Mariko 7 - KITAWO MALEŊ Catholic

Kite pa Joyuda macon

¹ Jofarisayo kodi jondiko megi ma jowok Yerusalem jocokere bongi Yesu,

² aka joneno jofonjirok pere megi jocemo gi cingi gin ma dicilo, dwoŋ mere ni jok'ologo maber andha, aka cik pa Joyuda kiyey gino.

³ (Ato Jofarisayo kodi Joyuda joluwo kite pa kwarere pajo macon, m'oyido kicem mafodi k'ologi paka cik mere waco.

⁴ Ka jowok i katale jokicem mafodi jok'olwoko kor cingi jo gi pi paka cik waco. Odoko nitie kite man mathoth thoth ma jomako paka lwoko kikopere, degi, kodi atewe.)

⁵ Am'omiyo Jofarisayo me kodi jondiko jopenjo go ni, “Raŋo ma jofonjirok perin jokiluwi kite pa kwarere mawan macon, kabedo ma cemo gi cingi gin ma dicilo?”

⁶ To go waco ni, “Kere Isaya cango oluwo gir'adieri kwoŋ wijorendirok i Ndiko Maleŋ ni, ‘Ji me jomiyan dwoŋ gi dhok gin kende, to cuny gin nitie bor kodan.

⁷ Jokilaman g'adieri, aka gima jofonjo obedo nyaka, kula ma ji wegi ama joketho.’

⁸ Wibolo gicen or pa Were, to wicwire kwoŋ kula pa ji ayino.”

⁹ Yesu omedere gi waco ni, “Wiriek swa ri nwaŋo royo ma bolo gicen cik pa Were, ŋey witiy gi kula mewin wegi!

¹⁰ Kole Musa cango owodho cik ni, ‘Lwor benin gi yokin.’ Gi man ni,

¹¹ ‘Ŋata luwo marac kwoŋ bamere kosa yokimere woneki woko.’ To win wifonjo ni ka moro nitie gi gimoro ma go oyido nyalo konyo gine bamere kosa yokimere, to waco ni, ‘Me Korban.’ (Dwoŋ mere ni gipa Were.)

¹² Meno go onyo otieko limo kagoŋirok ma kwero konyo bamere kosa yokimere.

¹³ Ameno wicayo wac pa Were gi kula ma wiwegi wifonjo ji, aka winitie gi gigipiny man mathoth ma cale gi me ma wikethere timo.”

Gigipiny ma loko dhano makoc

¹⁴ Yesu odoko olwoŋo ji bonge to waco rijo ni, “Ciki win ithi win wijoje aka winiaŋ gim'akidho waco.

¹⁵ Gima woko ma donjo i dhano ama kiloki go makoc, to gima wok i cunye ama loko go makoc.

¹⁶ [Ŋata nigi ithe ma winjo, wowinji”].

¹⁷ Munyo go oeye bothi lwak ji to donjo i ot, jofonjirok pere jopenjo go dwoŋ ageca no.

¹⁸ Yesu owaco ni, “Kere wibende wikuya? Fodi wikiniaŋ kwoŋ gime? Wikiniaŋ ni gima woko ma donjo i dhano ama kiloki go makoc,

¹⁹ rupiri kidonji i cunye, to donjo i iye ayino aka rumacen wok woko?” (Gi wac no, Yesu onyutho ni cemo je ber acama.)

²⁰ Aka omedo waco ni, “Kole gima wok i dhano ama loko go makoc,

²¹ rupiri i cuny dhano ama reco caker'iye: Cot, kwo, neki, turo cik ma nywomirok,

²² woro, reco, twodo, kidakana, nyeko, kedho reco pa joman, pakirok kodi timo gimiŋo.

²³ Reco me je wok i dhano aka loko go makoc.”

Yeyo pa dhako moro

²⁴ Yesu oeye kenyo to kidho iy'adec macegin gi tindi ma Tire kodi Sidon. Go odonjo i ot, aka k'omito ni nyatoro woŋey ni go nitie kenyo, to k'onyalo muŋere.

²⁵ Gikenyo dhako moro, ma cuny m'ocido oyido nikwoŋ nyare, owinjo kwoŋ Yesu to bino bonge mayot, to podho ka tiende.

²⁶ Dheno onwaŋo obedo Japath, anywola ma Fonisia ma wok Siria. Go okwayo Yesu nike woriem woko jwogi no kwoŋ nyare.

²⁷ To Yesu dwoko ni, “Weyi kutho watel pidho nyithindho; k'obedo gim'otire kwanyo cemo pa nyithindho gi bolo ri gwokere.”

²⁸ Ana dheno, “Ey, Jadwoŋ, to kole kada gwokere ma tiendi meza bende jocamo ye kada nyaka ŋinjeŋinje cemo ma nyithindho jocamo odoŋ!”

²⁹ Yesu owaco rigo ni, “Ro luwo perin me, ere dok peco, jwogi otieko wok kwoŋ nyarin!”

³⁰ Dhako no odok peco to nwaŋo nyare i kanindo kareno jwogi adieri otieko wok kwoŋe kicutho.

Yesu botho obadha moro

³¹ Yesu owok iy'adec ma Tire to luwo royo ma Sidon, iy'adec ma Dekapoli, munyo kidho dho wakawaka ma Galili.

³² Jomoro jokelo rigo obadha ma ithe otho aka lewe odole, to jokwayo Yesu ni wokethi cinge kwoŋe.

³³ Yesu okwanyo ŋato otero gicen, aka oketho lwet cinge i ithe ario je, to ŋulo law i cinge to geyo gine lew ŋato.

³⁴ Gikenyo Yesu oŋiyo malo i polo, to omo cunye tektek, aka owaco ri ŋato ni, “Efifatha.” Meno nyaka ni “Yawere.”

³⁵ Piyo piyo no ithi ŋato oyawere, tiendi lewe ogonyere, to cako luwo maber.

³⁶ Yesu ociko jo teltel ni kiri jowowaci ri nyatoro. To paka omedo ciko jo, apaka bende jomedo nyayo wac no iye je.

³⁷ Ji je ma jowinjo wac no jouro swa. Jowaco ni, “Go otimo gimoro je maber; go miyo kiri joma ithi gin otho winjo wac, kodi obadhin luwo.”