Matayo 16 - KITAWO MALEŊ Catholic

Yenyo gir'aura

¹ Jofarisayo kodi Josadukayo moro jobino bongi Yesu munyo joyenyo ciko go, to jokwayo go ni wotim gir'aura rijo m'owok i polo.

² Yesu odwoko jo ni, “Ka waŋceŋ kidho podho wiwaco ni, ‘Piny kidho kwe, rupiri pondeponde obokere.’

³ Aka odikin maŋic wiwaco ni, ‘Koth lacwe, rupiri pondeponde obokere aka piny odisa.’ Wiŋeyo tito cal pa piny gi ŋiyo pondeponde; to wikinyal tito ranyuth ma mako kwoŋ ndir ma pama!

⁴ Kole luse ji mareco ma jokidew kwoŋ Were kada mathin ama rango ranyuth ma gir'aura. Ongoye gir'aura m'ibino miyo win kwanyo woko gir'aura pa Yona kende.” Gikenyo go oweyo jo to kadho.

Thow pa Jofarisayo kodi Josadukayo

⁵ Munyo jofonjirok jocewere to jokidho loka ma wakawaka man, wiy gin owil gi tiŋo mugat moro.

⁶ Yesu owaco rijo ni, “Gwokere win, odoko kure win kwoŋ thow pa Jofarisayo kodi Josadukayo.”

⁷ Jocako luwirok wegi kendi gin ni, “Go waco ama kwoŋbedo wakitiŋo mugat moro.”

⁸ Yesu oŋeyo gim'onwaŋo jowaco, to penjo jo ni, “Raŋo ma wiluwere kendi win ni wingoye kodi mugat moro? Apaka yeyo mewin nok ama?

⁹ Fodi wikiniaŋ? Wikipoy ndir ma atur'iye mugat abic ri cwo gana abic, kodi aditin adi ma wicoko?

¹⁰ Aka mugat abirio ri cwo gana aŋwen? Wipoŋo aditin adi?

¹¹ Wibedo nedi ma wikiniaŋ ni oyido akiluw kwoŋ mugat? Gwokere win kwoŋ thow pa Jofarisayo kodi Josadukayo.”

¹² Gikenyo nyaka jofonjirok joniaŋ ni go onwaŋo kiwaci rijo kurok kwoŋ thow m'ioro i mugat, to kwoŋ fonji pa Jofarisayo kodi Josadukayo ayino.

Petero tuco Yesu

¹³ Yesu okidho iy'adec macegin kodi Kesereya Filipi kama go openj'iye jofonjirok pere ni, “Ji jowaco ni Wod Dhano obedo ŋa?”

¹⁴ Jodwoko ni, “Joman jowaco ni go Yohana Jakibatisa, joman ni Elia, kareno joman jowaco ni go Yeremia kosa ni jatuci wac Were moro.”

¹⁵ Aka go openjo jo ni, “To win wiwaco ni an ŋa?”

¹⁶ Simon Petero odwoko ni, “In ibedo Kristo Wod Were makwo.”

¹⁷ Yesu odwoko ni, “Simon wod pa Yona, ijasilwany swa! Adieri me k'obino rin wok bongi dhano moro, to Baba mani polo am'onyuthin.

¹⁸ Am'omiyo awaco rin, in i Petero, aka wi tele me abino ger'iye kitipa pa jom'oyeyo paran, makada tho k'onyal loyo kitipa no.

¹⁹ Abino miyin rayaw ma yawo Ker ma polo; gim'inotwey i piny ka, ibino tweyo i polo; odoko gim'inogony i piny ka, ibino gunyo i polo.”

²⁰ Gikenyo Yesu ociko jofonjirok pere ni kiri jowotuci ri moro nike go obedo Kristo.

Yesu luwo kwoŋ candirok kodi tho pere

²¹ Wok i hongo no kadho malo, Yesu ocako waco kamaler ri jofonjirok pere ni go ripo kidho Yerusalem wocandere tektek i cingi jotel pa ji kodi jotel pa jocway ri Were i wi migam, kodi jondiko. Jolaneko go, aka i ndelo mar'adek ibino cerino go kendo.

²² Petero otero go gicen to cako ay kwoŋe ni, “Were wogeŋ gino, Rwoth! Gime wokiri wotimere rin!”

²³ Yesu owire to waco ri Petero ni, “Eye bongan, Sitan! Iriwere ran i royo, rupiri paro perin me kiwoki bongi Were, to wok bongi dhano ayin.”

²⁴ Gikenyo Yesu owaco ri jofonjirok pere ni, “Ka moro mito luwan, go won kutho ripo kwerere kende, wotiŋ musalaba pere, aka woluwan.

²⁵ Aka ŋat'omiti botho kwo pere won bino rwenyo kwo; to ŋat'orweny kwo pere kwoŋbedo an bino nwaŋo kwo.

²⁶ Bero aŋo ma dhano olim k'oloki piny gipi apere to rwenyo kwo pere won? Kosa aŋo ma dhano owil gi kwo pere?”

²⁷ “Kole Wod Dhano labino gi dwoŋ pa Bamere gi jomalaika pere, aka bino culo dhano je kemba pere cungo kwoŋ tim pere.”

²⁸ “Adieri awaco riwin, nitie joma jocungo ka ma jokibino tho mafodi jok'oneno Wod Dhano ka bino i Ker pere.”