.

³¹ Munyo jotic man joneno gime paka otimere, cuny gin oramo jo swa, to jokidho bongi rwoth pajo to jowaco rigo gimoro je m'otimere.

³² Gikenyo rwoth olwoŋo jatic no to waco ni, ‘In i dhano marac! Acwakin banja m'onwaŋo initie gine bongan gipi rupiri iywakere ran;

³³ onyo in d'ikimako ye wor gi jatic nyawotin, paka atimo rin?’

³⁴ Nge omako rwoth swa to bolo jatic no i katwec cuka bende ocul penzi kiri macowe.”

³⁵ Yesu ocowo wac ni, “Meno apaka Baba man polo bino timo riwin ka wikicwaki omin win, gi cuny win je.”