Matayo 12 - KITAWO MALEŊ Catholic

Penji kwoŋ Sabato

¹ Munyo hongo moro okadho, Yesu oluwo gi i ndelin ma ŋano; jofonjirok pere oyido kec neko jo, to jocako fono withi ŋano gi camo.

² To munyo Jofarisayo joneno, jowaco rigo ni, “Panen, kole jofonjirok perin jotimo gima k'oyey timo i Sabato.”

³ Go owaco rijo ni, “Fodi wikisoma gima Daudi otimo, kodi jom'oyido nigi go;

⁴ paka go odonjo i Ot pa Were to jocamo mugat m'omiy Were m'oyido kiripi ni go kosa jom'oyido nitie gine jowocami, kwanyo woko jocway ri Were i wi migam kende?

⁵ Kosa fodi wikisoma i Cik pa Musa, paka kisi ndelo ma Sabato jocway ri Were i wi migam ma Ot pa Were joturo cik ma Sabato, to kikwan ri joreco?

⁶ Awaco riwin, kole gimadwoŋ ma kalo Ot pa Were ni ka.

⁷ Aka bedi witieko ŋeyo dwoŋ wac me ni, ‘Ayenyo wor ayino makiweno cowirok ma le.’ Dinyo wikithum banja ri jom'ongoye gi reco moro.

⁸ Kole Wod Dhano obedo Rwoth ma Sabato.”

Dhano ma cinge oŋinyere

⁹ Yesu oeye kenyo to kidho donjo i kalamo pa Joyuda moro,

¹⁰ kam'onwaŋ'iye dhano ma cinge oŋinyere. To jopenjo go ni, “Cik yeyo botho dhano i Sabato?” Jopenjo ameno ni aka ŋey jowokethi kwoŋe reco.

¹¹ To go owaco rijo ni, “Ŋa kwoŋ win ma ka rombo pere acel opodho i bur i ndelo ma Sabato weyo kenyo ma k'ofudho woko?

¹² Onyo welo dhano kalo apa rombo didi? Riameno kitur Cik timo gimaber i Sabato.”

¹³ Gikenyo owaco ri jal ma cinge otho no ni, “Riey cingin!” To jalo rieyo cinge no to bende lokere maber paka nyawote ma kucel.

¹⁴ Gikenyo Jofarisayo joay jokadho to jotimo can ma neko Yesu.

Jatic pa Were m'oyer

¹⁵ Munyo Yesu oŋeyo gino, oeye kenyo. Ji mathoth joluwo go, to botho jotwo je,

¹⁶ aka omiyo jo or ni kiri jowowaci ri joman kwoŋ go.

¹⁷ Owaci ameno ŋey gima jatuci wac Were Isaya owaco wotundi ni:

¹⁸ “Panen jatic paran m'atieko yero m'amaro aka cunyan sangala gine. Abino ketho Cuny Maleŋ paran i go, aka go bino tuco tiro ri nonin je.

¹⁹ Go kilapiemo kosa koko, kosa luwo malo i royo m'okare ma tindi.

²⁰ Go kilaturo midole m'okom, kosa neko tala maliel ma nimnim. Go bino riwin cuka omiy tiro oloy lweny.

²¹ Nonin je jobino ketho geno pajo i nyinge.”

Yesu kodi Belzebul

²² Gikenyo jomoro jokelo ri Yesu obadha ma waŋ'otho aka oyido kinyal luwo ro jwogi m'oyido ni kwoŋe. Yesu obotho ŋato to nyalo luwo kiri gi neno.

²³ Lwak ji jodhier swa, to jowaco ni, “Kosa me nyalo bedo Nyakwar Daudi?”

²⁴ To munyo Jofarisayo jowinjo gime jodwoko ni, “Go riemo woko jwogi gi meni pa Belzebul, rwoth pa jwogi.”

²⁵ Yesu oŋeyo gim'oyido joparo to waco rijo ni, “Piny moro je ma tiakere bwora gi bwora aka wegi jolwenyo, bino podho.

²⁶ Am'omiyo ka Sitan oere riemo woko Sitan i ker pa jwogi dwoŋ mere ni won otieko kelo tiakirok, onyo ker pere ocungi nedi?

²⁷ K'inen ariemo woko jwogi gi meni pa Belzebul, kere onyo meni pa ŋa ma joma luwo win joriemo gine jo? Am'omiyo joma luwo win won ama jobino thumo banja woloyi win!

²⁸ To k'inen ariemo woko jwogi gi meni pa Cuny Maleŋ, nyutho ni kere onyo Ker pa Were otieko tundo bongi win.”

