Matayo 15 - KITAWO MALEŊ Catholic

Fonji pa kwarere wan

¹ To Jofarisayo megi gi jondiko jobino bongi Yesu wok Yerusalem to jopenjo go ni,

² “Raŋo jofonjirok perin jocayo kula pa kwarere mawan? Jokilogi cingi gin paka mitere ka jokidho cemo!”

³ Yesu odwoko jo ni, “To raŋo ma wicayo Or pa Were to wiluwo kula mewin wiwegi?

⁴ Kole Were owaco ni wor benin gi yokin, aka, ŋata yeto bamere kosa yokimere ibino neko.

⁵ To win wifonjo ni ka nyatoro owaco ri bamere kosa yokimere ni kony moro je ma d'amiyin onyo obedo mic m'oyik ri Were ayin, gikenyo go onyo kiripi woro bamere kosa yokimere.

⁶ Me apaka wilwogo woko Or pa Were, kareno wiluwo fonji mewin wiwegi.

⁷ Win wijorendirok! Isaya otuco wac ma mako kwoŋ win me m'otire.”

⁸ “ ‘Ji me jomiyan dwoŋ gi dhok gin, to cuny gin nibor kodan!

⁹ Jolaman gi wac nono, kwoŋbedo jofonjo or m'obedo apa dhan'adhana.’ ”

Gigipiny ma loko dhano makoc

¹⁰ Gikenyo Yesu olwoŋo lwak ji bonge to waco rijo ni, “Ciki win ithi win, aka winiaŋ!

¹¹ Gima donjo i dhok dhano ama kiloki go makoc: To gima wok i dhoke ama loko go makoc.”

¹² Gikenyo jofonjirok pere jobino bonge to jowaco ni, “Iŋeyo paka Jofarisayo cuny gin oramo jo i gim'iwaco no?”

¹³ Yesu odwoko ni, “Gimoro je ma twi ma Baba man polo ama k'opidho ibino fudho woko.

¹⁴ Weyi riwin jo! Jobedo jotel ma waŋ gin otho; aka ka jathowaŋ acel ama kodo jathowaŋ man, jario je jopodho i bur.”

¹⁵ Petero oluwo malo ni, “Titi riwan dwoŋ ageca me.”

¹⁶ Yesu owaco rijo ni, “Kere wibende fodi wikiniaŋ gimoro?

¹⁷ Wikiniaŋ ni gimoro je ma donjo i dhok dhano donjo i iye, aka kadhakadha to wok woko?

¹⁸ To gigipiny ma wok i dhok dhano wok i cunye; gigipiny ma cale ameno ama loko dhano makoc.

¹⁹ Ato i adundo ama wok'iye paro mareco ma rwako go i nek, timo cot, kodi kidakana, kwo, roro, gi nyeko nyingi joman.

²⁰ Me a gigipiny ma loko dhano makoc. To cemo ma k'ologi cingi jo paka jowaco ni iripo timo no ama kiloki dhano makoc.”

Yeyo pa dhako moro

²¹ Yesu oeye kenyo to kadho iy'adec macegin gi tindi ma Tire kodi Sidon.

²² Dhako Jakanan moro ma wok iy'adec no obino bonge to ywakere ni, “Nyakwar Daudi, tim reye wor! Nyaran jwogi ni kwoŋe aka nitie marac tektek.”

²³ Yesu k'odwoko go gimoro. To jofonjirok pere jobino bonge to jokwayo go ni, “Sewila go wokadhi, rupiri go eno luwo wan aka koko kicar!”

²⁴ Gikenyo Yesu odwoko ni, “Ooran nyaka bothi rombo m'orwenyo ma ot pa Isiraili kende.”

²⁵ Munyo dheno owinjo ameno, obino to guro conge ka tiendi Yesu munyo waco ni, “Rwoth, konyan!”

²⁶ Yesu odwoko ni, “K'otire kwanyo cemo pa nyithindho t'ibolo ri gwokere.”

²⁷ Dheno odwoko ni, “Meno adieri, jadwoŋ, to kole kada gwokere bende jocamo ye ŋinjeŋinje m'odoŋ ma podho wok i meza pa jodongo pajo.”

²⁸ Gikenyo Yesu odwoko go ni, “Dhakodwoŋ, inigi yeyo madwoŋ! Gim'iyenyo wotimere rin.” Aka i hongo no won ama nyare obed'iye maber.

Yesu botho ji kweth

²⁹ Yesu oeye kenyo to luwo gi i thengi wakawaka ma Galili munyo kadho. Kenyo go oidho tendere moro to bedo piny.

³⁰ Lwak ji jobino bonge munyo jokelo jom'oŋol, joma waŋ gin otho, joma tiendi gin owiyere, obadhin kodi joma two mathoth, kareno joketho jo ka tiendi Yesu, to go botho joje.

³¹ Ji jodhier swa munyo joneno obadhin joluwo, joma tiendi gin owiyere jolama, jom'oŋol jowotho, aka joma waŋ gin otho joneno; aka jopako Were pa Isiraili.

Yesu pidho ji gana aŋwen

³² Yesu olwoŋo jofonjirok pere bonge to waco rijo ni, “Cunyan raman ri ji me, rupiri jotieko bedo kodan ndelo adek aka onyo jongoye kodi gir'acama. Akimiti wisewila jo ma wakipidho jo, rupiri limbuju nyalo redho jo piny i royo ka jodok peco.”

³³ Jofonjirok jopenjo ni, “Wanonwaŋ cemo kune i thim ka manyalo pidho lwak ji me?”

³⁴ Yesu openjo jo ni, “Winitie gi mugat adi?” Jodwoko ni, “Nyaka mugat abirio won kodi rec mathindho thindho manok.”

³⁵ Gikenyo Yesu ooro lwak ji no bedo piny.

³⁶ To go kwanyo mugat abirio gi rec manok no, aka munyo otieko foyo Were, oturo cemo no mathindho thindho, to miyo jofonjirok pere jowopoki jono.

³⁷ Joje jocemo to joyeŋ. Rumacen jofonjirok jocoko ŋinjeŋinje m'odoŋ to poŋo aditin abirio.

³⁸ Welo cwo ma jocemo obedo gana aŋwen, ma k'okwan mon gi nyithindho.

³⁹ Gikenyo Yesu osewila ji to donjo i ye to kidho iy'adec ma Magadan.