²⁹ “Ongoye ŋata nyalo turo ot pa jameni to nyaga lim pere, kwanyo woko ka okutho otweyo jameni no aka ŋey wonyali kinyaga gima ni ot pere.”

³⁰ “Ŋata kitiyere kodan meno lwenyo kodan, aka adieri ŋata kikonyan gi coko gigipiny, meno kedho woko ayino.

³¹ Am'omiyo awaco riwin, ibino cwako ri ji reco kodi gima k'otire ma joluwi kwoŋ Were; to ŋat'oluwi gima k'otire kwoŋ Cuny Maleŋ, k'ocwaki go i hongo ma pama kiri gi i hongo ma bino yuwaŋe je.

³² Moro je ma luwo gima k'otire kwoŋ Wod Dhano ibino cwako go, to ŋat'oluwi gima k'otire kwoŋ Cuny Maleŋ k'ocwaki go, pama kendo gi i hongo ma bino je.”

Ageca kwoŋ yath kodi olemo mere

³³ “K'iyenyo olemo maber, iripo bedo gi tiendi yath olemo bende maber; to k'initie gi tiendi yath marac, bende ibino nwaŋo olemo marac. Kole bero pa yath iŋeyo kwoŋ gima nyak kwoŋe.

³⁴ Win nyithindhi malasaŋ! Di winyal luwo nedi wac maber ma to wireco? Kole wac ma dhano luwo meno gim'opoŋ i cunye.

³⁵ Dhano maber wodho gigipiny mabeyo wok kwoŋ gigipiny mabeyo m'opoŋ i cunye; aka dhano marac bende wodho gigipiny mareco wok kwoŋ reco m'opoŋ i cunye.”

³⁶ “Aka awaco riwin, i ndelo ma thumo banja, dhano je bino tito wac je masisiri ma go otieko luwo.

³⁷ Kole wac perin ama nyalo miyo ikwanyo woko kwoŋin banja, kosa iketho kwoŋin banja.”

Yenyo gir'aura

³⁸ Gikenyo jondiko moro kodi Jafarisayo joluwo malo ni, “Jafonji wayenyo neno ranyuth m'itimo.”

³⁹ Yesu odwoko ni, “Luse ji mareco ma kigenere ruwaŋ Were ama kwayo ranyuth. Ongoye ranyuth m'ilamiyo win kwanyo woko apa Yona jatuci wac Were.

⁴⁰ Paka Yona ocowo odieceŋ adek kodi wor adek i iy rec, apaka bende Wod Dhano bino cowo odieceŋ adek gi wor adek i iy lowo.

⁴¹ I ndelo ma thumo banja, ji ma Ninivi jobino cungo gi luse ji ma pama to jothumo banja loyo jo, rupiri joŋuto reco pajo munyo jowinjo Yona fonjo; to kole ŋati maloyo Yona gi dwoŋ ee ni ka!

⁴² I ndelo ma thumo banja, kere madhako ma wok Seba i thenge ma yu Tiendan piny, bino cungo to thumo banja woloyi win, rupiri go owotho othoko piny wok kamabor bino winjo rieko pa Solomon; aka kole ŋati maloyo Solomon gi dwoŋ ee ni ka!”

Dwoko pa cuny m'ocido

⁴³ “Ka cuny m'ocido owok kwoŋ dhano, wotho i piny m'othwo ka rango kabedo ma ywomirok to kinwaŋ.

⁴⁴ Riameno ka k'onyalo nwaŋo, won waco ni, ‘Abino gik i ot paran ma awok'iye.’ K'odwoko to nwaŋo ot no ninono kendo olony aka oyiki maber,

⁴⁵ gikenyo go wok to kidho kelo cuny m'ocido wadi man abirio mareco loyo go, to jobino to jodonjo gi bedo kenyo. Kwo pa ŋato bino lokere marac loyo paka onwaŋo nitie con. Meno apaka bino timere ri luse mareco ma pama.”

Min Yesu kodi wutmin

⁴⁶ Munyo Yesu fodi oyido luwo gi ji, min kodi wutmin jotundo. Jocungo woko, aka jokwayo luwo gi go.

⁴⁷ Riameno ŋat'acel m'oyido nikenyo owaco rigo ni, “Panen, yokin kodi wutmin in jocungo woko, aka jomito luwo kodin.”

⁴⁸ Yesu odwoko ni, “Ŋa ma yokan? Jokune ma wutmera?”

⁴⁹ Gikenyo go ocimo jofonjirok pere to waco ni, “Panen! Jome a mama gi wutmera!

⁵⁰ Kole ŋata timo gima Baba manitie i polo yenyo ni wotim, meno am'obedo omera, nyamera, gi yokan.”